EPZA yashawishi wawekezaji toka China katika maeneo yake nchini

Na Mwandishi wetu, Dar es Salaam

Wawekezaji kutoka nchini China wameshawishiwa kuwekeza katika maeneo ya Mamlaka ya Ukanda Maalumu wa Uwekezaji nchini (EPZA) ambayo yameshatengwa kwa ajili hiyo katika mikoa mbalimbali.

Mkurugenzi Mkuu wa EPZA, Dr. Adelhelm Meru alitoa wito huo wakati alipokuwa akitoa mada kuhusu maeneo maalum ya uwekezaji Tanzania na mamlaka yake wakati wa kongamano la pili la biashara kati ya Tanzania na China lililofanyika jijini Dar es Salaam hivi karibuni.

“Tunawakaribisha muwekeze katika maeneo huru ya uwekezaji Tanzania,” alisema.

Akitoa mfano, Dk. Meru alisema kuwa serikali tayari imetenga jumla ya hekta 22,000 katika eneo la uwekezaji Bagamoyo na kuwa anawahimiza wawekezaji toka nchi hiyo kuja kuwekeza katika eneo hilo.

“Tunataka eneo hili kuwa la viwanda na kituo cha biashara,” alisema.

Alisema kuwa serikali kwa kushirikiana na sekta binafsi iko mbioni kuendeleza miundombinu katika eneo hilo na kuwa sasa ni wakati muafaka kwa wawekezaji kuja na kutekeleza adhma yao.

Alisema kuwa bandari kubwa nchini itajengwa katika eneo hilo na kuwa itabadilisha kwa kiwango kikubwa muonekano wa Bagamoyo.

Katika mpango pia ni kiwanja cha ndege cha kisasa na reli itakayounganishwa na ile ya kati na TAZARA.

EPZA imetenga maeneo huru na maalumu ya uwekezaji katika mikoa 20 yakiwa na ukubwa wa hekari 500-9,000 kila moja.

Kwa upande wake, Mkurugenzi wa Maendeleo ya Viwanda wa muungano wa wafanyabiashara, viwanda na kilimo (TCCIA) Mr.Adam Zuku alisema kuwa watanzania wananatakiwa kuzidisha ujuzi na taaluma ili kuweza kushirikiana kati ya nchi hizo mbili.

“Elimu na ujuzi mbalimbali utatuwezesha kushirikiana vyema na wawekezaji kutoka nje na kufaidika,” alisema.

Hivi karibuni, EPZA ilisaini makubaliano na Benki ya Maendeleo Tanzania (TIB) kwa ajili ya kupata mikopo ya kujenga miundombinu itakayovutia wawekezaji kuanzisha viwanda katika maeneo yake maalumu.

Makubaliano hayo yalilenga kuendeleza maeneo ya mamlaka hiyo yaliyosambaa pote nchini.

Kupitia makubaliano hayo maeneo maalumu ya uwekezaji kama Bagamoyo, Mtwara, Kigoma, Tanga na mengine yote yaliyo katika mikoa 20 yatapata miundombinu itakayovutia wawekezaji wa ndani na nje.

Kongamano hilo lilishirikisha kampuni zaidi ya 100 kutoka China na kampuni zaidi ya 120 za kitanzania.

Hadi sasa China imesajili miradi 522 TIC yenye thamani ya dola za Kimarekani bilioni 2.4 ambayo inatarajiwa kuzalisha ajira 77,335.

Kongamano hilo la siku tatu liliandaliwa na TIC kwa kushirikiana na Wizara ya Mambo ya Nje na Ushirikiano wa Kimataifa na Baraza la Biashara China Afrika (CABC) na kudhaminiwa na Stanbic Bank Tanzania.

Mwisho

TIC yawataka wafanyabiashara nchini kutumia vyema fursa

Mwenyekiti wa Taasisi ya Sekta Binafsi Tanzania (TPSF), Dk. Reginald Mengi (kushoto) akielezea jambo kwa Mwenyekiti wa bodi ya wakurugenzi wa Kituo cha Uwekezaji nchini (TIC), Prof. Lucian Msambichaka (katikati) na Mkurugenzi Mstaafu wa TIC na pia Balozi wa heshima wa Botswana hapa nchini, Eng. Emmanuel Ole Naiko wakati wa kongamano la pili la biashara kati ya Tanzania na China lililomalizika hivi karibuni jijini Dar es Salaam.

