Makandarasi nchini watakiwa kuungana

The registrar of Contractors Registration Board (CRB), Eng. Boniface Muhegi addressing participants of the CRB’s annual consultative meeting that started yesterday in Dar es Salaam.

Msajili wa bodi ya makandarasi nchini (CRB), Eng. Boniface Muhegi akihutubia mkutano mkuu wa majadiliano wa bodi hiyo ulioanza jana jijini Dar es Salaam

The registrar of Contractors Registration Board (CRB), Eng. Boniface Muhegi (centre) following up proceedings during the board’s annual consultative meeting that started yesterday in Dar es Salaam.  Others in the picture are the CRB board chairperson, Eng. Consolata Ngimbwa (right) and Tunduru Member of Parliament, Eng. Ram Makani.

Msajili wa bodi ya makandarasi nchini (CRB), Eng. Boniface Muhegi (katikati) akifuatilia jambo wakati wa mkutano mkuu wa majadiliano wa bodi hiyo ulioanza jana jijini Dar es Salaam.  Wengine katika picha ni Mwenyekiti wa bodi wa CRB, Eng. Consolata Ngimbwa (kulia) na mbunge wa jimbo la Tunduru, Eng. Ram Makani.

Na Mwandishi wetu, Dar es Salaam

Bodi ya Usajili wa Makandarasi nchini (CRB) imetoa wito kwa makandarasi nchini kuhakikisha kuwa wanaungana ili kujenga umoja na nguvu na kupata miradi mikubwa.

Wito huu umetolewa na Mwenyekiti wa bodi ya CRB, Eng. Consolata Ngimbwa alipokua akiongea wakati wa  mkutano mkuu wa mwaka wa  majadiliano wa bodi hiyo ulioanza jijini Dar es Salaam jana.

Alisema kuungana kutasaida makandarasi wa ndani kuwa na nguvu na pia kuweza kushindana na wale wa nje ambao wengi wao wana nguvu za mitaji, na utaalamu.

“Tuungane ili na sisi tuweze kupata sifa za kupata miradi mikubwa,” alisema.

Akifafanua zaidi alisema kuwa makandarasi wa madaraja ya juu washirikishe wale wa madaraja ya chini ili waweze kufanya kazi pamoja kwa faida yao wote na kwa faida ya taifa kwa ujumla.

“Makandarasi wa madaraja ya juu waruhusu ushirika na wale wa madaraja ya chini ili kuleta mafanikio zaidi,” alisema.

Akiongea awali, msajili wa Bodi hiyo injinia Boniface Muhegi alisema bodi hiyo imefanikisha mambo mengi tangu kuanzishwa kwake miaka 15 iliyopita.

Alisema kuwa sekta ya ujenzi Tanzania imepiga hatua kubwa kwani kulikuwa na makandarasi wapatao 1000 miaka 15 iliyopita kulinganisha na sasa ambapo kuna jumla ya makandarasi 7000.

Ametaja mafanikio mengine kuwa ni kuwa na ofisi za kanda katika mikoa minne ya Mbeya, Arusha, Mwanza na Dar es Salaam pamoja na kuongezeka kwa kazi zinazofanywa na makandarasi wazalendo toka asilimia tano mwaka 1998 hadi asilimia 40 leo huku asilimia 60 ya kazi bado zikifanywa na wageni.

“Pia pamekua na ongezeko la ubora na uwingi wa kazi za ukandarasi wa ujenzi,” alisema huku akitolea mfano ongezeko la minara ya mawasiliano ya simu za mkononi ambayo imetapakaa karibu nchi nzima, barabara na majengo ya kisasa.

“Pamoja na vikwazo mbalimbali, tumepiga hatua kubwa,” alisema.

Kwa upande wake, msajili msaidizi, Utafiti na Maendeleo wa bodi hiyo, Eng. Magesa Bairi alisema bodi itaendelea kuwezesha makandarasi nchini kwa njia ya mafunzo na pia kutunisha mfuko wa kusaidia makandarasi hapa nchini.

Eng. Magesa alisema kuwa pamoja na maendeleo hayo kuna changamoto ambazo zinawakabili kama kujenga uwezo wa wakandarasi wazalendo kwa viwango vinavyotakiwa, na pia kutofuata kanuni na sheria mbalimbali kwa upande wa makandarasi.

Mkutano huo wa siku mbili unalenga kuangalia hasa changamoto na mafanikio katika sekta ya ujenzi Tanzania ndani ya miaka kumi na tano iliyopita.

Mapendekezo ya mkutano huo yatapelekwa kwa wadau husika na baadae kufuatilia utekelezaji wake.

Takwimu zinaonyesha kwamba sekta ya ujenzi inachangia asilimia saba ya pato la taifa huku ukuaji wake kwa mwaka ikikadiliwa kuwa ni asilimia kumi na moja ikiwa ni sekta ya pili kwa kasi ya ukuaji huku sekta ya madini ikiongoza.

Asilimia sitini ya bajeti ya maendeleo nchini inakwenda kwenye sekta ya ujenzi huku asilimia themanini ya fedha hizo zikienda kwa wanachama wa bodi ya usajili wa mandarasi wa ujenzi.

Inatarajiwa kuwa kesho Waziri wa Ujenzi, Dkt. John Pombe Magufuli atazungumza na kushiriki mkutano huo.

Mwisho.

