Wanahisa kampuni ya uwekezaji TCCIA kukutana kesho

Na Mwandishi wetu, Dar es Salaam

Kampuni ya Uwekezaji ya TCCIA (TCCIA Investment Company Limited) imewataka wanahisa wake kushiriki Mkutano Mkuu wa tisa wa mwaka  kufanyika kesho kwenye Ukumbi wa Karimjee ambao utatoa fursa ya kujionea  maendeleo yaliyofikiwa na kujadili maswala mbalimbali ya kampuni.

Afisa Mkuu Mtendaji wa Kampuni hiyo, Bw. Donald Kamori, aliwaambia waandishi wa habari jijini Dar es Salaam jana kuwa mkutano huo ni muhimu sana kwa wanahisa wote na hivyo ni vizuri wakashiriki  na kupata fursa ya kujua maendeleo ya kampuni.

“ Mkutano huo utatanguliwa na semina ambayo inalenga kutoa elimu zaidi kwa wanahisa juu uwekezaji kwa njia ya hisa, faida na changamoto zake,” alisisitiza Bw.Kamori na kutoa wito kwa wanahisa kushiriki kwa wingi.

Alisema baada ya semina hiyo mkutano mkuu utafunguliwa na Mwenyekiti wa Bodi, Mhandisi Aloys Mwamanga kama ilivyo kawaida kwa  mikutano iliyotangulia tangu mwaka 2006.

Kwa mujibu wa Bw. Kamori, kufanyika kwa mkutano pia  utakidhi matakwa ya Sheria ya Msajili wa Makampuni  (BRELA) ya mwaka 2002 ambayo inataka kila kampuni iliyosajiliwa kufanya mkutano kila mwaka.

Alisisitiza kuwa wanahisa wanahitajika kushiriki mkutano huo kwa vile kampuni watawapa fursa ya  kupokea, kujadili na kuridhia taarifa mbalimbali zitakazowasilishwa mbele ya mkutano mkuu.