Na Mwandishi wetu, Dar es Salaam

Wafanyabiashara wa Tanzania wameshauriwa kutumia fursa waliyopata wakati wa kongamano la pili la biashara kati ya Tanzania na China kujenga mtandao wa kibiashara utakaodumu kwa faida yao na nchi kwa ujumla.

Akiongea na waandishi wa habari katika siku ya mwisho ya mkutano huo jana, Mkurugenzi Mtendaji wa Kituo cha Uwekezaji nchini (TIC), Bi. Juliet Kairuki alitoa wito kwa wafanya biashara wa Tanzania kutumia mahusiano waliyojenga katika kongamano hilo ili kujiimarisha kimataifa.

“Fursa hii ikitumika vyema, itasaidia wafanyabiashara wetu kukuwa na hivyo kuongeza mapato katika nchi yetu kwa kuvutia mitaji, teknolojia na ujuzi,” alisema.

Alisema wafanya biashara wa nchi hiyo wapo tayari kufanya biashara na watanzania ambao alisema wanatakiwa kuchangamkia fursa hiyo waliyoipata.

Katika kongamano hilo, TIC pamoja na taasisi nyingine zilipata nafasi kutangaza fursa za biashara na uwekezaji Tanzania na pia wafanyabiashara wa pande zote walifanya mkutano wao kufahamiana na kuona uwezekano wa kufanya kazi pamoja.

Tanzania ilijinadi katika maeneo mbalimbali kama miundombinu, Kilimo, utafutaji mafuta na uchimbaji gesi, viwanda, madini na biashara.

Bi. Kairuki alisema kuwa nchi inahitaji mitaji mingi kutoka nje ya nchi (FDI) na wafanya biashara wa nchi hiyo ya pili kwa uchumi duniani wanahitajika zaidi kuja kibiashara nchini.

“Mitaji ya kutoka nje ya nchi inasaidia kukuza mapato na uchumi ndiyo maana kituo chetu kinafanya kazi ya kuvutia wawekezaji,” alisema.

Alisema kampuni zilizoshiriki kongamano hilo ni zenye uwezo mkubwa wa kimitaji kuwekeza katika sekta mbalimbali na kwamba Tanzania iko tayari kufanya nao kazi na kuwa itaendelea kuweka mazingira mazuri ya biashara ili kuzidi kuvutia wawekezaji.

Kwa upande wake, Mwenyekiti wa bodi wa Kituo hicho,Profesa Lucian Msambichaka alisema wawekezaji wamekuja katika wakati mwafaka ambao taifa linawahitaji.

“Tunatambua bila uwekezaji hakuna maendeleo ndiyo maana hata nchi nyingi duniani zinavutia wawekeji na mitaji,” alisema.

Alisema huu ni wakati wa wafanyabiashara wa Tanzania kushirikiana na wale wa China ili kukuza mapato yao na uchumi wa taifa.

Alisema kituo kituo cha uwekezaji kimejipanga kuzidi kushirikiana na wafanyabiashara wa ndani na nje ili kukuza uwekezaji.

Mmoja wa wawekezaji kutoka China, Bw. Kendall, alisema amefurahishwa na taarifa kuhusu Tanzania alizopata katika kongamano.

“Tanzania inaweza kufikia hatua kubwa ya maendeleo baada ya miaka 10 au 20...mwenendo wa nchi hii unaridhisha,” aliwaambia waandishi wa habari.

Hata hivyo, alisema ili hilo litokee panahitajika kuwepo sera ya kuwawezesha wananchi kielimu pamoja na ufundi katika Nyanja mbalimbali na kwa madaraja tofauti hasa ya chini na kati.

“Elimu na maarifa ya ufundi kwa watu wengi ni muhimu kama nchi inataka kupata maendeleo ya haraka,” alisema.

Kongamano hilo lilishirikisha kampuni zaidi ya 100 kutoka China na kampuni zaidi ya 120 za kitanzania.

Hadi sasa China imesajili miradi 522 TIC yenye thamani ya dola za Kimarekani bilioni 2.4 ambayo inatarajiwa kuzalisha ajira 77,335.

Kongamano hilo la siku tatu liliandaliwa na TIC kwa kushirikiana na Wizara ya Mambo ya Nje na Ushirikiano wa Kimataifa na Baraza la Biashara China Afrika (CABC) na kudhaminiwa na Stanbic Bank Tanzania.

Kongamano hilo lilifunguliwa na Makamu wa Rais wa China Bw, Li Yuanchao.

