TPSF yatoa wito kwa wafanyabiashara wa China kushirikiana na Watanzania

Mkurugenzi Mtendaji wa Taasisi ya Sekta Binafsi Tanzania (TPSF), Bw. Godfrey Simbeye (kushoto) na Rais wa Umoja wa Wafanyabiashara wa China Tanzania (CBCT), Bw. Zuang Zaisheng wakitiliana saini mkataba wa ushirikiano kati ya pande hizo mbili katika hafla iliyofanyika jijini Dar es Salaam leo (Jumatatu).  Wanaoshuhudia ni Mwenyekiti wa TPSF, Dkt. Reginald Mengi (waliosimama kushoto) na Balozi wa China Tanzania, Balozi Lu Youqing.

Mkurugenzi Mtendaji wa Taasisi ya Sekta Binafsi Tanzania (TPSF), Bw. Godfrey Simbeye (kushoto) akibadilishana nyaraka ya makubaliano ya mkataba wa ushirikiano na Rais wa Umoja wa Wafanyabiashara wa China Tanzania (CBCT), Bw. Zuang Zaisheng baada ya kutiliana saini katika hafla iliyofanyika jijini Dar es Salaam leo (Jumatatu).  Wanaoshuhudia ni Mwenyekiti wa TPSF, Dkt. Reginald Mengi (wa pili kushoto) na Balozi wa China Tanzania, Balozi Lu Youqing (wa pili kulia).

Na Mwandishi wetu, Dar es Salaam

Taasisi ya sekta Binafsi nchini (TPSF) imewashauri wafanyabiashara wa China kuingia ubia na watanzania kwa faida ya nchi zote mbili.

Mwenyekiti wa TPSF, Dkt. Reginald Mengi ametoa rai hiyo katika hafla ya kutiliana saini ya makubaliano ya kushirikiana kati ya TPSF na umoja wa Wafanyabiashara wa China nchini Tanzania (CBCT).

“Tunapenda kuona wakishirikiana na wafanyabiashara wa Tanzania hasa katika uwekezaji wa viwanda kwa lengo la kusaidia maendeleo ya nchi hii,” alisema Dkt. Mengi mbele ya waandishi wa habari jijini Dar es Salaam leo (Jumatatu).

Alisema kama wawekezaji wa China watakuja na kuwekeza bila kuwashirikisha watanzania, uwekezaji huo utakuwa wa upande mmoja na watanzania wataendelea kuwa masikini.

Alitoa changamoto kwa wawekezaji wa China kuwekeza kwenye viwanda vya kuyaongezea thamani mazao ya Tanzania ili bidhaa zake zipelekwe kwenye masoko ya China na nchi mbalimbali na kuuzwa kwa bei nzuri.

“Pia wafanyabiashara wa China wafuate sheria za nchi wanapoingiza bidhaa zao na kuzingatia ubora,” alisema.

Alisema makubaliano yaliyofikiwa kati ya CBCT na TPSF yatazidi kuchochea mahusiano mema ya kijami, kisiasa na kibiashara kati ya nchi hizo mbili.

Naye Balozi wa China nchini, Bw.Lu Youqing alisema China na Tanzania zina historia ndefu za urafiki.

“Tuna ushirikiano mkubwa na sasa mahusiano ya kibiashara yamekuwa makubwa sana,” alisema na kuongeza kuwa kwa sasa kuna wafanyabiashara zaidi ya 500 wa Kichina hapa Tanzania.

Aliongeza kusema kuwa wameingiza utalaamu na teknolojia katika uzalishaji katika kuelekea kwenye mapinduzi ya viwanda.

Alisema mahusiano ya kibiashara kati ya TPSF na CBCT ni chachu na ni moja ya hatua katika kukuza uchumi wa Tanzania.

Kwa upande wake, Mkurugenzi Mtendaji wa TPSF, Bw.Godfrey Simbeye alisema wafanyabiashara wa China kupitia CBCT wamesaini makubaliano hayo katika jitihada za kuimarisha ushirikiano na biashara hapa nchini.

“TPSF ni chombo cha juu cha sekta binafsi, wakiwemo wafanyabiashara wa ndani na wageni na ndicho kinacho wasemea wote serikalini,” alisema.

Alisema makubaliano hayo yatawawezesha wafanyabiashara hao kuweza kutoa maoni yao juu ya maswala mbalimbali yanayowahusu kibiashara hapa nchini kupitia TPSF.

Aliongeza kusema taasisi yao inaendelea kuzungumza nao ili CBCT iweze kuwa mwanachama kamili wa TPSF.

Rais wa CBCT, Bw. Zuang Zaisheng alisema mahusiano hayo ya kibiashara yanalenga wafanyabiashara wa china na Tanzania kuwa kitu kimoja kibiashara.

“CBCT itaendelea kuwaeleza wafanyabiashara wake waje kufanya  biashara Tanzania na kuwekeza zaidi huku wakiheshimu utamaduni na sheria zilizopo,”alisema.

Mwisho.