Wanafunzi washauriwa kusoma kwa bidii, kuacha vitendo viovu

 Mkurugenzi Mtendaji wa Halmashauri Mufindi, Bw. William Ntinika (wa kwanza kulia) akizungumza mara baada ya kuzindua rasmi Chama cha Kuweka na Kukopa cha Kawawa 94 SACCOS limited katika shule ya Kawawa JKT High School iliyopo Wilayani Mufindi Iringa hivi karibuni. Chama hicho kimeanzishwa na wanafunzi waliowahi kusoma katika shule hiyo kwa ajili ya kuwezeshana kivipato, kuenzi shule hiyo na pia kuenzi jina la shule ambalo ni la Waziri Mkuu Mstafu, Hayati Rashid Kawawa.  Kushoto ni Mwenyekiti wa chama hicho, Bw. Patrick Mavika na katikati ni Mkuu wa shule hiyo, Meja Hamis Maiga.

Mkurugenzi Mtendaji wa Halmashauri ya wilaya ya Mufindi, Bw. William Ntinika akimkabidhi rasmi cheti Mwenyekiti wa Chama cha Kuweka na Kukopa cha Kawawa 94 SACCOS limited, Bw. Patrick Mavika (kushoto) wakati wa uzinduzi wa chama hicho uliofanyika Wilaya ya Mufindi mkoani Iringa hivi karibuni.

Na mwandishi wetu, Iringa

Wanafunzi Mkoani Iringa wameshauriwa kuzingatia masomo yao na kuachana na vitendo ambavyo vinaweza kuhatarisha kukatisha masomo yao na kuharibu maisha yao ya baadaye.

Kauli hiyo ilitolewa na Mwenyekiti wa Chama cha Kuweka na Kukopa cha Kawawa 94 SACCOS limited, Bw. Patrick Mavika wakati wa uzinduzi wa chama hicho wilayani Mufindi mkoani Iringa hivi karibuni.

“Baadhi ya wanafunzi katika mkoa wetu wanashindwa kumaliza masomo yao kutokana na kujitumbukiza katika vitendo visivyofaa kama utumiaji wa madawa ya kulevya na vitendo vingine,”alisema.

Chama hicho cha kuweka na kukopa kimeanzishwa na wanafunzi waliowahi kusoma shule ya Kawawa JKT High School iliyopo Mufindi, Iringa ili kusaidiana kiuchumi na kuwekeza katika vitegauchumi mbalimbali vitakavyo waongezea vipato.

“Tumeamua kufanya uzinduzi wa chama chetu katika shule yetu ili tuweze kuienzi shule hii ambayo tulisomaa na pia kulienzi jina la shule hii la Waziri Mkuu wa Zamani Hayati Rashid Kawawa,” alisema Bw. Mavika.

Wanafunzi hao wa zamani walichangia tani mbili ya saruji na mchanga kwa ajili ya kukarabati sakafu ya madarasa yote ambayo yalikuwa katika hali isiyoridhisha.

Naye Mkurugenzi Mtendaji wa Halmashauri Mufindi, Bw. William Ntinika akizungumza kwa niaba ya Mkuu wa Mkoa wa Iringa, Dr. Christine Ishengoma alisema wahitimu wa shule mbalimbali mkoani humo wanatakiwa kuiga mfano huo ili kuendeleza shule walizosoma.

“Wahitumu katika shule zetu wakifanya kama hawa wenzao itasaidia kuendeleza elimu mkoani hapa na kuendeleza jamii kwa ujumla,” alisisitiza.

Alisema SACCOS hiyo ina masharti nafuu ya kujiunga na kukopa na inatoa fursa kwa wanafunzi wote waliowahi kusoma katika shule hiyo kujiunga.

Pia alishauri wazazi wenye wanafunzi katika shule hiyo kujiunga na chama hicho ili kuwawezesha kulipa ada za watoto wao bila usumbufu.

Aidha aliongeza kusema kuwa Mkoa wa Iringa na hasa wilaya ya Mufindi ni maarufu kwa zao la mbao na sasa kupitia chama hicho wataweza kukopa fedha na kununua mbao kisha kwenda kuuza katika masoko makubwa.

Mkuu wa shule hiyo, Meja Hamis Maiga alishukuru msaada uliotolewa na chama hicho cha kuweka na kukopa na kuwa utasaidia shule yake kuwa katika hali nzuri zaidi.

“Tunashukuru wahitimu hawa na pia sisi tutajiunga ili tuweze kupata mikopo,” alisema.

Alisema mafanikio ya wahitimu hao na msaada waliotoa kwa shule hiyo itakuwa ni hamasa kwa wanafunzi wanaoendelea na masomo shuleni hapo kujituma kimasomo.

Chama hicho cha Kuweka na Kukopa kimeanza na wanachama 25 wanafunzi waliowahi kusoma katika shule hiyo kuanzia mwaka 1994 ilipoanzishwa.

Mwisho