Kituo cha kibiashara Kurasini chachu kwa uchumi —Dkt. Meru

Mkurugenzi Mkuu wa Mamlaka ya Ukanda Maalumu wa Uwekezaji (EPZA), Dkt Adelhelm Meru akisisitiza jambo katika mkutano wake na waandishi wa habari jana jijini Dar es Salaam.

Na Mwandishi wetu, Dar es Salaam

Mamlaka ya Ukanda Maalumu wa Uwekezaji nchini (EPZA) imesema ujenzi wa kituo kikubwa cha kibiashara kinachotarajiwa kujengwa Kurasini jijini Dar es Salaam kwa ubia kati ya serikali ya Tanzania na Kampuni kutoka China kitakuwa na manufaa makubwa kiuchumi na ustawi wa jamii.

Mkurugenzi Mkuu wa Mamlaka hiyo, Dkt. Adelhelm Meru amewaambia waandishi wa habari jana jijini Dar es Salaam kuwa maendeleo ya uendelezaji eneo hilo kwa ajili ya ujenzi wa kituo hicho cha biashara umefikia hatua nzuri.

“Kituo hiki kinajengwa kwa ushirikiano wa serikali ya Tanzania kupitia EPZA na Kampuni hiyo ya ubia kutoka jimbo ya Yig China,”alisema.

Alisema katika kituo hicho kitakuwa na wafanyabiashara mbalimbali pia viwanda vitajengwa na kitawezesha kutoa ajira  zaidi ya 25,000 kwa watanzania kitakapokamilika.

Pia kitawezesha bidhaa za mataifa mbalimbali kupatikana na kupunguza gharama kwa watanzania kwenda nje ya nchi kutafuta bidhaa hizo.

“Serikali itaongeza wigo wa mapato yake kutokana na uwekezaji mkubwa utakaofanyika katika kituo hicho,” alisema.

Aliongeza kusema kuwa ujenzi unatarajia kuanza baada ya kukamilisha kufanya tathimini na ulipaji fidia makazi ya watu 1012 yaliyopo katika maeneo hayo.

Alifafanua zaidi kuwa ulipaji fidia huo ulio katika awamu tatu utakapokamilika tu ujenzi wa kituo hicho utaanza mara moja.

Awamu ya kwanza ya ulipaji fidia imeanza kutekelezwa ambapo watu 270 tayari wamefanyiwa tathimini na kulipwa na kuongeza kuwa wamepatiwa miezi miwili kuhama maeneo hayo.

Alisema kwa bahati nzuri baadhi ya wananchi wameelewa umuhimu wa ujenzi wa kituo hicho kwa ajili ya maendeleo ya nchi na jamii kwa ujumla.

“Wananchi wanastahili pongezi kwa kukubali fidia na tayari baadhi yao wameanza kuhama kabla ya muda wa miezi miwili waliyopewa,” alisema na kusisitiza kuwa wameanza kubomoa nyumba zao kupisha ujenzi wa kituo hicho.

Alisema nchi nyingi zilizoendelea zimefanikiwa kwa kutenga maeneo kama hayo ambayo yana viwanda vinavyozalisha bidhaa mbalimbali.

Alisisitiza wawekezaji kutumia fursa hiyo maana eneo hilo linaandaliwa kwa ajili ya kituo cha kibiashara ambacho ndani yake kutajengwa viwanda ili bidhaa zipatikane hapa nchini kwa ghramna nafuu.

Kwa muda mrefu sasa serikali imekuwa katika juhudi za kupunguza gharama za kufanya biashara hapa nchini na wataalamu wanasema ujio wa kituo hiki ni moja ya hatua hizo.

Mwisho