PASS yashinda Nanenane, yaahidi huduma zaidi kwa wakulima

Na Mwandishi Wetu, Dodoma

Baada ya kufanya vizuri kitaifa katika maonesho ya wakulima Nanenane, Asasi ya kusaidia uwekezaji katika kilimo nchini (PASS) imesema ushindi huo utakua chachu kwao kuendelea kujiimarisha zaidi ili kuwafikia wananchi wengi.

Katika maonyesho ya mwaka huu, Asasi hiyo ilishiriki katika mikoa mitatu ya Dodoma, Mbeya na Morogoro na kushinda katika mikoa yote .

Wakati katika mkoa wa Dodoma PASS ilishika nafasi ya pili katika kipengele cha asasi zisizo za kiserikali; mkoani Morogoro ilishika nafasi ya kwanza katika kipengele cha huduma za kifedha na kushika nafasi ya pili katika huduma za kilimo mkoani Mbeya. 

Akiongea na waandishi wa habari mwishoni mwa wiki mjini Dodoma, Mkurugenzi Mtendaji  wa PASS, Bw.Iddy Lujina alisema hatua hiyo inakusudia kuwakomboa wananchi kupitia kilimo ikiwa pia ni njia mojawapo ya kukuza uchumi wa nchi na kuongeza pato la taifa kupitia sekta hiyo.

“Tumedhamiria kuwafikia wakulima wengi zaidi ifikapo mwishoni mwa mwaka huu, hii ikiwa ni pamoja na kuendelea kufungua matawi  katika mikoa mbalimbali hapa nchini ili kuwaendeleza wakulima wengi zaidi,” alisema Lujina.

Aliongeza kuwa ushindi walioupata utakuwa chachu ya wao kuendelea kujitanua zaidi na kuongeza kasi ya kuendelea kuwasaidia wakulima wengi nchini ili waweze kuendana na mkakati wa serikali wa Kilimo Kwanza na ule wa ukuaji wa kilimo katika ukanda wa kusini mwa Tanzania (SAGCOT).

“Siku zote tumekuwa katika mikakati madhubuti ya kuhakikisha kilimo katika nchi hii kinakuwa na kuimarika zaidi, tutaendelea na juhudi hizi kwa faida ya wakulima na nchi nzima kwa ujumla,” aliongeza.

Akielezea zaidi alisema siku zote PASS imekuwa ikifanya kazi kwa karibu na serikali yetu katika kuendeleza kilimo katika nchi hii hasa katika kupeana ushauri wa kitaalamu wa kuwafikia wakulima katika maeneo yao na kufanya nao kazi.

Kwa upande wake, mmoja wa waliofaidika na PASS, Bw. Papian Emmanuel ameishukuru kwa kuwajali wakuliama wa nchi hii, huku akizitaka taasisi zinazohusika na utoaji wa mikopo kwa ajili ya kilimo kukiona kilimo kama eneo linalofaa kufanya nalo kazi.

“Taasisi nyingine zinatakiwa kuiga mfano wa PASS katika juhudi zao wanazofanya kuwafikia wakulima wengi hapa nchini, kutoa ushauri na kusaidia wakulima wadogo wadogo kupata mikopo,” alisema Bw. Emmanuel.

Asasi hii ilianzishwa mwaka 2000 ili kuwawezesha wakulima wapate huduma za mabenki.  Mpaka sasa imeshaidia wakulima 60,000 kupata mikopo yenye thamani ya Tshs 100 bilioni.

Kwa mujibu wa Bw. Lujina mwaka 2011 wakulima 11,000 pamoja na vikundi 524  waliwezeshwa kupata mikopo ya Tshs 28 bilioni.

Pamoja na mpango wa upanuzi wa asasi hiyo katika mikoa ya Kilimanjaro na Mtwara mwaka huu, asasi hiyo inatarajia kuwezesha wakulima wapate mikopo zaidi ya Tshs 300 bilioni kwenye miaka minne ijayo.

Kwasasa asasi hiyo ina ofisi katika mikoa ya Morogoro, Dar es Salaam, Mbeya na Mwanza.

Ends