Tanzania yaongoza kuvutia mitaji ya uwekezaji Afrika Mashariki

Na Mwandishi wetu, Dar es Salaam

Tanzania imeendelea kufanya vizuri katika kuvutia mitaji na kuongoza katika nchi za Afrika ya Mashariki kwa mujibu wa ripoti ya hivi karibuni.

Ripoti ya uwekezaji ya Rand Merchant Bank (RMB), 2013 inayotoa mwongozo wa mahali pa kuwekeza kwa makampuni, inaonyesha kuwa kwa mara ya kwanza Tanzania imeishinda Kenya katika kuvutia mitaji ya uwekezaji ya makampuni.

Akiongelea ripoti hiyo mbele ya waandishi wa habari jana jijini Dar es Salaam, Mkurugenzi Mtendaji wa Kituo cha Uwekezaji nchini (TIC), Bi. Juliet Kairuki alisema kuwa Tanzania imeshikilia nafasi yake katika kundi la nchi kumi bora zinazovutia uwekezaji wa mitaji ya makampuni makubwa.

Kufanya vizuri kwa Tanzania kunatokana na kuboreshwa kwa mazingira ya uwekezaji ikiwemo jitihada mbalimbali zinazofanywa na serikali ya awamu ya nne chini ya Rais Jakaya Kikwete.

“Ripoti hii ni uthibitisho tosha wa jitihada zinazofanywa na serikali katika kuimarisha mazingira ya uwekezaji na kuvutia mitaji kutoka nje na ndani ya nchi,” alisema Bi. Kairuki.

Tanzania, Kenya na Ethiopia ni nchi pekee zilizo katika kundi la nchi kumi zinazofanya vizuri katika eneo hili la Afrika.

Kwa mujibu wa ripoti hiyo, Tanzania imepanda nafasi moja na kuwa ya tisa wakati Kenya imeshuka nafasi na kuwa ya kumi.

Pamoja na kwamba Rwanda haiku katika nchi kumi bora, bado imeendelea kuwa kivutio na kushika nafasi ya 14.

Nchi ya Uganda ni ya 15, Mauritius 16, Angola 20, na Burundi imeshika nafasi ya 41.

Nchi ya Afrika ya Kusini ndio inayoongoza kwa kuvutia uwekezaji ikifuatiwa na Nigeria katika nafasi ya pili.

RMB inatumia vigezo vikuu vitatu kuangalia swala zima la kuvutia uwekezaji katika kila nchi kama ifuatavyo: ukubwa wa soko; ukuaji wa uchumi kwa maika mitano ijayo na mazingira ya kazi katika nchi husika.

Kwa mujibu wa ripoti hiyo, nchi za Afrika bado zina kazi kubwa ya kufanya kuvutia uwekezaji duniani kulinganisha na nchi nyingine.

Bi. Kairuki alisema ripoti hiyo inataka ushirikishwaji zaidi wa sekta binafsi ili kuvutia zaidi mitaji toka kampuni na benki kubwa.

“Kwa mara nyingine tena tunahamasisha ushiriki zaidi wa sekta binafsi katika ujenzi wa nchi yetu,” alisema.

Alisema kuwa pamoja na changamoto kubwa iliyopo kuifanya Tanzania kufanya vizuri zaidi, TIC  imefurahia ripoti hiyo na kusema kuwa inaonyesha juhudi za serikali katika kujenga mazingira bora ya uwekezaji na biashara.

Mwisho