TIC yazindua tovuti mpya kuimarisha zaidi mazingira ya uwekezaji nchini

Na Mwandishi wetu, China

Katika juhudi za kuimarisha zaidi huduma zake, Kituo cha Uwekezaji Tanzania (TIC) kimezindua tovuti yake mpya.  

Inatazamiwa kuwa tovuti hiyo, www.tic.co.tz, itabadilisha kwa kiwango kikubwa jinsi watanzania, wawekezaji wa ndani na wa nje wanavyowasiliana na serikali na namna wanavyoshughulikia maswala kama kusajili kampuni, kujiandikisha katika kulipa kodi na mengine.

Uzinduzi huo ulitangazwa na Mkurugenzi Mtendaji wa TIC, Ms. Juliet Kairuki wakati wa kongamano la wafanyabiashara wa Tanzania na China lililofanyika katika jiji la Guangzhou nchini China hivi karibuni.

Bi. Kairuki ni mmoja wa maafisa waandamizi wa serikali walio nchini China kwa ziara ya siku 9 inayokusudia kuimarisha mahusiano ya kibiashara na uwekezaji kati ya nchi hizo.  Ujumbe huo unaongozwa na Waziri Mkuu, Bw. Mizengo Pinda.

“Tovuti hii inatoa fursa kwa wawekezaji wa ndani na nje kupata taarifa zote wanazohitaji kuhusu kuwekeza nchini Tanzania,” alisema Bi. Kairuki wakati wa uzinduzi huo.  

Katika juhudi zake za kujenga mazingira bora ya uwekezaji nchini, TIC inafanya kila linalowezekana kutoa taarifa muafaka na kwa wakati kwa wawekezaji na wale wanaotarajia kuwekeza.

Akielezea faida za tovuti hiyo, Bi. Kairuki alisema inatoa taarifa nyingi na kwa uwazi na kuelezea kwa hatua nini kinatakiwa kufanyika na kwa wakati gani.

“Inaelezea kwa kina nini kinatakiwa kufanyika na kwa wakati gani,” alisema.

Alisema pia kuwa tovuti hiyo inaelezea gharama rasmi za serikali zinazotakiwa kulipwa kwa kila hatua ili kuondoa mkanganyiko wowote.

“Taarifa hizo zinapatikana katika lugha zaidi ya 60, ikijumuisha Kiswahili,” alisema na kuongeza kuwa tovuti hiyo inaelekeza afisa husika na anuani anayotumia kama itabidi kuwasiliana naye.

Juhudi za TIC kuimarisha utoaji taarifa zake katika mtandao zilianza Mei 2012 kwa msaada wa kiufundi kutoka shirika la umoja wa mataifa linaloshughulikia maendeleo na biashara (UNCTAD).

Juhudi hizo zinalenga kuimarisha mazingira ya biashara ya Tanzania kwa kurahisisha taratibu zake, kuzieleza na kuzitangaza kwa wadau mbalimbali.

Tovuti hii inaelezea sheria na taratibu zinazotakiwa kufuatwa kwa uwazi zaidi.

Kwa mujibu wa kiongozi huyo, tovuti inatoa maelezo ya hatua zinazotakiwa kufuatwa, anayehusika, nyaraka zinazotakiwa kuwasilishwa, kuchukuliwa, malipo, muda wa kusubiri, sehemu ya malalamiko na sheria zinazohusika katika kufanya kazi na taasisi za serikali.

“Taratibu zimerahisishwa kwa kuondolewa hatua za kisheria zisizotakiwa na mahitaji mengine yasiyokuwa ya lazima,” alisema.

Kupitia tovuti hii, ni rahisi kwa mjasiriamali kuwasiliana na zaidi ya taasisi za umma 20 na kuwasiliana na zaidi ya watumishi wa serikali 88 ambao wako tayari kusaidia katika hatua mbalimbali.

Mwisho