JK atoa wito kwa taasisi za fedha kutoa mikopo kwa wakulima

Rais wa Jamhuri ya Muungano wa Tanzania 

Ndug; Jakaya Mrisho Kikwete

Na Mwandishi wetu, Dar es Salaam

Rais Jakaya Kikwete ametoa wito kwa taasisi za fedha nchini kutenga fedha kwa ajili ya kutoa mikopo kwa wakulima ili kilimo Tanzania na katika nchi za Afrika kiweze kuwa cha kisasa na kutoa mazao ya kutosha ya chakula na biashara.

Rais Kikwete alisema hayo jana jijini Dar es Salaam wakati akihutubia kongamano kubwa la kikanda la kilimo la muungano wa umoja wa vyama vya kilimo kusini mwa Afrika (SACAU) jana jijini Dar es Salaam.

“Taasisi za fedha hazina budi kuchukua jukumu hilo katika nchi zetu badala ya kutegemea tu serikali zetu,” alisema na kuongeza kuwa kwa kufanya hivyo kilimo kitapata msukumo mpya na kusaidia kuondoa umasikini.

Kongamano hilo lililoangalia kwa undani swala la jinsi ya kuhudumia kifedha kilimo cha Afrika lilitayarishwa na Baraza la Kilimo na Mifugo Tanzania (ACT) kwa kushirikiana na SACAU.

Alisema Kilimo ni uti wa mgongo kwa nchi za Afrika ikiwemo Tanzania hivyo kuna kila sababu ya kuhakikisha wakulima wadogo na wakubwa wanawezeshwa ili kupata zana za kisasa kama matrekta, pembejeo bora na madawa.

Alisitiza kuwa miundombinu ya umwagiliaji inatakiwa kujengwa ili kukabili mabadiliko ya tabia nchi badala ya kutegemea mvua ambazo siyo ya uhakika.

“Serikali ya Tanzania imejiwekea mkakati wa kukuza kilimo katika ukanda wa kusini mwa Tanzania (SAGCOT) kwa ajili ya kukuza kilimo kidogo na kikubwa,” aliongeza.

Ukanda huo wa kilimo unaundwa na mikoa ikiwemo ya Iringa, Ruvuma, Mbeya na Rukwa ambayo ni wazalishaji wakubwa wa mazao ya mahindi, mpunga na mazao mengine hapa Tanzania.

Alisema ukanda huo ukifanikiwa dhana hiyo itaenezwa katika kanda nyingine katika kuendeleza kilimo kama pamba na kahawa.

Naye Mwenyekiti wa bodi ya ACT, Bw. Salum Shamte alisema hakuna mbadala wa kilimo kama kweli Tanzania na Afrika inataka kweli kufikia maendeleo endelevu.

Alisema sekta ya kilimo ikipata mikopo ya muda mrefu na riba nafuu inaweza kuwa ya kisasa na kusaidia kupata chakula cha kutosha na kubadilisha maisha ya watu wa Afrika wakiwemo watanzania.

Mkurugenzi Mtendaji wa Miyombo Golden Resource Company, Bw. Freddy Swai aliyekua mmoja wa washiriki katika mkutano huo alisema shughuli za ufugaji nyuki ni moja ya kazi muhimu katika biashara lakini kinahitaji kuwezeshwa.

“Warina asali tunayo fursa nzuri ya kuendelea lakini tunashindwa kuendelea sababu hatuna uwezo wa kutosha,” alisema.

Washiriki zaidi ya 200 kutoka nchi 14 za kusini mwa Afrika pamoja na wawakilishi wa vyama vya wakulima kutoka maeneo mengine ya Afrika walishiriki kongamano hilo lilomalizika jana.

Pamoja na mambo mengine, mkutano huo uliangalia ushirikiano kati ya SADC/COMESA/EAC katika maswala ya kilimo.

Pia mkutano huo uliangalia makisio ya mahitaji ya bidhaa za kilimo duniani na kuona fursa na tishio lake kwa wakulima.

Pia washiriki hao walizungumzia kama mfumo wa kifedha uliopo sasa unaweza au hauwezi kuendeleza sekta ya kilimo katika siku zijazo.

Mwisho