Makubaliano ya awali ya mradi wa Stiegler’s yafikiwa

Na Mwandishi wetu, Dar es Salaam

Mamlaka ya Uendelezaji wa Bonde la Mto Rufiji (RUBADA) imetiliana saini ya makubaliano ya awali ya uzalishaji nishati ya umeme kupitia mradi wa Stiegler’s Gorge na Kampuni ya Odebrecht International ya Brazil.

“Leo tunayo furaha kusaini makubaliano ya awali ya kuanza kutekeleza maradi mkubwa wa Stiegler’s ambao una uwezo wa kuzalisha umeme wa megawati 2100 katika Bonde la Mto Rufiji na Kampuni iliyobobea katika uzalishi nishati kwa kutumia nguvu ya maji,”alisema Bw. Aloyce Masanja, Mkurugenzi Mkuu wa RUBADA baada ya tukio hilo jijini Dar es Salaam hivi karibuni.

Alisema makubaliano hayo yanatoa fursa kufanyika upembuzi yakinifu kupitia ule uliofanywa awali na kampuni ya NORCONSULT ya Norway miaka ya 1980 na kufanyiwa maboresho na  baada ya miezi sita kampuni hiyo itakabidhi ripoti ya kwanza.

Alisema awamu ya pili itahusisha mkataba wa kibiashara  kwa kuangalia maji, teknolojia itakayotumika, vyanzo vya fedha na utunzaji wa vyanzo vya maji ili kukabiliana na mabadiliko ya tabia nchi.

Alisema ni lazima suala la mazingira lipewa kipaumbele kwa sababu mradi wa Stiegler’s upo katika hifadhi ya Selou na bonde hilo pia ni muhimu kwa kilimo.

Alisema hatua ya tatu itakuwa ni kuanza ujenzi wa mradi wenyewe na matarajio ni kuanza baada ya miaka miwili kuanzia sasa.

Alisema mradi unatarajia kughalimu fedha za Kimarekani bilioni mbili ingawa ghara inaweza kubadilika kutokana na teknolojia itakayotumika.

Alisema Bonde la Mto Rufiji linapita katika mikoa nane na linakaliwa na watu milioni nane hivyo kukamilika kwa mradi huo kutakuwa na msada mkubwa katika shughuli za maendeleo.

Mkurugenzi wa Biashara wa Odebrecht, Bw. Fernando Soares alisema kampuni yao imetia saini kutekeleza maradi huo ili kuzalisha nishati ya umeme ambayo itachangia kuimarika kwa viwanda na hatimaye kukuza uchumi wa Tanzania.

“Hatua hii tuliyofikia ni muhimu kwa RUBADA na Serikali ya Tanzania na matarajio ni kuona mradi huu unafanyaka vizuri na kusaidia nchi hii,”alisema Bw. Soares.

Alisema kwa upande wao wamejidhatiti kutokana na ujuzi walionao katika kuzalisha nishati ya umeme kupitia nguvu ya maji na wamekuwa wakifanya kazi hiyo kwa muda mrefu katika mataifa mbalimbali duniani.

Mwenyekiti wa Bodi ya Wakurugenzi RUBADA, Profesa Raphael Mwalyosi aliiomba Serikali na wadau wote wa nishati nchini kuunga mkono jitihada za utelezaji maradi huo mkubwa ambao utaweza kukabili tatizo la umeme nchini.

“Ninawaomba tusiogope kutekeleza mradi huu, kikubwa ni kuwa na mipango ya kulinda vyanzo vya maji na Wakuu wa Mikoa ambao mikoa yao ni vyanzo vya maji yanayoingia katika Bonde la Mto Rufiji wawe makini katika jambo hili,” alisema.

Balozi wa Brazil nchini Tanzania,Bw.Francisco Luz alisema  makubaliano yaliyofanywa na RUBADA na Kampuni ya Odebrecht yanalenga kuzidi kujenga mahusiano na kuchochea shughuli za uchumi Tanzania.

Alisema kampuni hiyo ya Brazil ilifika Afrika miaka 30 iliyopita na kufanya kazi katika nchi mbalimbali na nchi Tanzania imejipanga kutekeleza mradi huo muhimu kwa ufanisi mkubwa.