Benki ya Afrika Tanzania yasifia nguvu kazi yake.

Na Mwandishi wetu, Dar es Salaam

Rasilimali watu iliyo bora imetajwa kama moja ya siri za mafanikio ya Benki ya Afrika Tanzania.

Hayo yamesemwa na Mkurugenzi Mkuu wa Benki hiyo, Bw. Ammish owusu-Amoah wakati wa sherehe ya mwaka ya wafanyakazi wa benki hiyo iliyohusisha pia familia zao hivi karibuni jijini Dar es Salaam.

“Tunatambua na kujali watu wetu, mafanikio ya benki yetu yamechangiwa sana na utendaji kazi bora wanaouonyesha,” alisema Bw. Amoah.

Alisema sherehe hizo zinahusisha wanafamilia kwa kuwa wana mchango mkubwa sana katika kuwaongezea ari na kuwapatia moyo wafanyakazi wa benki katika utendaji wao wa kila siku.

“Ninawahamasisha kufanya kazi kwa bidii zaidi kwa faida yetu sote na kwa faida ya taifa zima kwa ujumla,” alisema.

Sherehe hizo pia zilishuhudiwa kutolewa tuzo kwa wafanyakazi mbalimbali baada ya kufanya vyema katika nafasi zao za kazi.

Mmoja wapo alikuwa Bi. Sophia Mwema aliyetangazwa kuwa mfanyakazi bora idara ya Rasilimali Watu na Utawala.

“Nina furaha kubwa…sikutegemea,” alisema Bi. Mwema, na kuongeza kwamba hii itamfanya kuongeza bidii zaidi.

Mwingine aliyetambuliwa alikuwa, Bw. Masumbuko Humuli aliyekuwa mfanyakazi bora kutoka idara ya Fedha na Uhasibu ambaye kwa upande wake alitoa wito kwa wafanyakazi wenzake kushirikiana zaidi ili kuifanya benki hiyo kufanikiwa zaidi katika wakati huu wa ushindani mkubwa.

Benki ya Afrika Tanzania imekuwa ikijitahidi kujitanua na kuimarisha huduma zake katika miaka ya hivi karibuni.

Tangu ianzishwe hapa nchini mwaka 2007, imeshafanikiwa kufungua matawi kumi mkoani Dar es Salaam na sita nje ya mkoa huo yakiwepo ya Morogoro, Tunduma, Mwanza, Moshi, Mbeya and Arusha.

Benki hii ni moja ya mtandao wa kibenki unaofanya kazi katika nchi 15 ambazo ni pamoja na Benin, Burkina Faso, Ghana, Ivory Coast, Mali, Niger na Senegal.  Nyingine ni Burundi, Djibouti, Kenya, Madagascar, Tanzania na Uganda.

Pia ina tawi katika nchi ya Jamhuri ya Kidemokrasia ya Kongo.