Benki ya Afrika Tanzania yaimarisha mikopo ya nyumba

Nyumba bora ni kati ya vitu muhimu kabisa kwa binadamu tangu enzi na enzi.  Ndio maana jamii na serikali za dunia hii zinajitahidi kupitia programu mbalimbali kuhakikisha watu wake wanaishi katika makazi bora.  Kama moja ya wadau wa sekta binafsi, Benki ya Afrika Tanzania imekuwa pia ikijitahidi kusaidia juhudi hizi za serikali na watanzania kwa ujumla kuwa na nyumba bora kwa gharama nafuu.  Katika kufanikisha swala hili, hivi karibuni benki ilinunua hisa toka kampuni ya Tanzania Mortgage Refinance Company (TMRC) ili kuimarisha mikopo yake ya nyumba kama mwandishi wetu anavyooelezea…

Malazi, mavazi na chakula ndio vitu vitatu muhimu kwa binadamu.

Ndio maana jamii na serikali mbalimbali duniani zimekuwa zikifanya kila liwezekanalo kuhakikisha mahitaji hayo yanapatikana kwa urahisi na kwa ubora.

Pamoja na kwamba Serikali ya Tanzania inalishughulikia hili kupitia taasisi zake mbalimbali, pia imeruhusu sekta binafsi kusaidia katika juhudi hizo.

Benki ya Afrika Tanzania ni moja ya wadau hao ambao wamedhamiria kusaidia juhudi za kuwawezesha watanzania kuwa na makazi bora na hivyo kusaidia serikali na kufikia malengo ya milenia.

Chombo hiki cha fedha kimejizatiti kutoa mikopo ya nyumba ili kuwawezesha watanzania kuwa na nyumba nzuri kwa makazi ambayo ni muhimu kwa maendeleo ya watu binafsi na taifa kwa ujumla.

Katika juhudi za kuimarisha mikopo yake ya nyumba benki hiyo imewekeza shilingi bilioni moja na kupata umiliki wa hisa asilimia 9.57 za Tanzania Mortgage Refinance Company (TMRC) ambapo sasa benki itakuwa na fursa ya kukopa fedha kutoka kampuni hiyo ili kuendeleza utoaji wa mikopo ya nyumba kwa mafanikio zaidi.

Akiongea wakati wa uzinduzi wa uwekezaji huo hivi karibuni, Mkurugenzi Mtendaji wa Benki ya Afrika Tanzania, Bw. Ammish Owusu-Amoah alisema hatua hiyo imefikiwa kwa lengo la kuendelea kuboresha huduma ya mikopo kwa wateja wake na watanzania kwa ujumla.

“Ninayo furaha kutangaza kuwa sasa tutakuwa na nafasi nzuri ya kuendelea kutoa mikopo ya nyumba kwa vile benki yetu imejiunga na TMRC ambapo tutakuwa na fursa ya kukopa fedha kwa ajili ya kutoa huduma hii muhimu ya mikopo kwa wateja wetu na watanzania kwa ujumla,” anasema Bw. Amoah.

TMRC ni kampuni inayotoa mikopo ya nyumba kwa mabenki ambao ni wanachama wake ili hatimaye benki hizo ziweze kutoa mikopo ya nyumba ya muda mrefu kwa wateja na watanzania kwa ujumla.

Anasema benki inatoa mikopo ya kununua nyumba, kukarabati nyumba, kumalizia kujenga na kuweka nyumba kama amana ya kupata fedha kwa ajili ya shughuli za maendeleo.

Anasema lengo la kufanya hivyo ni kutaka kuwawezesha wateja wao na watanzania kumiliki nyumba nzuri na kuwa na shughuli mbalimbali za maendeleo ili kupiga vita hali duni ya vipato miongoni mwao na wakipata mazingira mazuri ya kuishi itatoa fursa kwa afya zao na kufanya kazi za kujipatia maendeleo kwa bidii.  

“Ni hatua nzuri kuona wadau wengi tunashiriki katika sekta hii ya mikopo ya nyumba na benki yetu haiko nyuma katika mchakato huu ambao ni muhimu kwa maendeleo ya wateja wetu na watanzania wote kwa ujumla,” anasema Bw. Amoah.

Mkopaji atahitajika kurejesha mkopo wa kununua nyumba kwa muda wa miaka 15 na ule wa kuweka nyumba kama amana ya kupata fedha, kukarabati nyumba na kumalizia kujenga utalipwa kwa kipindi cha miaka 10.

Ushirika uliopo katika sekta hiyo unasaidia wadau wa TMRC kuunga mkono juhudi za serikali ya Tanzania kuwa na nyumba bora na kuleta sura mpya kwa watanzania ambao wanakabiliwa na tatizo la kupata fedha kwa mara moja na kujenga nyumba za zinazostahili kulingana na mazingira ya sasa.