Bank of Africa Tanzania launch B-web Smart service

E-Banking Senior Manager with Bank of Africa Tanzania, Mr Cyprian Massawe  (centre) clarifies a point to journalists (not in a picture) on internet banking mobile function (B-web Smart) shortly after launch of the service in Dar es Salaam yesterday. Looking on left is the Bank’s Senior Manager, Mr Solomon Haule and right is the Head of Marketing, Ms. Beryl Oluga.

Meneja Mwandamizi wa maswala ya kiekroniki wa Bank of Africa Tanzania, Bwana Cyprian Massawe akifafanua jambo kwa waandishi wa habari mara baada ya uzinduzi wa mpango wa huduma kwa mitandao (B-Web Smart), jijini Dar es Salaam jana. Wengine, Kushoto ni Meneja Mwandamizi wa Masoko wa benki hiyo, Bwana Solomon Haule na kulia ni Bi. Beryl Oluga ambaye ni Mkuu wa Masoko wa benki

E-Banking Senior Manager with Bank of Africa Tanzania, Mr Cyprian Massawe  (right) shows  journalists (not in a picture) on how internet banking mobile function (B-web Smart) operates shortly after launch of the service in Dar es Salaam yesterday. looking on centre is the Bank’s Senior Manager, Mr Solomon Haule and left is the Head of Marketing, Ms. Beryl Oluga.

Meneja Mwandamizi wa maswala ya kiekroniki wa Bank of Africa Tanzania, Bwana Cyprian Massawe akiwaonyesha  waandishi wa habari  namna mpango wa huduma kwa mitandao (B-Web Smart) unavyofanya kazi  mara baada ya uzinduzi wake , jijini Dar es Salaam jana. Wengine, Katikati ni Meneja Mwandamizi wa Masoko wa benki hiyo, Bwana Solomon Haule na kushoto ni Bi. Beryl Oluga ambaye ni Mkuu wa Masoko wa benki

Suluhisho ucheleweshwaji vibali vya ujenzi mbioni kupatikana

The Tanzania Private Sector Foundation (TPSF) Executive Director, Mr. Godfrey Simbeye (left) speaking during a meeting yesterday in Dar es Salaam where a Private Sector Led Working Group on Construction Permits was established.  On the right is a Policy Analyst from TPSF, Mr. Adam Gahhu.

Mkurugenzi Mtendaji wa Taasisi ya Sekta Binafsi Tanzania (TPSF), Bw. Godfrey Simbeye (kushoto) akiongea wakati wa mkutano jana jijini Dar es laam ambapo kikosi kazi kinachoongozwa na sekta binafsi kushughulikia maswala ya vibali vya ujenzi kiliundwa.  Kulia ni mchambuzi wa sera toka TPSF, Bw. Adam Gahhu.

Na Mwandishi wetu, Dar es Salaam

Suluhisho la matatizo ya kupata vibali vya ujenzi kwa wakati unaotakiwa limepata nguvu zaidi baada ya kuundwa kwa kikosi kazi kwa upande wa sekta binafsi kushughulikia swala hilo.

Kikosi kazi hicho kilichoundwa na Taasisi ya Sekta Binafsi Tanzania (TPSF) kinataka kusaidia wawekezaji wa ndani, nje na wananchi wengine kwa ujumla kuweza kupata vibali vya ujenzi kwa wakati unaotakiwa na wenye tija pale wanapotaka kutekeleza miradi mbalimbali ya ujenzi hapa nchini.

Mkurugenzi Mtendaji wa TPSF, Bw. Godfrey Simbeye amesema wakati wa uzinduzi wa kikosi kazi hicho jana jijini Dar es Salaam kwamba hatua hiyo ni kuunga mkono mkakati maalum wa serikali za kuboresha mazingira ya uwekezaji hapa nchini.

“Vibali vya ujenzi ni moja ya vigezo vinavyozingatiwa kimataifa katika kutathmini mazingira ya uwekezaji,” alisema, na kuongeza kuwa sekta binafsi ina nafasi kubwa na muhimu katika kuboresha upatikanaji wa vibali hivyo.    

Bw. Simbeye alisema kwamba kikosi kazi hicho kitafanya kazi hiyo na kuainisha matatizo na kutoa mapendekezo ya kitaalamu ambayo baadae yatawasilishwa serikalini kwa utekelezaji.

“Katika kutekeleza hili, timu hii itafanya kazi pamoja na wadau mbalimbali toka sekta ya umma na binafsi,” alisema.

Upatikanaji wa vibali vya ujenzi ni moja ya mambo yanayoelezwa kuathiri mazingira ya uwekezaji hapa nchini kutokana na mchakato mgumu wa kuvipata.

Kwa mujibu wa ripoti ya Benki ya Dunia, Doing Business 2013, taratibu, muda na gharama zinazotakiwa kupata vibali vya ujenzi bado ni ngumu kwa hapa Tanzania na hivyo kuathiri mazingira ya uwekezaji.    

Kwa mujibu wa ripoti hiyo, mtu akitafuta vibali vinavyotakiwa ili aweze kutekeleza mradi wa ujenzi anatakiwa kupitia taratibu zipatazo 19, na siku 206.

Duniani, Tanzania ni ya 174 kati ya nchi 185 zilizofanyiwa utafiti duniani kuangalia urahisi wa kupata vibali vya ujenzi.

