DART yalizishwa na zoezi la uandikishaji daladala

Ofisa msajili, Bi. Agnes Maeda(kushoto) akimsaidia kujaza fomu mmoja wa wa wamiliki wa mabasi ya Daladala Bw. Silas MlakiSiku katika zoezi la uandikishaji wa mabasi ya abiria kwa Wakala wa Mradi wa Mabasi Yaendayo Haraka (DART), ambao mabasi yao yanapita katika barabara ya Morogoro au kukatiza katika njia hiyo. Zoezi hilo la uandikishaji lilianza jumatatu kwenye ofisi za wakala Ubungo Plaza jijini Dar es Salaam.

Na Mwandishi wetu, Dar es Salaam

Siku tatu tangu kuanza kwa zoezi la uandikishaji wa mabasi ya abiria kwa Wakala wa Mradi wa Mabasi Yaendayo Haraka (DART), wamiliki wa vyombo hivyo vya usafiri wamendelea kujitokeza kwa wingi kama moja ya michakato ya kufanikisha awamu ya kwanza ya mradi huo.

Wamiliki wote wa mabasi hayo ya abiria maarufu kama daladala ambao mabasi yao yanapita katika barabara ya Morogoro au kukatiza katika njia hiyo walianza zoezi hilo katika ofisi za wakala huo Jumatatu wiki hii.

Mshauri Mwelekezi wa wakala huo, Bw. Felix Mlaki aliwaambia waandishi wa habari jijini Dar es Salaam jana kuwa zoezi hilo linalotarajia kuchukua siku 22 linaendelea vyema na kwamba wamiliki wa daladala wameendelea kujitokeza kwa wingi kujiandikisha.

“Zoezi zinaendelea vizuri na sisi tunawapongeza kwa mwitikio wao na tunazidi kuwaomba wale ambao bado hawajafika waendelee kuja kujiandikisha,”alisema Bw. Mlaki.

Alisema kuja kwao pia kunasaidia wakala wa mradi kupata maoni yao ambayo yatasaidia katika kuuwezesha mradi huo kufikia malengo yake.

Aliongeza kusema kuwa zoezi la kujiandikisha linafanyika bila malipo yoyote hivyo watu waendelee kushiriki katika zoezi hilo.

Alifafanua kuwa mradi huo ni mkubwa sana na ni wa kisasa hivyo wamiliki wa daladala hawana budi kutoa ushirikiano wao ili mwishoni mwa mwaka huu uweze kuanza kufanya kazi.

Aliwasistiza wenye daladala kuzidi kutumia muda uliopangwa vizuri katika kujiandikisha ili zoezi liweze kukamlika kwa muda uliopangwa.

Kwa sasa wakala huo uko kwenye mchakato wa kuwezesha upatikanaji wa watoa huduma kwenye mfumo mpya wa mabasi yaendayo haraka awamu ya kwanza ambayo inajumuisha barabara ya Morogoro, Kawawa na mtaa wa Msimbazi kwa njia kuu na nyingine za kiungo. 

Kulingana na mpango wa uendeshaji wa mfumo wa DART, barabara zinazohusika zitapaswa kutumiwa na mabasi ya mfumo huo pekee.

Jumla ya njia 64 zitakoma kutumika baada ya mradi huo kuanza.

Awali, wakala huo ulitangaza muda wa kujiandikisha kwa siku za Jumatatu hadi Ijumaa kuwa ni kuanzia saa tatu asubuhi mapaka saa 11 jioni na siku za Jumamosi na Jumapili ni kuanzia saa tatu asubuhi hadi saa nane na nusu mchana.

“Tunahitaji zoezi hili likamilike katika kipindi kilichopangwa ili mradi uanze kwa wakati,”alisema Bw. Mlaki.

Awamu ya kwanza ya mradi huo inahusisha barabara ya Morogoro, Kawawa na mtaa wa Msimbazi kwa njia kuu na njia za nyingine za kiungo.

Wakala wa DART ni chombo kilicho chini ya Ofisi ya Waziri Mkuu, Tawala za Mikoa na Serikali za Mitaa (TAMISEMI).

Mwisho