Maghembe asema tatizo la maji kuwa historia Karatu

Rais wa Jmahuri ya Muungano wa Tanzania DKT. Jakaya Mrisho Kikwete ( wa pili kulia) akisikiliza maelezo kutoka kwa mkurugenzi wa Mamlaka ya maji Mkoani Arusha ( AUWSA) mhandisi Ruth Koya wakati wa sherehe fupi za uzinduzi wa  hatua ya kwanza ya mradi wa upatikanaji wa maji safi na salama katika mji wa Karatu mkoani Arusha hivi karibuni, mwisho kulia ni Waziri wa maji Profesa Jumanne Maghembe, wengine katika picha ni mkuu wa mkoa wa Arusha Bw. Magesa Mulongo wa tatu kulia.

Rais wa Jamhuri ya Muungano wa Tanzania DKT. Jakaya Mrisho Kikwete (kulia) akimtwisha ndoo ya maji Joan Israel, muda mfupi mara baada ya kuzindua hatua ya kwanza ya mradi wa upatikanaji wa maji safi na salama katika mji wa Karatu mkoani Arusha hivi karibuni, anaeshuhudia ni Waziri wa maji Profesa Jumanne Maghembe.

Rais wa Jmahuri ya Muungano wa Tanzania DKT. Jakaya Mrisho Kikwete (kulia) akifurahia jambo na Waziri wa maji Profesa Jumanne Maghembe mara baada ya kufungua maji wakati wa sherehe fupi za uzinduzi wa  hatua ya kwanza ya mradi wa upatikanaji wa maji safi na salama katika mji wa Karatu mkoani Arusha hivi karibuni, katikati ni Mkurugenzi wa Mamlaka ya maji mkani Arusha ( AUWSA)  mhandisi Ruth Koya.

Na Mwandishi Wetu, Karatu.

Hatua ya kwanza ya mradi wa upatikanaji wa maji katika mji wa Karatu jijini Arusha umefikia asilimia 34, huku shilingi milioni 310 zikihitajika kukamilisha hatua hatua hiyo, ambapo mradi mzima ukitarajia kugharimu sh.mil 620.7.

Waziri wa maji Profesa Jumanne Maghembe aliyasema hayo Wilayani Karatu, jijini Arusha wakati alipokuwa akizungumza na mwandishi wa gazeti hili juu ya mpango wa ukamilishaji wa miradi ya maji katika baadhi ya maeneo ya miji midogo na mikubwa hapa nchini.

“Fedha hizo kwa ajili ya kukamilisha awamu ya kwanza ya mradi huo, tutazitoa kabla ya mwaka huu wa fedha haujaisha ili kumaliza awamu hiyo,” alisema Waziri wa maji.

Alisema kuanzia mwaka wa fedha unaokuja 2014 – 2015 wizara itahakikisha kwamba mradi unapanuliwa kufikia upande wote wa magharibi  wa mji huo.

Aliongeza kuwa hadi kufikia mwakani mwezi wa 4 mji wa Karatu na maeneo ya jirani hakutakuwa na shida ya maji kama mwaka 2013.

“ Nawahakikishia wananchi wa Karatu kuwa ifikapo mwaka 2015 mwezi kama huu hawatakuwa na upungufu wa maji tena” aliongeza.

Mji huo wenye wakazi 42, 000 unahitaji takribani lita 4,000, 000 kwa siku ambapo kwa sasa upatikanaji wa maji ni lita 850, 000 ambazo hazitoshelezi mahitaji ya wananchi wa mji huo.

Alisema baada ya kuchimbwa kwa visima viwili katika mji huo kutapunguza adha hiyo kwa kiasi kikubwa kwa wananchi wa Karatu.

Alisema uendelezaji wa awamu ya pili ya mradi huo ni kuongeza uchimbaji wa visima pamoja na kujenga matenki kwa ajili ya kuhifadhia maji katika maeneo ya Karatu magharibi na eneo la G. lambo.

“Katika awamu hii ya pili zaidi ya shilingi mil.700 zitahitajika ili kufanikisha kukamilisha awamu hii,” alisema.

Baadhi ya wakazi wa mji wa Karatu wamesifu hatua hiyo ya serikali kupitia wizara ya maji kuwa wananchi wa Karatu sasa watakua wamekombolewa katika adha kubwa iliyokuwepo awali.

“Hii ni kama neema kwetu kwa kweli serikali imetujali sana ,” alisema Joseph Macha.

Aliongeza kuwa kwa muda mrefu wamekuwa katika tabu, wakina mama walikuwa wakifuata maji umbali mrefu, hivyo kuzorotesha shughuli nyingine za kimaendeleo.

Nae Joan Israel alisema wakina mama wa Karatu sasa watakuwa na nafuu ya kuamka asubuhi kutafuta maji, kwani kilichofanywa na wizara ni kitendo kinachoonyesha kuwa serikali inawajali wananchi wake.