Kwa upande wake, Mwenyekiti wa kikosi kazi hicho, Bw. Clement Mworia alisema timu yake itafanya kazi na serikali kuhakikisha kuwa taratibu nzima za upatikanaji wa vibali vya ujenzi zinakua rahisi na zenye ufanisi.

“Tutafanya kazi na serikali na wadau wengine kuhakikisha kuwa mapendekezo yetu yanakua yenye nguvu na yanatoa suluhisho kwa changamoto hii,” alisema.

Nae msahuri wa kikosi kazi hicho toka Taasisi ya Uongozi na Maendeleo ya Ujasiriamali, Dkt. Donath Olomi alisema ucheleweshwaji kupatikana kwa vibali vya ujenzi kunaathiri swala zima la ajira na mapato ya serikali kwa kiwango kikubwa.

“Ni lazima changamoto hizi zifanyiwe kazi kwa haraka,” alisema.

Mwisho 

JK atoa wito kwa taasisi za fedha kutoa mikopo kwa wakulima

Rais wa Jamhuri ya Muungano wa Tanzania 

Ndug; Jakaya Mrisho Kikwete

Na Mwandishi wetu, Dar es Salaam

Rais Jakaya Kikwete ametoa wito kwa taasisi za fedha nchini kutenga fedha kwa ajili ya kutoa mikopo kwa wakulima ili kilimo Tanzania na katika nchi za Afrika kiweze kuwa cha kisasa na kutoa mazao ya kutosha ya chakula na biashara.

Rais Kikwete alisema hayo jana jijini Dar es Salaam wakati akihutubia kongamano kubwa la kikanda la kilimo la muungano wa umoja wa vyama vya kilimo kusini mwa Afrika (SACAU) jana jijini Dar es Salaam.

“Taasisi za fedha hazina budi kuchukua jukumu hilo katika nchi zetu badala ya kutegemea tu serikali zetu,” alisema na kuongeza kuwa kwa kufanya hivyo kilimo kitapata msukumo mpya na kusaidia kuondoa umasikini.

Kongamano hilo lililoangalia kwa undani swala la jinsi ya kuhudumia kifedha kilimo cha Afrika lilitayarishwa na Baraza la Kilimo na Mifugo Tanzania (ACT) kwa kushirikiana na SACAU.

Alisema Kilimo ni uti wa mgongo kwa nchi za Afrika ikiwemo Tanzania hivyo kuna kila sababu ya kuhakikisha wakulima wadogo na wakubwa wanawezeshwa ili kupata zana za kisasa kama matrekta, pembejeo bora na madawa.

Alisitiza kuwa miundombinu ya umwagiliaji inatakiwa kujengwa ili kukabili mabadiliko ya tabia nchi badala ya kutegemea mvua ambazo siyo ya uhakika.

“Serikali ya Tanzania imejiwekea mkakati wa kukuza kilimo katika ukanda wa kusini mwa Tanzania (SAGCOT) kwa ajili ya kukuza kilimo kidogo na kikubwa,” aliongeza.

Ukanda huo wa kilimo unaundwa na mikoa ikiwemo ya Iringa, Ruvuma, Mbeya na Rukwa ambayo ni wazalishaji wakubwa wa mazao ya mahindi, mpunga na mazao mengine hapa Tanzania.

Alisema ukanda huo ukifanikiwa dhana hiyo itaenezwa katika kanda nyingine katika kuendeleza kilimo kama pamba na kahawa.

Naye Mwenyekiti wa bodi ya ACT, Bw. Salum Shamte alisema hakuna mbadala wa kilimo kama kweli Tanzania na Afrika inataka kweli kufikia maendeleo endelevu.

Alisema sekta ya kilimo ikipata mikopo ya muda mrefu na riba nafuu inaweza kuwa ya kisasa na kusaidia kupata chakula cha kutosha na kubadilisha maisha ya watu wa Afrika wakiwemo watanzania.

Mkurugenzi Mtendaji wa Miyombo Golden Resource Company, Bw. Freddy Swai aliyekua mmoja wa washiriki katika mkutano huo alisema shughuli za ufugaji nyuki ni moja ya kazi muhimu katika biashara lakini kinahitaji kuwezeshwa.

“Warina asali tunayo fursa nzuri ya kuendelea lakini tunashindwa kuendelea sababu hatuna uwezo wa kutosha,” alisema.

Washiriki zaidi ya 200 kutoka nchi 14 za kusini mwa Afrika pamoja na wawakilishi wa vyama vya wakulima kutoka maeneo mengine ya Afrika walishiriki kongamano hilo lilomalizika jana.

Pamoja na mambo mengine, mkutano huo uliangalia ushirikiano kati ya SADC/COMESA/EAC katika maswala ya kilimo.

Pia mkutano huo uliangalia makisio ya mahitaji ya bidhaa za kilimo duniani na kuona fursa na tishio lake kwa wakulima.

Pia washiriki hao walizungumzia kama mfumo wa kifedha uliopo sasa unaweza au hauwezi kuendeleza sekta ya kilimo katika siku zijazo.

Mwisho

Ole Naiko ateuliwa balozi wa heshima wa Botswana nchini Tanzania

Na Mwandishi wetu, Dar es Salaam

Mtumishi wa muda mrefu serikalini na mtaalamu anayetambulika kitaifa na kimataifa wa maswala ya uwekezaji, Emmanuel Ole Naiko ameteuliwa kuwa balozi wa heshima wa Botswana nchini Tanzania atakaekua na makao yake jijini Dar es Salaam.

