Tuna uwezo kuwa kitovu cha mawasiliano Afrika—Dkt. Turuka

Na Mwandishi wetu, Dar es Salaam

Nafasi ya Tanzania kuwa kitovu cha huduma za mawasiliano katika Kanda ya Afrika Mashariki, Kati na Kusini inazidi kuwa kubwa kutokana na kuendelea kuimarika kwa mtandao wa Mkongo wa Taifa wa Mawasiliano.

Tayari Mkongo huo umeunganishwa na mikongo ya baharini ya SEACOM na The Eastern Africa Submarine Cable System (EASSy) na baadaye mkongo wa The East African Marine System (TEAMS).

Akiongea na waandishi wa habari jijini Dar es Salaam mwishoni mwa wiki Katibu Mkuu wa Wizara ya mawasiliano, Sayansi na Teknolojia, Dkt. Florens Turuka alisema Mkongo wa Taifa wa Mawasiliano umefika makao makuu ya mikoa yote ya Tanzania Bara na baadhi ya makao makuu ya wilaya.

“Hapa nchini, kampuni za simu za Airtel, Infinitty, Simbanet, Tigo, TTCL, Vodacom na Zantel zimeunganishwa katika mkongo huu na zinatoa huduma zake kupitia mkongo huu katika sehemu mbalimbali,” alisema.

Serikali kupitia wizara hiyo na Kampuni ya Simu Tanzania (TTCL) tayari imejenga Mkongo wa Taifa wa Mawasiliano wenye urefu wa kilometa 7,560, ambao unajumuisha kilometa 5,448 mpya zilizojengwa na kilometa 2,112 zilizojengwa na shirika la umeme (TANESCO) katika njia kuu za umeme.

Akifafanua zaidi alisema Mkongo huo umetoa fursa ya kuunganisha na mikongo au mifumo mingine ya mawasiliano ya nchi jirani za Kenya (Namanga, Sirari na Horohoro), Rwanda (Rusumo), Burundi (Kabanga), Malawi (Kasumulu), Zambia (Tunduma), Uganda (Mutukula) na Msumbiji (Mtambaswala).

Alisema kampuni za simu za MTL (Malawi); MTN (Zambia); MTN, RDB, Airtel, KDN, RwandaTel, na BCS (Rwanda); UCOM na ECONET (Burundi) zimeunganishwa katika Mkongo wa Taifa wa Mawasiliano.

Dkt. Turuka alisema kuwa uwepo wa Mkongo huo unawezesha utoaji wa huduma za mawasiliano katika masuala ya fedha, elimu, afya, kilimo, biashara, utalii kwa njia mtandao.

Serikali imeipa jukumu Kampuni ya Simu Tanzania (TTCL) kuendesha, kuendeleza na kusimamia huduma zinazotolewa na Mkongo wa Taifa wa Mawasiliano kwa ujumla wake.

Alisema kutokana na mazingira mazuri ya kuendeleza sekta ya mawasiliano, mikongo ya mijini (metro networks) imeanza kujengwa na sekta binafsi ili kutumia vyema zaidi mkongo wa taifa wa mawasiliano katika kutoa huduma za mawasiliano. 

Akitoa mfano alisema ujenzi wa metro network ya Dar es Salaam yenye urefu wa kilometa 90 iliyojengwa na muungano wa kampuni za simu tatu imekamilika na hivi sasa mtandao huo umeanza kutumika.

Inatarajiwa kuwa mikongo mingine ya mijini itajengwa katika miji ya Arusha, Mwanza, Dodoma, Morogoro na Mbeya katika siku zijazo.

Sekta ya mawasiliano imekua ikikua kwa kasi katika miaka ya hivi karibbuni.

Kwa mujibu wa wizara hiyo, sekta imeonyesha kukua haraka zaidi kwa wastani wa asilimia 21 kwa miaka 5 mfululizo hadi mwaka 2011 ikilinganishwa na sekta nyingine za uchumi.

Mchango wa sekta katika Pato Ghafi la Taifa (Gross Domestic Product) umekua kutoka asilimia 1.7 (2005) hadi kufikia asilimia 2.7 (2009).

Matumizi ya simu hivi sasa ni zaidi ya asilimia 50 ya Watanzania ikilinganishwa na asilimia 3 katika miaka michache iliyopita.

Kwa upande wa intaneti watumiaji wameongezeka kutoka wastani wa 25,000 kwa mwaka 1999 hadi kufikia watumiaji zaidi ya 4,800,000 mwaka 2012.

Ends