Alama, njia mpya zatarajiwa katikati ya jijini Dar mwezi huu

Na Mwandishi wetu, Dar es Salaam

Katika juhudi za kuimarisha hali ya usafiri na kupunguza msongamano, alama mpya za barabarani na mabadiliko ya njia yanategemewa katikati ya jiji la Dar es Salaam kuanzia mwishoni mwa mwezi huu.

Kuanzia tarehe 28 mwezi huu, uongozi wa jiji hilo utaanza kuondoa alama za zamani na kuweka mpya katika maeneo mbalimbali ya katikati ya jiji hilo.

Akielezea mabadiliko hayo jijini Dar es Salaam jana, Mstahiki Meya wa Manispaa ya Ilala, Bw. Jerry Silaa alisema mabadiliko hayo yanaendana na matakwa ya utaratibu mpya wa usafiri wa mabasi yaendayo haraka yanayotarajiwa kuanza mwishoni mwa mwaka huu.

“Patakuwa na mabadiliko ya njia na alama mpya ambavyo vitapaswa kufuatwa na kuheshimiwa na madereva wote wa magari na vifaa vingine vya moto,” aliwaambia waandishi wa habari jana.

Bw. Silaa alisema mbali na kuhakikisha utaratibu wa mabasi yaendayo haraka unatekelezeka ipasavyo na kwa ufanisi, mabadiliko hayo pia yanalenga kimsingi kupunguza msongamano katikati ya jiji.

Pia mabadiliko yanalenga kuongeza ufanisi wa ufanyaji kazi wa mabasi ya daladala na kutoa nafasi kwa baadhi ya eneo la barabara ya Morogoro kubakia kuwa kwa ajili ya mabasi yaendayo haraka na waenda kwa miguu tu.

“Watu wanatakiwa kufahamu mabadiliko haya hasa wanapoendesha magari kuja katikati ya jiji,” alisema.

Akielezea zaidi mabadiliko hayo, mwakilishi wa Halmashauri ya Ilala Kwenye Mradi wa Mabasi Yaendayo Haraka (BRT), Mhandisi Tigahwa Serapion alisema mabasi yote yanayopita barabara ya Kilwa yataishia Stesheni na kurudi kupitia njia hiyo hiyohiyo, huku yale yanayopita barabara ya Nyerere na Uhuru yataishia kituo cha Mnazi Mmoja na kurudi kupia njia zao.

Pia kutakuwa na mabasi yatakayoanzia Mnazi Mmoja kupitia njia ya Bibi Titi, Maktaba hadi kituo cha Posta ya zamani Benki ya NBC na kurudi kupitia njia hiyohiyo. 

Bw. Serapion alisema mabasi yote yanayopita barabara ya Ali Hassan Mwinyi kuelekea katikati ya jiji yataishia katika kituo cha YMCA barabara ya Upanga na kurudi kupitia njia hiyohiyo.

Alisema pia barabara ya Sokoine zitaruhusiwa gari binafsi kupita kuanzia Kituo cha Kati cha Polisi (Central Police) kuelekea Kivukoni, Hospitali ya Ocean Road hadi kwenda kuungana na barabara nyingine ikiwemo ya Ali Hassani Mwinyi.

Kwa upande wa barabara ya Samora, badala ya kwenda hadi Hosptali ya Ocen Road sasa gari ndogo binafsi zitaanzia katika hospitali hiyo kwenda Mnara wa Saa (Clock Tower).

Alisema njia zote za mabasi hayo ya daladala hazitakatiza katika barabara ya maradi wa BRT isipokuwa yale yanayotoka Mnazi Mmoja kwenda Posta ya Zamani.

Alisema alama zitawekwa kuonyesha njia hizo zitakavyokuwa na namna mabasi yanayotoka Mnazi Mmoja yatakavyoweza kukatiza katika barabara ya mradi huo wa mabasi.

Mwisho.