Akitangazwa na waziri wa Mambo ya Nje na Ushirikiano wa Kimataifa, Bw. Bernard Membe jana jijini Dar es Salaam, Bw. Naiko aliishukuru serikali ya Botswana chini ya uongozi wa Rais Ian Khama na Waziri wa mambo ya nje na mahusiano ya kimataifa Bw. Phandu T.C Skelemani kwa kumteua kuwa mwakilishi wao hapa Tanzania.

“Naamini ni Mwenyezi Mungu aliyewaongoza na mimi napenda kuwahakikishia kwamba sinta waangusha. Nitawawakilisha kwa ukamilifu wote ulio ndani ya uwezo wangu,” alisema Bw. Naiko.

Bw. Naiko alimshukuru waziri Membe kwa kukubali kumkabidhi dhamana hiyo kubwa.

“Wewe ni ndugu na rafiki yangu wa muda mrefu naamini uliona ni vyema ukanipa heshima hii wewe mwenyewe,” alisema.

Alisema Botswana ina vivutio vingi vya uwekezaji kama Tanzania na kuwa Watanzania na jumuiya ya Afrika Mashariki wanakaribishwa kuwekeza katika nchi hiyo.

“Nadhani wakati umefika Botswana nayo kupata wawekezaji kutoka Tanzania kama wao walivyowekeza Mlimani City,” alisema.

Nchi ya Botswana imepakana na nchi za Afrika ya Kusini, Zimbabwe, Namibia na Zambia. Ina ukubwa wa Sq km 58,2000, wakazi Milioni 2.

Ni nchi iliyo na amani na utulivu toka uhuru na ina kiwango kidogo sana cha rushwa barani Afrika.

Nchi hiyo imedhamiria kuongoza katika sekta za fedha, madini hasa Uranium, shaba na usafirishaji wa almasi, na Copper na pia kuendeleza uwekezaji katika sekta ya utalii kwani Botswana ina mbuga nyingi za wanyama na hasa Vistoria Falls ambayo iko mpakani na Zimbabwe na Zambia katika mji wa Kasane.

Bw. Naiko alisema ni vyema Tanzania nayo ikaanzisha ubalozi wa heshiama Botswana kwani kuna watanzania kati ya 2000 – 4000 ambao wanafanya kazi katika sekta za teknolojia, vyuo vikuu, afya ma makampuni binafsi.

“Watanzania walioko huko wameanzisha chama chao na mimi nilikutana nao niliopokuwa TIC,” alisema.

Kodi ya mapato katika nchi hiyo ni asilimia 22; VAT ni asilimia 12 na pia kuna msamaha wa kodi kwa wawekezaji ni kati ya miaka mitano mpaka 10.

Mwisho

Kusini Pemba wapewa somo kuhusu majadiliano kwa manufaa ya wote

Na Mwandishi Wetu ,Pemba

Mkuu wa Mkoa wa Kusini Pemba Bw. Juma Kasim Tindwa amewataka wananchi wa kisiwani humo kuwa wabunifu katika shughuli zao za kila siku ili kuweza kubadilisha hali ya maisha ya sasa waliyonayo na kuweza kuingia katika ushindani wa kimaendeleo.

Alitoa kauli hiyo Kiswani pemba jana wakati akifungua majadiliano ya ushirikiano kwa manufaa ya wote (smart partnership dialogue) ikiwa ni mwendelezo wa majadiliano yanayofanyika katika kanda mbalimbali hapa nchini.

“Watu wa kisiwani pemba lazima tubadilike kwa sasa, tuondoe ule uzamani tulionao, majadiliano haya yanamaana kubwa sana kwetu, ni lazima tuzingatie yale yatakayozungumzwa na watoa mada ili tukitoka hapa tuwe na mtazamo tofauti katika katika vichwa vyetu” alisema Bw. Juma Kasim.

Alisisitiza kuwa kutokana na kauli mbiu ya majadiliano haya kuwa ni matumizi ya teknolojia katika kuleta maendeleo endelevu, nilazima watu wabadilike kwa kila nukta ya kazi zao wanazofanya, waweke ubunifu zaidi ya kukaa na kushikilia yale ya zamani.

“Ndugu zangu kauli mbiu hii sio ya kitoto hata kidogo (matumizi ya teknolojia katika kuleta maendeleo endelevu ya kijamii na kiuchumi barani afrika kwa nja shirikishi) lazima tushirikiane kwa manufaa ya wote ili kufikia malengo yetu na kuinua uchumi wa Zanzibar na Tanzania kwa ujumla”, alisisitiza Mkuu wa Mkoa kusini Pemba.

Aliongea kuwa maendeleo hayaji kwa kukwamishana bali kwa kusaidiana na kushirikiana, hivyo dhana ya ushirikiano kwa manufaa ya wote ni dhana shirikishi kwa kila mmoja wetu aliyepo hapa.

“Jirani yako akifanikiwa basi sisi sote tumefanikiwa, huu ni mtaji mkubwa sana katika kuleta maendeleo katika dunia ya leo haiwezekani wewe ufanikiwe na jirani yako anaishi katika dimbwi la umasikini, katika zama hizi tuyazike mawazo hayo tushirikiane”,alisisitiza.

