Benki ya Afrika Tanzania yapigia debe wenye matatizo

Mkuu wa Idara ya Udhibiti na Tahadhari wa Benki ya Afrika Tanzania, Bi. Mwanahiba Mzee akimpatia chakula, Bw. Nelson Mwijage kwa ajili ya mgonjwa wake Gilbert Mtalemwa (aliyelala) katika hospitali ya ya CCBRT mjini Dar es Salaam Jumatatu wiki hii. Benki hiyo iliandaa chakula cha mchana na kula pamoja na wagonjwa katika hospitali hiyo kama njia ya kusherehekea nao sikukuu ya Pasaka.

Mkuu wa Idara ya Udhibiti na Tahadhari wa Benki ya Afrika Tanzania, Bi. Mwanahiba Mzee akiwaburudisha wagojwa katika hospitali ya CCBRT mjini Dar es Salaam Jumatatu wiki hii wakati Benki hiyo ilipoandaa chakula cha mchana na kula pamoja na wagonjwa na wafanyakazi katika hospitali hiyo kama njia ya kusherehekea nao sikukuu ya Pasaka.

Na Mwandishi wetu, Dar es Salaam

Taasisi na watu wenye uwezo wameshauriwa kuongeza juhudi na kujenga utamaduni wa kusaidia na kuwafariji watu wenye matatizo mbalimbali wakiwemo wagonjwa mahospitalini ili nao waweze kujisikia na kutambua kuwa jamii inawajali.

Hayo yalisemwa jijini Dar es Salaam na Mkuu wa Idara ya Udhibiti na Tahadhari (Head of Risk and Compliance) wa Benki ya Afrika Tanzania, Bi.Mwanahiba Mzee wakati wafanyakazi wa benki yake walipotayarisha chakula cha mchana kwa ajili ya kusherehekea sikukuu ya Pasaka na wagonjwa wa hospitali ya CCBRT Jumatatu wiki hii.

“Ningependa kuona taasisi na watu mbalimbali wanajenga utamaduni wa kusaidia wenye matatizo ili nao waweze kujisikia kuwa jamii inawajali,”alisema.

Alisema benki yao kila mwaka inaandaa chakula na kula na wagonjwa, waganga,wauguzi na wafanyakazi wa hospitali hiyo kama njia ya kutimiza azma hiyo.

“Hii ni njia ya kuwaletea faraja wagonjwa na hatimaye kuwasaidia kupata nafuu na kupona haraka,” alisema.

Benki hiyo pia ilitumia fursa hiyo kuwapatia zawadi ya vifaa vya shule watoto wanaopatiwa matibabu katika hospitali hiyo.

Alieleza kuwa benki yao imejenga utamaduni kila mwaka wa kutenga sehemu ya faida yake kwa ajili ya kushiriki katika shughuli za kijamii na  hospitali hiyo ni moja ya taasisi ambazo zipo katika utaratibu wao.

“Mbali ya kuandaa chakula na kula na wagonjwa pia benki inashiriki katika kuisaidia hospitali hiyo maswala mbalimbali ikiwemo vifaa,” alisema.

Katika tukio hilo wagonjwa waliburudishwa kwa michezo mbalimbali ikiwemo ya sarakasi ambayo iliwaburudisha hasa watoto ambao wanakosa michezo kutokana na matatizo waliyonayo.

Makamu Mkurugenzi wa hospitali, Bi. Brenda Msangi alisema benki hiyo ni moja ya taasisi ambazo zinashiriki kusaidia hospitali yao katika maswala mbalimbali.

“Benki hii ni mfano wa kuingwa...tunawashukuru sana,”alisema, Bi. Msangi.

Alitoa wito kwa taasisi mbalimbali zijenge utamaduni wa kushiriki katika kuisaidia hospitali hiyo ili iweze kutimiza majukumu yake kwa ufanisi.

Alisema kuwa hospitali hiyo ina changamoto mbalimbali na kuwa wanaohitaji matibabu ni wengi hivyo ikisaidiwa itaweza kutimiza majukumu yake zaidi ya hapo ilipofikia.

Naye Bi. Nyanzobe Goniho ambaye anamuuguza mtoto wake aliishukuru benki hiyo na kuomba wengine kufuata nyayo za taasisi hiyo ya fedha.

“Tunashukuru sana benki hii kwa kutujali,” alisema Bi. Goniho.

Mwisho