Mwisho

Sekta binafsi yakaribisha wawekezaji wa China

Na Mwandishi wetu, Dar es Salaam

Sekta binafsi nchini imekaribisha wawekezaji kutoka China kuwekeza nchini kwa faida ya pande zote mbili.

Akiongea na waandishi wa habari mwishoni mwa kongamano la pili la biashara kati ya Tanzania na China Jumatano wiki hii jijini Dar es Salaam, Mkurugenzi  Mtendaji wa Taasisi ya Sekta Binafsi nchini (TPSF),Bw. Godfrey Simbeye alisema taasisi hiyo inakaribisha wawekezaji kutoka nchi hiyo katika juhudi za kufikia maendeleo endelevu hapa nchini.

“Sisi kama sekta binafsi tunasisitiza uwekezaji mzuri unaolenga kuiendeleza Tanzania...tunawakaribisha wawekezaji hawa kuja kufanya kazi hapa,” alisema.

Kongamano hilo lilishirikisha kampuni zaidi ya 100 kutoka China na kampuni zaidi ya 120 za kitanzania.

Hadi sasa China imesajili miradi 522 TIC yenye thamani ya dola za Kimarekani bilioni 2.4 ambayo inatarajiwa kuzalisha ajira 77,335.

Hata hivyo, Bw. Simbeye aliwaambia waandishi kuwa uwekezaji huo bado ni mdogo ukilinganisha na ukubwa wa uchumi wa taifa hilo.

“Tunahitaji uwekezaji wao ufikie dola za kimarekani bilioni 5 katika kipindi cha miaka mitatu ijayo,” alisema.

Alisema sekta binafsi inapenda waje kuwekeza zaidi katika sekta ya viwanda na siyo kutumia fursa waliyopewa na watanzania kuja kuuza tu bidhaa zao.

Pia alisema wanapokuja kuwekeza ni vema wakatumia fursa hiyo kuwasaidia watanzania kupata ujuzi na teknolojia kupitia miradi ya ushirikiano (ubia) ili taifa liweze kupiga hatua.

Alisema taasisi hiyo iko tayari kushirikiana na wawekezaji hao kutoa msaada na mwongozo wowote utakaohitajika ili kuendeleza miradi watakayotaka kuanzisha hapa nchini.

“Tunazidi kupigania mazingira bora ya biashara ambayo yanaendelea kuboreshwa hivyo wawekezaji wa ndani na nje wachangamkie fursa zilizopo,” alisema.

Kwa upande wake, Katibu Mtendaji wa Baraza la Taifa la Biashara (TNBC), Bw. Raymond Mbilinyi alisema Tanzania imejitahidi kwa kiasi kikubwa kuboresha mazingira ya biashara ambayo yanavutia wawekezaji kutoka nchi mbalimbali kuja kuwekeza  kwa faifa ya nchi na wawekezaji.

“Mazingira yetu ya kufanya biashara yameboreshwa sana na tunaendelea na juhudi kuyaboresha zaidi,” alisema.

Alisema katika Mpango wa Maendeleo wa Miaka Mitano, Tanzania inaendelea kupambana na changamoto zinazokabili mazingira ya kufanya biashara.

Alisema changamoto hizo ni pamoja na kuzidi kuboresha mazingira ya uanzishaji biashara na upatikanaji wa ardhi ili wawekezaji wasitumie muda mwingi.

“Maeneo mengi hayajapimwa hapa nchini,hivyo serikali inaendelea kulifanyia kazi jambo hilo ili wawekezaji wasipate usumbufu wa ardhi ya kuwkeza,”alisema.

Pia serikali inaendelea kupunguza mianya ya rushwa ambayohuongeza gharama za kufanya biashara na kuwakatiza wawekezaji kuja kuwekeza.

Alisema TNBC kama chombo kinachokutanisha sekta binafsi na umma kinaendelea kuangalia kero na maeneo yanayofanya mazingira ya biashara na uwekezaji kutokwenda vyema ili kuibadilisha Tanzania.

Kongamano hilo la siku tatu lilofunguliwa na Makamu wa Rais wa China Bw, Li Yuanchao liliandaliwa na TIC kwa kushirikiana na Wizara ya Mambo ya Nje na Ushirikiano wa Kimataifa na Baraza la Biashara China Afrika (CABC) na kudhaminiwa na Stanbic Bank Tanzania.

Mwisho