Alisema Baraza la Biashara la Zanzibar (zbc) liko bega kwa bega na Baraza la Taifa la Biashara katika kuhakikisha majadiliano haya yanaleta tija na nguvu ya pamoja katika kuleta maendeleo ya wananchi wa Tanzania Bara na Tanania Visiwani.

“Baraza la Biashara la Zanzibar limekuwa mstari wa mbele kuteeleza yale yote yanayolenga katika kuleta maendeleo ya nchi kwa pande zote mbili na ndio mana tumekuwa na mawasiliano ya karibu katika kila hatua na kuhakikisha serikali inasonga mbele katika mipango yake”, aliongeza Juma Kasim Tindwa.

Lazima tuheshimu kauli ya kiongozi wetu Rais Jakaya Mrisho Kikwete, yeye ndio alizindua majadiliaano haya tarehe 28 mei mwaka 2013 na ndio chanzo cha majadiliano haya ya nchi nzima kufanyika sasa na yatakuwa ni mwendelezo katika kila mwaka.

“Ndugu zangu majadiliano haya yatakuwa endelevu na kila mwaka tutakuwa tunaulizana wapi tumefikia katika yale tulioyajadili katika mikutano yetu iliyotangulia, ni lazima kila mtu atimize wajibu wake ipasavyo kwa yale aliyopangiwa” alisema.

Aidha aliwataka wakazi wa mkoa wa kusini Pemba na maeneo yote kisiwani humo kuwa na mtazamo hasi katika kuleta mabadiliko ya kiuchumi na kijamii, nah ii ni kuacha tofauti zao za kimawazo na kimtazamo katika yale wanayoyatekeleza kila siku wawapo katioka majukumu yao ya kawaida.

Kwa upande wake Mkuu wa Fedha na Utawala wa Baraza la Taifa la Biashara (TNBC), Bi. Oliva Vegulla alisifu ushiriki na michango mbalilimbali kutoka kwa washiriki wote katika mkutano huo.

“Ushiriki umekuwa mzuri na ni matarajio yetu kuwa mambo mengi yalijadiliwa hapa yataingizwa kwenye mkutano wa kitaifa utakaofanyika mapema mwezi ujao,” Bi. Vegulla alisema.

TNBC ndiyo waliopewa dhamana ya kuratibu majadiliano hayo ya kikanda  nay a kitaifa pia.

Majadiliano ya ushirikiano kwa manufaa ya wote (smart partnership dialogue) hutoa fursa kwa viongozi wa serikali katika ngazi husika na kukutana na jumuiya mbalimbali za wananchi kujadili ili kupata mawazo kutoka ngazi ya chini kwenda juu na wala sio viongozi kutoa maagizo kutoka juu kwenda chini.

 mwisho

Lukuvi ahamasisha Nyanda ya Juu Kusini kutumia sayansi na teknolojia

Na Mwandishi wetu, Iringa

Wananchi wa Kanda ya Nyanda ya Juu Kusini wameaswa kutumia sayansi na teknolojia katika kilimo ili kuchochea uzalishaji katika kanda hiyo ambayo ni moja ya kanda inayotegemewa zaidi nchini katika uzalishaji mazao ya kilimo.

Waziri wa Nchi Ofisi ya Waziri Mkuu Uratibu na Bunge, Bw. William Lukivi, amewataka wananchi wa nyanda ya juu kusini kujikita zaidi kwenye technolojia ilikuongeza thamani ya mazao yao yanayotokana na kilimo.

 Akifungua mkutano wa Kanda hiyo wa  Majadiliano ya Ushirikiano kwa Manufaa ya wote (Smart Partnership Dialogue) unaoratibiwa na Baraza la Biashara la Taifa (TNBC)  na yaliyoshirikisha makundi mbalimbali katika jamii, mjini hapa mwisho mwa wiki, Bwana Lukuvi aliwataka wananchi kubadilika kimtazamo ilikufikia maendeleo ya kweli.


"Majadiliano haya yamekuja wakati mwafaka sababu tunataka wananchi watoe maoni yao juu ya matumizi ya sayansi na teknolojia katika shughuli za uzalishaji,"na hii itasaidia sana kuongoza katika uzalishaji wa mazao ya kilimo.

Alisema matumizi ya sayansi na teknolojia ni mambo ambayo baada ya kupata maoni ya wananchi yataingizwa katika mikakati ya kitaifa ili yazidi kutekelezwa na kuleta msukumo mpya.

Alisema sekta zote za uzalishaji ziwemo za kilimo, ufugaji na na sekta nyingine mkoani humo zinahitajika kutumia sayansi na teknolojia kuanzia upandaji,uvunaji na upataji wa masoko.

Naye Mkuu wa Mkoa wa Mbeya Bw. Abbas Kandoro alisema mkoa wake unazalisha mazao ya Mpunga na matunda mbalimbali hivyo sayansi na teknolojia itumike kuanzia mbegu bora,zana za kisasa,miundombinu ya umwgiliaji na upataji wa masoko ili kuongeza vipato vyao.

"Tunategemea majadiliano haya yataibua hisia za makundi ya wananchi kuwa tunataka teknolojia itusaidie kuleta maendeleona pia kuitumia kwa ajili ya kusindika mazao,” alisema Bwana Kandoro.

