Mzumbe, Bradford vyadhamiria kuimarisha ushirikiano zaidi

Naibu Makamu Mkuu wa Chuo Kikuu Mzumbe, Utawala na Fedha, Prof. Faustin Kamuzora (kushoto) akimpatia zawadi Naibu Makamu Mkuu wa Chuo Kikuu cha Bradford cha Uingereza jana jijini Dar es Salaam.  Wanaoshuhudia ni Prof. George Shumbusho wa Mzumbe (wa pili kushoto) na Dk. Beverley Lucus toka Bradford.  Timu ya watu wanne toka Bradford ilikuwa Mzumbe kutathmini maendeleo ya ushirikiano wao wa muda mrefu.

Naibu Makamu Mkuu wa Chuo Kikuu Mzumbe, Utawala na Fedha, Prof. Faustin Kamuzora (kushoto) akipokea zawadi toka kwa Naibu Makamu Mkuu wa Chuo Kikuu cha Bradford cha Uingereza jana jijini Dar es Salaam.  Anayeshuhudia ni Prof. George Shumbusho wa Mzumbe Timu ya watu wanne toka Bradford ilikuwa Mzumbe kutathmini maendeleo ya ushirikiano wao wa muda mrefu.

Na Mwandishi wetu, Dar es Salaam

Chuo Kikuu Mzumbe na kile cha Bradford cha Uingereza vimedhamiria kuimarisha uhusiano zaidi kwa faida ya vyuo hivyo na nchi kwa ujumla.

Hatua hii inakuja wakati ambapo timu ya watu wanne toka chuo hicho maarufu cha Uingereza ikiwa Mzumbe kufanya tathmini ya kawaida ya kila mwaka kuona jinsi ushirikiano wao unavyoendelea.

Katika ushirikiano huo, Mzumbe inafundisha kozi mbili ambazo wanafunzi wanaohitimu hupatiwa vyeti vya chuo hicho cha Uingereza.

Kozi hizo ambazo zilianza kutolewa chini ya program ya ushirikiano huo mwanzoni mwa mwaka 2011 ni Shahada ya uzamili katika uchumi na fedha na shahada ya uzamili katika maendeleo ya sera na asasi za kiraia.

“Tunataraji kuwa tunaweza kuendelea kuimarisha ushirikiano huu na wanafunzi hapa Mzumbe,” Naibu Makamu Mkuu wa Chuo Kikuu cha Bradford, aliwaambia waandishi wa habari jana.

Alisema kwa pamoja, chuo chake na Mzumbe wanataka kuleta mabadiliko bora kwa wanafunzi na kuwajengea fursa na hivyo kufikia maendeleo endelevu na kufanya dunia kuwa mahali bora pa kuishi.

Akizungumzia kuhusu program hiyo, alisema wanafunzi wanafanya vyema na kusaidia chuo chao kuendelea kushikilia nafasi bora katika kufundisha kozi hizo.

Kwa upande wake, Naibu Makamu Mkuu wa Chuo Kikuu Mzumbe, Utawala na Fedha, Prof. Faustin Kamuzora alifafanua kuwa tathmini hiyo inayofanyika kila mwaka inalenga kuhakikisha kuwa ubora wa kozi zinazotolewa zinaendelea kuwa nzuri na kuboresha zaidi pale inapotakiwa.

“Tunaendelea vyema na ushirikiano huu, tunatarajia kupanua zaidi maeneo ya ushirikiano wetu,” alisema.

Alitaja maeneo ambayo wanatarajia kishirikiana zaidi kama kuanzisha kozi mpya, kufanya tafiti kwa pamoja, kupeleka wanafunzi wa uzamivu katika chuo hicho kwa masomo zaidi na kuwajengea zaidi uwezo walimu wa Mzumbe kupitia mafunzo mbalimbali.

Mratibu wa program hiyo Mzumbe, Dk. Andrew Mushi alisifu ushirikiano huo na kusema kuwa umesaidia kuinua hadhi ya Mzumbe pamoja na kutoa wahitimu walio bora kabisa kimataifa.

“Wahitimu wanaomaliza kozi hii wanafanya vizuri sana katika kazi zao,” alisema. 

Ushirikiano kati ya vyuo hivi umedumu sasa kwa miaka takribani 30 wakishirikiana katika maeneo mbalimbali.

Mwisho.