Mbene awafunda wafanyabiashara wa Tanzania

Na Mwandishi wetu, Dar es Salaam

Wakati wafanyabiashara wa Afrika ya Kusini wakionyesha nia ya kuzidi kuja kuwekeza na kufanya biashara na Tanzania, serikali imewashauri wafanyabiashara wa ndani kuhakikisha kuwa wanashirikiana nao ili kusaidia nchi kupiga hatua kiuchumi na maendeleo.

Naibu Waziri wa Biashara na Viwanda, Bi. Janeth Mbene alitoa wito huo katika mkutano wa wafanya biashara na wawekezaji wa Afrika Kusini na Tanzania uliofanyika hivi karibuni jijini Dar es Salaam.

“Wafanyabiashara na wawekezaji wa Afrika ya Kusini wameonesha nia kubwa kushirikiana na sisi katika biashara...tutumie fursa hii vyema,”alisema Bi. Mbene mbele ya waandishi wa habari.

Alisema serikali itakuwa tayari kutimiza wajibu wake katika kuhakikisha mazingira ya biashara yanakuwa bora ili shughuli za uwekezaji na biashara hapa nchini zinaboreka na kuifanya sekta binafsi kuwa injini ya uchumi.

“Uchumi wa nchi hiyo ni mkubwa na imepiga hatua kubwa kiviwanda...itakuwa jambo jema kama tukiimarisha uhusiano na wafanyabiashara wao,” alisema.

 Alisema ushirikiano wa kibiashara unasaidia kupata maarifa ya biashara, mtaji na kuimarisha biashara, na kuwa fursa hiyo imekuja katika kipindi mwafaka kwa taifa hili.

Kwa upande wake, Mkurugenzi Mkuu wa Mamlaka ya Ukanda Maalumu wa Uwekezaji nchini (EPZA), Dkt. Adelhelm Meru alisema wafanyabiashara na wawekezaji toka nchi hiyo wameonesha nia ya kuwekeza katika sekta ya  ujenzi wa viwanda vya kuongeza thamani ya mazao ya Kilimo na madini.

“Wameonyesha nia ya ujenzi wa miundombinu ya barabara, reli, na bandari,” alisema na kuongeza kuwa pia wameonyesha nia ya kujenga  miundombinu katika maeneo maalumu ya ukanda wa mamlaka yake.

Alisema tayari mamlaka iliwaonyesha maeneo hayo maalumu ya uwekezaji ambayo yapo katika maeneo mbalimbali nchini na ambayo bado hayajawekwa miundombinu.

“Kwa bahati nzuri nao wana mfumo kama huu kwetu,” alisema huku akiongeza kuwa ujio wao uliwawezesha kuona fursa  zilizopo na vivutio vinavyotolewa na mamlaka hiyo na kuwa matarajio ni makubwa kuwa wengi watakuja kwa ajili ya biashara.

Aliwataka wafanyabiashara wa Tanzania kuutumia mfumo wa ushirikiano wa sekta umma na binafsi (PPP) kuwekeza katika miradi mbalimbali ambayo wanaona wanaweza kufanya hivyo.

Alisema kwa sasa miradi mikubwa inayopewa kipaumbele katika utaratibu huo wa PPP ni ya ujenzi wa miundombinu.

Alisema hatua hiyo ni fursa kubwa kwa wafanyabiashara kwa vile tayari sheria na kanuni za kusaidia kutekelezaji miradi ya namna hiyo ipo na kuwa kazi imebaki kwa sekta binafsi kufanya kwa vitendo.

Ujumbe wa watu 50 wakiwemo maafisa wa serikali na wafanyabiashara wa makampuni makubwa 20 ya Afrika kusini walikuwa nchini na kukutana na wenzao wa Tanzania.

Mwisho