Alisema pia katika kuendeleza sayansi na teknolijia ni lazima Shirika la Viwanda Vidogo vidogo (SIDO) na Mamlaka ya Elimu ya Ufundi Stadi (VETA) viwe ni sehemu ya kuzalisha zana dogondogo katika kilimo ili kuchochea uzalishaji.

Alisema bila kuendeleza sayansi na teknolojia kupitia taasisi hizo nchi haitaweza kupiga hatua na itakuwa ni kazi bure katika kukuza sayansi hiyo na teknolojia.

Katibu Mtendaji wa TNBC,Raymond Mbilinyi alisema majadiliano hayo katika kanda hiyo yanalenga kupata maoni kutoka kwa makundi ya wananchi ili yaweze kupelekwa katika mkutano wa kitaifa na kuingizwa katika mikakati ya serikali.

"Mwaka huu kutokana na muda kuwa mfupi tumeamua kufanya majadiliano ya kikanda ili kuwahi mkutano wa kitaifa wa tarehe moja na mbili, Juni 2013 na ule wa kimataifa utakao fanyika Tarehe 28 Juni hadi tarehe moja Julai 2013,"

Alisema mwaka ujao na inayokuja majadiliano hayo yatafanyika kuanzia ngazi ya wilaya na mikoa kisha kanda na taifa.

Alisema kwa sasa TNBC inaendelea na mikatiti yake ya kuboresha Mabaraza ya Wilaya na Mikoa yaweze kufanya kazi zake katika kukuza biashara kwa kushirikiana na sekta binafsi.

kwa upande wake Mkuu wa Mkoa wa Iringa, Dkt. Christine Ishengoma ambaye pia ni Mbunge wa Viti Maalumu CCM alisema mkoa wake una fursa za kilimo na utalii katika Mto Luaha ambapo sayansi na teknolojia ikitumika itsaidia kukuza mapato ya wanachi.

"Katika kuendeleza sayansi na teknolojia hapa nchini lazima kuwe na utarajibu wa kuwatambua wabunifu kwa kuwapatia tuzo na kuwaendeleza,".

Majadiliano ya Nyanda za Juu Kusini yalishirkisha makundi ya wananchi kutoka Mikoa ya Njombe, Mbeya na Iringa lengo la kitaifa kufikia uchumi wa kati ifikapo mwa 2020/25.ni kufikia uchumi wa kati mwaka 2020/25.

mwisho.

Mfumo wa kongano bunifu suluhisho la maendeleo Tanzania, Afrika

Meneja wa Programu ya Fanikiwa Kibiashara (BDG) Bw. Sosthenes Sambua (katikati) akiongea na Mhandisi Peter Chisawillo (kulia) na mkuu wa wilaya ya Nkasi, Bw. Iddi Kimanta (kushoto) wakati wa mafunzo ya kuwezesha kongano mbalimbali hapa nchini kujenga ubunifu na ushindani mjini Morogoro jana.  Mafunzo hayo yanaendeshwa na Scandnavian Institute for Competitiveness and Development (SICD), Pan African Competitiveness Forum (PACF) na BDG, programu iliyo chini ya Taasisi ya Sekta Binafsi Tanzania (TPSF).

Na Mwandishi wetu, Morogoro

Mfumo wa kongano bunifu umetajwa kama mkombozi utakaoleta maendeleo endelevu Tanzania kama utazingatiwa na wadau mbalimbali hapa nchini.

Kauli hiyo imetolewa na Meneja wa Programu ya Fanikiwa Kibiashara (BDG) ambayo inafanya kazi chini ya Taasisi ya Sekta Binafsi Tanzania (TPSF), Bw. Sosthenes Sambua wakati wa mafunzo ya kuwezesha kongano mbalimbali hapa nchini kujenga ubunifu na ushindani mjini Morogoro jana.

Mafunzo hayo ya siku nne yanayoendelea mjini Morogoro yanaendeshwa na Scandnavian Institute for Competitiveness and Development (SICD) pamoja na Pan African Competitiveness Forum (PACF) kwa kushirikiana na BDG, program inayoendeshwa chini ya Taasisi ya Sekta Binafsi Tanzania (TPSF).

Kongano ni mkusanyiko wa makampuni au vikundi vya kiuchumi kuwa pamoja katika eneo moja la kijiografia, vikishirikiana au kushabihiana katika kitu maalum na zikiwa na mahusiano ya karibu na ushirikiano ambao unasaidia kujenga ushindani wao kwa pamoja.

Bw. Sambua ambaye alikua mmoja wa wakufunzi katika mafunzo hayo amewaambia waandishi wa habari kuwa mfumo wa kongano una nafasi kubwa ya kuleta hali bora ya maisha kwa watanzania kwa kuwa unashirikisha nguzo tatu muhimu katika uundwaji wake ambazo ni serikali, wanataaluma au watafiti na wazalishaji katika jamii husika.

Alisema ni katika ushirikiano huo ambapo kongano huja na ubunifu na njia mpya za uzalishaji na kujenga ushindani sit u wa ndani bali pia nje ya nchi na hivyo kuleta maendeleo.

“Nchi nyingi zimefanikiwa kupitia mfumo huu…ni muhimu na sisi tukaupa uzito unaotakiwa,” alisema.

