Makamba ahimiza uwekezaji sekta ya mawasiliano Tanzania

Naibu Waziri, Wizara ya Mawasiliano, Sayansi na Teknolojia, Bw. Januari Makamba (kushoto) akimsikiliza Mratibu wa Mauzo wa Kampuni ya Mawasiliano Tanzania (TTCL) Bw. Thomasi Lemunge katika banda la kampuni hiyo wakati wa kongamano la kimataifa la mawasiliano lililomalizika jana jijini Dar es Salaam. Kushoto kwa Waziri ni Afisa Mtendaji Mkuu wa TTCL, Dkt. Kamugisha Kazaura.

Naibu Waziri, Wizara ya Mawasiliano, Sayansi na Teknolojia, Bw. Januari Makamba (kushoto) akimsikiliza Afisa Mtendaji Mkuu wa Kampuni ya Mawasiliano Tanzania (TTCL), Dkt. Kamugisha Kazaura alipotembelea banda la kampuni hiyo wakati wa kongamano la kimataifa la mawasiliano lililomalizika jana jijini Dar es Salaam.

Naibu Waziri, Wizara ya Mawasiliano, Sayansi na Teknolojia, Bw. Januari Makamba akizungumza na Mkurugenzi wa Kampuni ya Mawasiliano ya Kijapan, Bw. Norifumi Egi (katikati) na Bw. Victor Pitamber wa Business Development Internet Solution, baada ya kutembelea banda lao wakati wa kongamano la kimataifa la mawasiliano lililomalizika jana jijini Dar es Salaam.

Na Mwandishi wetu, Dar es Salaam

Wawekezaji wa ndani na nje ya nchi wameshauriwa kutumia fursa zilizopo katika sekta ya mawasiliano na maeneo mengine nchini kuja kuwekeza kwa faida ya pande zote mbili.   

Naibu waziri wa wizara ya Mawasiliano, Sayansi na Teknolojia, Bw. Januari Makamba aliwaambia waandishi wa habari jana katika kongamano la kimataifa la wadau wa mawasiliano kuwa Tanzania ina fursa nyingi za uwekezaji.

“Tuna fursa nyingi na mazingira ya uwekezaji ni mazuri na yanazidi kuboreshwa,” alisema.

Akitoa mfano alisema serikali imetumia fedha nyingi kujenga mkongo wa taifa wa mawasiliano ambao kwa sasa umefungua milango kwa sekta ya mawasiliano kwa Tanzania na nchi za jirani.

“Mkongo huu ulijengwa kwa ajili ya taifa letu, lakini pia umefungua njia mpya kwa mataifa mengine yakiwemo ya Afrika Mashariki, Kati na Kusini kutumia kwa mapatano ya kibiashara,” alisema.

Alisistiza kwamba makampuni yanayotaka kutumia mkongo wa taifa kufikisha huduma za mawasiliano katika nchi mbalimbali yanakaribishwa ili kufikia lengo na  kupanua wigo wa mawasiliano katika bara hili na kufikia maendeleo.

Mkongo wa taifa wa mawasiliano ni muundombinu wa teknolojia ya habari na mawasiliano (TEHAMA) unaojengwa na serikali kupitia wizara ya mawasiliano, Sayansi na Teknolojia na kusimamiwa na kuendeshwa na TTCL.

Tayari baadhi ya makampuni ya mawasiliano ya nchi jirani yameshaunganishwa kupitia Tanzania na nchi zaidi kama Uganda na Msumbiji zinaendelea kuzungumza na serikali kuona jinsi ya kujiunga nao.

Ujenzi wa mkongo wa taifa wa mawasiliano unaendelea kujengwa kwa awamu na ukikamilika utakua na urefu wa zaidi ya kilomita 10,000.

Afisa Mtendaji  Mkuu wa Kampuni ya Mawasiliano Tanzania (TTCL), Dkt. Kamugisha Kazaura alisema mkutano huo wa wadau wa mawasiliano ulitoa fursa za kibiashara ambapo waliweza kubadilishana mawazo, na kujifunza.

“Tumefikia makubaliano ya kibiashara kati ya kampuni yetu na makampuni ya watoa huduma yaliyoshiriki katika mkutano huu...lengo ni kupata wateja wengi wa mkongo wa taifa,” alisema.

Alisema kwa sasa kuna mikongo mitatu inayopita baharini hivyo mataifa hayo na makampuni za watoa huduma za mawasiliano yatumie fursa na kunganishwa na mikongo huo wa taifa.

Afisa Mtendaji Mkuu wa kampuni ya kimataifa ya LIQUID TELECOM yenye makao makuu nchini Mauritius, Bw. Hans Haerdtle, alisema kampuni yao ilifaidika na mkutano huo kwa kubadilishana mawazo na kujifunza kutoka kwa wadau wengine wa mawasiliano.

“Huu ni mkutano muhimu kwetu tumejifunza mengi, na tumeweza kutumia fursa hii kufanya mazungumzo ya kibiashara na makampuni mbalimbali ikiwemo TTCL,”alisema.

Alisema kampuni yao imejidhatiti kuzidi kupanua na kutoa huduma bora kwa kuwekeza zaidi ili kutoa huduma bora kwa wateja wake katika eneo la Afrika Mashariki, kati na kusini.  

Mkutano huo uliwaleta pamoja watoa huduma za mawasiliano 460 kampuni kama ya TTCL, wauza vifaa vya mawasiliano, kampuni zinazotoa huduma za mawasiliano kwa njia ya satelaiti na mikongo ya baharini. 

Mwisho