“ mimi niseme tu kwamba, Mungu awabariki hawa viongozi wetu, Rais Kikwete pamoja na waziri wa maji Jumanne Maghembe wamefanya kazi kubwa kuwaokoa kina mama wa Karatu,” alisema.

Mwisho.

Serikali yadhamiria kuboresha huduma kwa nchi jirani-Mwakyembe

Na Mwandishi wetu, Pwani

Serikali imesema imedhamiria kukabiliana kwa vitendo na changamoto ya kutotumia fursa na nafasi ya kijiografia ya nchi ya Tanzania na kuifanya kuwa shindani na hivyo kuleta maendeleo endelevu na ustawi wa jamii.

Waziri wa Uchukuzi, Dk. Harrison Mwakyembe amesema jana mkoani Pwani kuwa hakuna sababu inayoifanya Tanzania isiwe taifa shindani kibiashara katika ukanda huu wa Afrika kutokana na nafasi yake kijiografia miongoni mwa sababu nyingine.

Katika kuonyesha dhamira hiyo kivitendo, Waziri huyo anaongoza ujumbe wa maafisa mbalimbali wa serikali katika kukagua njia kuu toka jijini Dar es Salaam-Tunduma hadi katika mji wa Lubumbashi, Jamhuri ya Kidemokrasia ya Congo (DRC).

Barabara hiyo kuu ndiyo inayotumiwa na magari ya mizigo ya wafanyabiashara wa DRC toka bandari ya Dar es Salaam, hivyo kwa kukagua maeneo ya mizani, serikali inataka kuondoa kero zinazowakumba wafanyabiashara hao.

“Tanzania imebarikiwa kuzungukwa na nchi sita zisizo na bahari na tuna ukanda wa bahari wenye urefu zaidi ya kilometa 1500…lazima tutumie bahati hii kujiletea maendeleo,” aliwaambia waandishi wa habari mara baada ya kutembelea kituo cha kupimia magari cha Maili Moja, Kibaha, mkoani Pwani.

Ziara ya ujumbe huo ilianzia katika bandari ya Dar es Salaam ambapo Kaimu Mkurugenzi Mkuu wa Mamlaka ya Bandari Tanzania (TPA), Mhandisi Madeni Kipande ulitoa taarifa fupi kwa Waziri huyo kuhusiana na shughuli bandarini hapo.

Pia ujumbe ulitembelea Kitengo cha kupakia na kupakua kontena (TICS) bandarini hapo.  Maeneo mengine yaliyotembelewa ni pamoja na bandari za nchi kavu (ICDs) maeneo ya Kurasini ambapo Waziri alishuhudia msongamano mkubwa wa malori ya mizigo katika njia hiyo.

“Tunataka kubadilika, lazima tubadilike,” alisema Waziri Mwakyembe.

Ujumbe huo unaosafiri kwa barabara ili kupata taarifa za moja kwa moja toka kwa wahusika, unajumuisha pia Mwenyekiti wa Kamati ya Kudumu ya Bunge ya Miundombinu, Bw. Peter Serukamba pamoja na mjumbe wa kamati hiyo, Bi. Zarina Madabida.

Akiongea baada ya kukagua kituo cha mizani cha Mikese, Bw. Serukamba alisema wanataka kuangalia na kufahamu kila tatizo kwa kina ili hatimae ufumbuzi wa kudumu upatikane.

“Tuko katika ushindani mkubwa, lazima kama nchi tubadilike kwa haraka,” alisema Mwenyekiti huyo wa kamati.

Kwa upande wake, akitoa mfano wa kasoro zilizopo katika vituo vya kupima mizigo alisema bado muda unaotumika kushughulikia gari moja ni mrefu na hivyo kupunguza ufanisi.

Waziri Mwakyembe alisema kasoro hizo pamoja na nyingine zitapatiwa ufumbuzi hivi karibuni kutokana na mikakati iliyopo.

Ziara hiyo ya kikazi ya zaidi ya kilometa 2,000 itahitimishwa kwa kufunguliwa kwa ofisi ya TPA Alhamis wiki hii katika mji wa Lubumbashi ambayo ni moja ya mikakati ya kuongeza ufanisi wa bandari katika kuhudumia nchi jirani.

Pamoja na maafisa wengine, ujumbe huo unajumuisha pia maafisa waandamizi toka TPA na Mamlaka ya Usafiri wan chi kavu na Majini (SUMATRA).

Takwimu za hivi karibuni zinaonyesha kuwa shehena yote ya mizigo ya nchi 6 zitumiazo bandari ya Dar es salaam, (yaani Zambia, D R Congo, Burundi, Rwanda, Malawi na Uganda) imeongezeka kutoka tani millioni 3.55 mwaka 2011/12 hadi kufikia tani millioni 4.05 mwaka 2102/13, hiyo ikiwa ni ongezeko la asilimia 14.2.

Mwisho