Akitoa mfano wa mataifa mengine alisema nchi kama Sweden, Ujerumani, Italia, Hispania, na Uholanzi zimekua zikitumia mfumo huu wa kongano kwa zaidi ya miaka 20 na kuwa bado wanaendelea kuwekeza katika mfumo huo maana wameona kuwa una manufaa makubwa kiuchumi na kijamii.

Alisema jumuia ya ulaya imetenga pesa kiasi cha Euro 200 bilioni kwa ajili ya nchi wanachama kuomba ruzuku kwa ajili ya kuendeleza kongano bunifu katika nchi zao.

Alitaja nchi nyingine zilizofanikiwa katika mfumo huu wa kongano kama Pakistan, Bolivia, Marekani, India, Canada na Brazil.

Alisema kuwa rasilimali, mawazo na mbinu tofauti havitoshi kuifanya nchi kufikia malengo ya maendeleo bali kinachotakiwa zaidi ya hapo ni ushirikiano wa karibu wa serikali, wataalamu au watafiti pamoja na wazalishaji.

Alitoa wito kwa serikali kuzingatia mifumo bora inayoweza kuleta tija zaidi kama ya kongano ili raslimali zilizopo Tanzania ziweze kuwa na faida zaidi.

“Wanataaluma pia hapa nchini wanatakiwa kufanya tafiti zitakazoimarisha mfumo huu wa kongano maana umeonyesha kuzaa matunda,” alisema.

Alitoa wito kwa wazalishaji kujitahidi kuwa wabunifu na kualika taasisi za utafiti katika kongano zao ili kazi zao ziweze kuboreshwa na kupatiwa ushauri zaidi wa kitaalamu.

Wakizungumza kwa nyakati tofauti, baadhi ya washiriki katika mafunzo hayo walitoa shukrani kwa waandaaji wa mafunzo hayo na kuahidi kufanyia kazi ujuzi watakaopata kuimarisha kongano zao.

Bw. Godfrey Nyembele anaetoka katika kongano linalijishughulisha na usindikaji wa mafuta ya alizeti wilayani Ileje mkoani Mbeya alisema ataenda kuhamasisha wenzake kuhusiana na njia bora za kuondokana na umaskini baada ya mafunzo hayo.

Bw. Ramadhani Sigareti anaetoka katika kongano linalojishughulisha na kilimo cha mboga na matunda mkoani Dodoma alisema anategemea kuwajengea uwezo wenzake mara tu baada ya mafunzo hayo.

Mafunzo hayo yanayoendelea hadi ijumaa hii yanashirikisha zaidi ya washiriki 60 toka maeneo mbalimbali nchini.

PACF inayojitahidi kupigana na umaskini na kufikia maendeleo ya kijamii na kiuchumi kupitia mfumo huu wa kongano inafanya kazi katika kanda zote za bara la Afrika na kwa sasa sekretarieti yake inaendeshwa nchini Tanzania katika Tume ya Sayansi na Teknolojia Tanzania (COSTECH).

Mwisho 

Ubunifu, ushindani muhimu kwa maendeleo nchini-TPSF

Mkurugenzi Mtendaji wa Taasisi ya Sekta Binafsi Tanzania (TPSF), Bw. Godfrey Simbeye akisisitiza jambo wakati wa semina ya mafunzo ya maswala ya ubunifu na ushindani wa biashara yanayoendeshwa na program ya Fanikiwa Kibiashara chini ya TPSF mjini Morogoro jana.  Wengine katika picha ni mmoja wa wawezeshaji, Mhandisi Peter Chisawillo (kushoto) na Meneja wa Programu ya BDG, Bw. Sosthenes Sambua (kulia)

Na Mwandishi wetu, Morogoro

Moyo na tabia ya ubunifu na ushindani vimetajwa kuwa vitu muhimu si tu kwa wafanyabiashara bali kwa mafanikio ya watu wote na maendeleo ya taifa kwa ujumla.

Wito huu umetolewa na Mkurugenzi Mtendaji wa Taasisi ya Sekta Binafsi Tanzania (TPSF), Bw. Godfrey Simbeye alipokua akizungumza katika semina ya mafunzo ya maswala ya ubunifu na ushindani wa biashara yanayoendeshwa na program ya Fanikiwa Kibiashara chini ya TPSF mjini Morogoro jana.

Bw. Simbeye alisema kwamba kama taifa linataka kupata maendeleo endelevu mambo hayo mawili yanatakiwa kutochukuliwa kama maswala ya wafanyabiashara pekee kwa kuwa kila mtu anatakiwa kuwa mbunifu na mshindani bila kuangalia anafanya kazi ya aina gani.

“Hata watendaji serikalini wanatakiwa kuwa wabunifu na washindani,” alisema na kuongeza kuwa hata dira ya taifa ya maendeleo inasisitiza maswala hayo ili kufikia mafanikio.

Alisema ni ubunifu na ushindani vitakavyoifanya Tanzania kutoka hapa ilipo na kuendelea zaidi na kusisitiza kwamba mataifa yenye nguvu za uchumi zinazingatia sana vitu hivyo viwili.

Alisema nia ya mafunzo hayo ni kuimarisha sekta binafsi Tanzania na kwamba TPSF inaamini kwamba sekta hiyo kwa kushirikiana na ile ya umma inaweza kuwa injini kubwa ya maendeleo ya uchumi hapa nchini.

Alifafanua kwamba program ya BDG ni moja ya iliyofanikiwa sana TPSF ikiwa imeshatoa mafunzo kwa wajasiriamali zaidi ya 8,000 nchi nzima katika miaka minne iliyopita.

