Wajasiriamali Mbeya washuriwa kuwa wabunifu zaidi

Na Mwandishi wetu, Mbeya

Wajasiriamali wa Mkoa wa Mbeya wameshauriwa kuwa wabunifu katika biashara zao ili kuwaongezea vipato vya kutosha na kutoa ajira kwa watanzania.

Akifungua Mafunzo ya wiki moja ya wajasiriamali hao, Mkuu wa Mkoa wa Mbeya, Bw. Abbas Kandoro aliwataka kujenga tabia hiyo katika biashara zao.

“Ubunifu katika biashara ni jambo la msingi sana, ni lazima lizingatiwe,” alisema na kuongeza kuwa katika kufanikisha hilo wanatakiwa kuondoa uoga wa kuthubutu kufanya ubunifu.

Alisema wajasiriamali hao wanatakiwa kuyatumia vizuri mafunzo hayo wanayopatiwa na Kituo cha Uwekezaji Tanzania (TIC) kwa kushirikiana na Shirika la Kimataifa la Biashara na Maendeleo (UNCTAD) ili kupata mbinu mpya za biashara.

Bw. Kandoro alisema wajasiriamali hao wanahitajika pia kuvitumia vyombo vya fedha kupata mikopo na kujenga tabia ya kuirudisha kwa wakati ili waweze kukopa tena kwa ajili ya kukuza biashara zao.

Alisisitiza kuwa mfunzo hayo yanalenga kuwaunganisha na makampuni makubwa kwa ajili ya kupata ujuzi, hivyo wana wajibu wa kuhakikisha wanaheshimu mikataba watakayoingia na kujiepusha na tabia ya ubabaishaji katika mahusiano hayo.

Alisema serikali itaendelea kuwajengea misingi mizuri ya kufanya biashara zao ili wote waweze kukua zaidi na kusaidia kutoa ajira na kukuza uchumi wa nchi.

Meneja wa Kituo cha Uwekezaji nchini (TIC),Kanda ya Nyanda za Juu Kusini, Bw. Daudi Riganda alisema mafunzo hayo yamejumuisha wajasiriamali 30 kutoka Mkoa wa Mbeya.

“Mafunzo haya  yanatolewa kwa mara ya kwanza katika kanda hii na yameanza kwa wajasiliamali wa Mkoa wa Mbeya,” alisema na kuongeza kuwa matarajio ni kuwafikia wajasilimali wote katika kanda yao yenye mikoa ya Ruvuma, Iringa Katavi, Rukwa na Mbeya.

TIC kwa kushirikiana na UNCTAD wanaendesha mafunzo hayo kuwajengea uwezo wajasiriamali hao kwa kuwaunganisha na makampuni makubwa kufanya biashara kwa ufanisi.

Mshauri wa programu hiyo kutoka UNCTAD, Bw.Benedict Lema ambaye pia ni mwezeshaji wa program hiyo, alisema mafunzo hayo yanalenga kuwawezesha wajasilimali kufanya biashara na kampuni kubwa kwa kuwasambazia bidhaa mbalimbali ili waweze kukua na kuongeza vipato vyao.

Naye mmoja wa wajasiriamali hao, ambaye ni Mkurugenzi wa Kampuni ya Asaky’s Investment, Bi.Sophia Abdallah alisema wao kama wajasiriamali wapo tayari kuyapokea mafunzo ili waweze kupata ujuzi wa kibiashara.

“Tunayofuraha kubwa kwa ujuzi tunaopatiwa hapa… tutaweza kundeleza zaidi biashara zetu kwa manufaa yetu, jamii na taifa kwa ujumla,”alisema.

Mwisho