Ubunifu, ushindani muhimu kwa maendeleo nchini-TPSF

Mkurugenzi Mtendaji wa Taasisi ya Sekta Binafsi Tanzania (TPSF), Bw. Godfrey Simbeye akisisitiza jambo wakati wa semina ya mafunzo ya maswala ya ubunifu na ushindani wa biashara yanayoendeshwa na program ya Fanikiwa Kibiashara chini ya TPSF mjini Morogoro jana.  Wengine katika picha ni mmoja wa wawezeshaji, Mhandisi Peter Chisawillo (kushoto) na Meneja wa Programu ya BDG, Bw. Sosthenes Sambua (kulia)

Na Mwandishi wetu, Morogoro

Moyo na tabia ya ubunifu na ushindani vimetajwa kuwa vitu muhimu si tu kwa wafanyabiashara bali kwa mafanikio ya watu wote na maendeleo ya taifa kwa ujumla.

Wito huu umetolewa na Mkurugenzi Mtendaji wa Taasisi ya Sekta Binafsi Tanzania (TPSF), Bw. Godfrey Simbeye alipokua akizungumza katika semina ya mafunzo ya maswala ya ubunifu na ushindani wa biashara yanayoendeshwa na program ya Fanikiwa Kibiashara chini ya TPSF mjini Morogoro jana.

Bw. Simbeye alisema kwamba kama taifa linataka kupata maendeleo endelevu mambo hayo mawili yanatakiwa kutochukuliwa kama maswala ya wafanyabiashara pekee kwa kuwa kila mtu anatakiwa kuwa mbunifu na mshindani bila kuangalia anafanya kazi ya aina gani.

“Hata watendaji serikalini wanatakiwa kuwa wabunifu na washindani,” alisema na kuongeza kuwa hata dira ya taifa ya maendeleo inasisitiza maswala hayo ili kufikia mafanikio.

Alisema ni ubunifu na ushindani vitakavyoifanya Tanzania kutoka hapa ilipo na kuendelea zaidi na kusisitiza kwamba mataifa yenye nguvu za uchumi zinazingatia sana vitu hivyo viwili.

Alisema nia ya mafunzo hayo ni kuimarisha sekta binafsi Tanzania na kwamba TPSF inaamini kwamba sekta hiyo kwa kushirikiana na ile ya umma inaweza kuwa injini kubwa ya maendeleo ya uchumi hapa nchini.

Alifafanua kwamba program ya BDG ni moja ya iliyofanikiwa sana TPSF ikiwa imeshatoa mafunzo kwa wajasiriamali zaidi ya 8,000 nchi nzima katika miaka minne iliyopita.

Alisema ili kuhakikisha juhudi za BDG hazifi, tayari TPSF kwa kushirikiana na Baraza la Uwezeshaji Wananchi Kiuchumi na Tume ya Sayansi na Teknolojia wanabadili mradi huo kuwa taasisi ya kudumu itakayoitwa Tanzania Entrepreneurship and Competitive Centre (TECC).

“Taasisi hii imeshasajiliwa,” alisema.

Alishukuru serikali kupitia Ofisi ya Waziri Mkuu pamoja na serikali za Uingereza, Denmark na Sweden kwa utayari wao kusaidia kukua kwa sekta binafsi Tanzania.

“Tutahakikisha sekta binafsi Tanzania inakua yenye nguvu na shindani hata nje ya nchi,” alisema.

Kwa upande wake, mmoja wa wawezeshaji, Mhandisi Peter Chisawillo alisema kuna umuhimu wa kuwa na maono ya aina moja ili kufikia malengo ya maendeleo.

Alisema ni lazima watanzania kuwa washindani na wabunifu katika maisha yao ya kila siku ili kufanikiwa.

“Haya ni mambo yatakayofanya nchi yetu kupata maendeleo na kufanya nchi yetu kuwa na nguvu,” alisema na kuongeza kwamba takwimu mbalimbali zinaonyesha kuwa bado Tanzania iko nyuma katika maswala hayo ya ubunifu na ushindani, kitu alichosema kinatakiwa kufanyiwa kazi kwa haraka.

Mafunzo hayo ya wiki nzima yanahudhuriwa na wajasiriamali zaidi ya 40 na pia wawakilishi mbalimbali toka serikalini.

Mwisho.