Wafanyabiashara watakiwa kuondoa vibanda vya biashara stendi ya Ubungo

Na Mwandishi wetu, Dar es Salaam

Wafanyabiashara wenye vibanda vya kukatia tiketi katika stendi ya Ubungo ambako Mradi wa Mabasi Yaendayo Haraka (DART) unaendelea, wametakiwa kuviondosha vibanda hivyo katika maeneo hayo ili kupisha ujenzi wa mradi huo.

Katibu Mkuu Ofisi ya Waziri Mkuu, Tawala za Mikoa na Serikali za Mitaa (TAMISEMI) Bw. Jumanne Sagini aliwaambia waandishi wa habari mwishoni mwa wiki jijini Dar es Salaam kuwa wafanyabiashara hao wanatakiwa kuondoa vibanda vyao ili kupisha ujenzi wa mradi huo unaoendelea katika eneo hilo.

“Tunataka waondoe vibanda vyao katika eneo la Ubungo ili kupisha mradi unaoendelea uweze kukamilika kwa muda tulioupanga,” alisema Bw. Sagini.

Alisema wafanyabiashara hao walishalipwa fidia baada ya kufanyiwa tathimi lakini cha kushangaza bado wanaendelea kuwepo katika maeneo hayo na kusababisha mradi kutoendelea kwa kasi iliyokuwa inakusudiwa katika eneo hilo.

Alisema serikali ililipa Jiji la Dar es Salaam fedha kwa ajili ya kuwapatia fidia wao, na uongozi wa jiji ulifanya hivyo na kila mtu alipata fidia hiyo.

 “Kwa vile uongozi wa Jiji la Dar es Salaam uliwalipa fidia wenye vibanda,sasa wanapaswa kusimamia zoezi hili na kuwaondosha kabisa hao waliobaki kwa sababu hawastahili kuwepo tena katika maeneo haya,”aliongeza kusema Bw. Sagini.

Alisema dhamira ya serikali ni kuona mradi huo unakamilika kwa muda uliopangwa kwa sababu ukichelewa kwa makosa ya hapa nchini, serikali itaingia gharama ya kumlipa mkandarasi kwa kuchelewesha mradi.

Naye Kaimu Mtendaji Mkuu wa Mamlaka inayosimamia mradi huo ya DART,Bi. Asteria Mlambo alisema maeneo yote ya Ubungo wakati mradi unaanza kulikuwa na majengo mbalimbali zikiwemo hoteli na vibanda vya kukatia tiketi.

“Maeneo haya yote yameshafidiwa thamani ya Tsh milioni 260 kupisha mradi  kuendelea kujengwa,” aliongeza kusema, Bi. Mlambo.

Hivi karibuni DART iliingia mkataba na kampuni ya washauri itakayofanya kazi ya kupatikana watoa huduma muhimu kwa mradi huo unaotarajiwa kuanza mwishoni mwa mwaka huu.

Hatua hiyo ilifikiwa baada ya kampuni hiyo ya REBEL Group ya Uholanzi kushinda zabuni na kushindanishwa na kampuni nyingine.

Mradi huu unalenga kupunguza kwa kiwango kikubwa foleni na msongamano wa magari katika jiji la Dar es Salaam.

Barabara zinazohusika na awamu hii ni pamoja na kilomita 20.9 kutoka Kimara hadi Kivukoni; barabara ya Msimbazi kutoka Faya hadi Kariakoo-Gerezani na sehemu ya barabara ya Kawawa kuanzia Magomeni hadi Morocco.

Mwisho