Alisema ili kuhakikisha juhudi za BDG hazifi, tayari TPSF kwa kushirikiana na Baraza la Uwezeshaji Wananchi Kiuchumi na Tume ya Sayansi na Teknolojia wanabadili mradi huo kuwa taasisi ya kudumu itakayoitwa Tanzania Entrepreneurship and Competitive Centre (TECC).

“Taasisi hii imeshasajiliwa,” alisema.

Alishukuru serikali kupitia Ofisi ya Waziri Mkuu pamoja na serikali za Uingereza, Denmark na Sweden kwa utayari wao kusaidia kukua kwa sekta binafsi Tanzania.

“Tutahakikisha sekta binafsi Tanzania inakua yenye nguvu na shindani hata nje ya nchi,” alisema.

Kwa upande wake, mmoja wa wawezeshaji, Mhandisi Peter Chisawillo alisema kuna umuhimu wa kuwa na maono ya aina moja ili kufikia malengo ya maendeleo.

Alisema ni lazima watanzania kuwa washindani na wabunifu katika maisha yao ya kila siku ili kufanikiwa.

“Haya ni mambo yatakayofanya nchi yetu kupata maendeleo na kufanya nchi yetu kuwa na nguvu,” alisema na kuongeza kwamba takwimu mbalimbali zinaonyesha kuwa bado Tanzania iko nyuma katika maswala hayo ya ubunifu na ushindani, kitu alichosema kinatakiwa kufanyiwa kazi kwa haraka.

Mafunzo hayo ya wiki nzima yanahudhuriwa na wajasiriamali zaidi ya 40 na pia wawakilishi mbalimbali toka serikalini.

Mwisho.

Kampuni kubwa nchini zatajwa kuwa muhimu katika kuimarisha sekta binafsi

Na Mwandishi wetu, Dar es Salaam

Muda wa kuunganisha nguvu na kuwa sauti moja ya sekta binafsi ili kuleta maendeleo endelevu ya kiuchumi na kijamii ni sasa.

Akiongea kwa niaba ya Mwenyekiti wa taasisi ya sekta binafsi Tanzania, Bw. Arnold Kileo amesema ni muda muafaka sasa kwa sekta binafsi kuungana na kuwa na sauti moja hasa katika kipindi hiki ambapo panagundulika raslimali nyingi hapa nchini.

Bw. Kileo ambae pia ni mjumbe wa bodi ya TPSF alisema hayo katika kikao kilichofanyika jijini Dar es Salaam mwishoni mwa wiki na kujadili jinsi ya kutekeleza maoni ya kuunda bodi mpya ya TPSF chini ya mfumo wa kongano pamoja na kuangalia jinsi ya kuchagua wawakilishi katika bodi hiyo.

Kikao hicho kilihusisha wadau toka makampuni makubwa nchini ambayo pia yatakua na uwakilishi katika bodi hiyo mpya.

Bw. Kileo alisema kuhusishwa kikamilifu kwa sekta binafsi katika maendeleo ya nchi kwa sasa ni muhimu sana hasa kipindi hiki ambapo watu wengi wanaangalia raslimali za Tanzania kwa karibu wakitaka kuzichuma na kuondoka zao.

“Lazima tuhakikishe kuwa raslimali za nchi zinafaidisha nchi na watu wake kwa utaratibu unaokubalika huku pia wawekezaji wakifaidika kulingana na makubaliano yanayoeleweka,” alisema.

Aliongeza kuwa sekta binafsi ina nafasi nzuri na kubwa kuishauri serikali jinsi bora ya kufanya nchi ifaidike na raslimali za madini, gesi na mafuta ambazo zinaendelea kugundulika kwa wingi hapa nchini.

Kwa upande wake, Mkurugenzi Mtendaji wa TPSF, Bw. Godfrey Simbeye alisema utaratibu mpya wa kongano unataka kuhakikisha kuwa sekta binafsi inakua yenye nguvu na kutoa mchango mkubwa zaidi katika maendeleo.

Alisema kuhusisha kampuni kubwa kubwa katika mfumo huu mpya ni muhimu sana kwa kuwa kampuni hizo zina mchango mkubwa katika maendeleo ya sekta binafsi na nchi kwa ujumla.

“Ni lazima kampuni hizi ziwe na uwakilishi katika mfumo huu mpya wa uongozi,” alisema Bw. Simbeye.

Kwa mujibu wa mfumo huo mpya, wajumbe watapatikana katika kongano kumi. 

Kongano hizo ni pamoja na kilimo, uzalishaji, sekta ya madini, viwanda na nishati, utalii na maliasili, benki na huduma za kifedha, huduma, biashara, sekta binafsi za Zanzibar, vyama vya biashara mikoani na wajasiriamali wanawake.

Hata hivyo makongano haya yanaweza kubadilika kadiri uchumi wa nchi unavyobadilika.

Kwa mujibu wa mapendekezo, wawakilishi wa makongano haya kumi ndio wataunda bodi ya TPSF, nafasi moja ikiwekwa kwa Mwenyekiti anaemaliza muda wake.

Kwa mujibu wa mapendekezo hayo, makundi maalum kama wanawake, vijana na walemavu watapewa upendeleo maalum katika muundo mpya wa TPSF.

Mwisho