Serikali yadhamiria kutatua shida ya maji vijijini

Na Mwandishi wetu, Mwanza

Katika kuhakikisha inatekeleza sera ya maji hapa nchini serikali imedhamiria kufanya mabadiliko makubwa ya kupeleka maji katika maeneo mengi vijijini katika kipindi cha kuanzia Juni mwaka huu hadi mwishoni mwa mwaka 2015.

Waziri wa Maji, Profesa Jumanne Mghembe aliyasema hayo hivi karibuni jijini Mwanza wakati akizungumzia sera ya maji na utekelezaji wake katika kuwafikia wananchi katika maeneo ya vijijini na mijini.

“Kupitia wizara ya maji serikali imeanzisha miradi mbalimbali ya maji hapa nchini, hii yote ni katika kutekeleza sera ya maji ambayo inasema kila mwananchi angalau asiishi umbali wa mita 400 kutoka eneo la maji yanakopatikana,” alisema Waziri wa maji.

Aliongeza kuwa upatikanaji wa maji nchini umegawanyika katika mafungu matatu,  fungu la kwanza ni upatikanaji wa maji kwenye miji mikuu ya mikoa na jiji la Dar es Salaam, upatikanaji wa maji vijijini na tatu ni upatikanaji wa maji katika miji midogo na miji mikuu ya wilaya.

“Katika miji mikuu ya mikoa na Dar es Salaam wastani wa upatikanaji wa maji ni asilimia 88 kama ilivyoelezwa kwenye sera ya maji, lakini ziko tofauti kutoka mji mmoja hadi mwingine,” alisema.

Alisema kwa maeneo ya vijijini upatikanaji wa maji bado uko chini, takwimu zikionyesha kuwa ni kama asilimia 49.

“Tunategemea kwamba mpaka kufikia mwezi Juni mwaka huu tutafika asilimia 55 na kufikia asilimia 74 ifikapo mwezi Desemba mwaka 2015,” alisema.

Alifafanua kuwa katika maeneo ya miji mikuu ya wilaya na miji midogo kama Mombo, na miji mikuu kama Muheza, Korogwe, Mwanga, Magu, Lamadi, Chato, Makambako, na Tunduru  upatikanaji wa maji ni ni wastani wa asilimia 51.5.

Alisema kutokana na hali hiyo mwaka huu wizara imechukua hatua ya kwanza ya kuhakikisha kwamba serikali inabadilisha hali hiyo, huku akisema lengo la sera ya maji ni kwamba kufikia mwaka 2015 katika miji midogo maji yawe yamefika kwa asilimia 55.

Aliongeza kua hivi sasa wizara yake inatekeleza miradi 1600 ambapo pamoja na matatizo ambayo wanakumbana nayo ya kifedha bado miradi mingi imekamilika.

Alisema kutokana na changamoto za maji nchini, serikali kupitia wizara yake inajitahidi kutekeleza miradi mbalimbali kwa haraka kama moja ya mikakati ya kufikia maendeleo miongoni mwa jamii.

Mapema katika ziara yake mkoani humo, Waziri Maghembe alitoa rai kwa watanzania kulinda vyanzo vya maji na kuwasihi kutunza miundombinu ya maji.

“Ni jukumu la kila mtanzania kutunza vyanzo vya maji, kuacha kukata misitu na kwa kufanya hivyo tutalinda vyanzo vya maji, afya zetu na uchumi wetu” alisisitiza.

Mwisho