FSDT yahamasisha wadau wa fedha, wabunifu kushiriki shindano kusaidia wajasiriamali

Afisa Mtendaji Mkuu wa Mfuko wa Kuendeleza Sekta ya Fedha Tanzania (FSDT), Bw. Sosthenes Kewe akisisitiza jambo kwa waandishi wa habari jana jijini Dar es Salaam alipokuwa akiongelea awamu ya tatu ya shindano la mfuko wa ubunifu wa bidhaa za kifedha unaolenga kusaidia wajasiriamali.  Wengine ni washindi waliopita wa shindano hilo; Mkurugenzi Mkuu Mtendaji wa Go Finance Limited, Bw. Geoffrey Ndosi (kushoto) na Mkurugenzi Mkuu Mtendaji wa Problem Solved Limited, Bw. Eric Mutta.

Na Mwandishi wetu, Dar es Salaam

Wadau wa sekta ya fedha na wabunifu nchini wametakiwa kuchangamkia awamu ya tatu ya shindano la mfuko wa ubunifu wa bidhaa za kifedha unaolenga kusaidia wajasiriamali wadogo na wa kati.

Shindano hilo linaendeshwa na Mfuko wa Kuendeleza Sekta ya Fedha Tanzania (FSDT) ambao ulianzishwa mwaka 2004 kuchochea ukuaji wa sekta ya fedha Tanzania hasa kuwezesha watu wengi zaidi na biashara kuweza kufikia huduma za kifedha.

Akiongea na waandishi wa habari jijini Dar es Salaam jana, Afisa Mtendaji Mkuu wa FSDT, Bw. Sosthenes Kewe alisema shindano hilo lililofunguliwa mwanzoni mwa mwezi Desemba mwaka jana linalenga kuvutia mawazo ya aina ya miradi na ubunifu utakaosaidia kuja na bidhaa na huduma mpya kusaidia wajasiriamali hapa nchini.    

“Hakuna mabadiliko yanayoweza kutokea kama mambo yatafanyika vile vile katika mazingira yanayobadilika kwa kasi,” alisema.

Alisema huu ni wakati wa kwa wadau wa sekta ya fedha na wabunifu kuja na mambo mapya ambayo yatasaidia kuendeleza sekta ya wajasiriamali hapa nchini.

Alisema ingawa umuhimu wa sekta ya wajasiriamali katika kujenga uchumi, kukuza ajira na kuondoa umaskini unajulikana; bado sekta hiyo ina changamoto kubwa kufikia huduma za kifedha.

“Pamoja na umuhimu wao, bado changamoto ya huduma za fedha kwa wajasiriamali hapa nchini ni kubwa sana,” alisema Bw. Kewe.

Kwa mara ya kwanza shindano hilo lilianza mwezi Juni 2011 ambapo katika awamu hiyo kampuni 19 ziliomba; wakati kampuni 13 zilijitokeza katika awamu ya pili ya shindano hilo.

Mshindi wa kwanza, Go Finance Limited, alishinda ruzuku ya dola za kimarekani 153,000 Januari 2012 na ametengeneza mfumo wa kiteknolojia ambao umerahisisha kutoa mikopo kwa wajasiriamali bila kukumbana na masharti magumu katika uendeshaji wa biashara zao.

Afisa Mkuu Mtendaji wa Go Finance Limited, Bw. Geoffrey Ndosi alisema ruzuku hiyo imesaidia kampuni yao kukua kibiashara, kuongeza ajira pamoja na kusaidia wajasiriamali.

“Ninawahamasisha wadau wa sekta hii kuchangamkia fursa ya shindano hili ili waweze kuleta mabadiliko yanayotakiwa,” alisema.

Mshindi mwingine wa awamu ya pili ya shindano hilo ambaye ni kampuni ya Problem Solved Limited, alijishindia ruzuku ya dola za kimarekani laki 328 (Tshs 525 milioni) baada ya kuelezea jinsi anavyoweza kutengeneza mfumo wa kompyuta utakaosaidia wajasiriamali kutunza kumbukumbu za hesabu zao za biashara kwa urahisi.

Afisa Mtendaji Mkuu wa Problem Solved Limited, Bw. Eric Mutta alisema ruzuku aliyopata itasaidia kuleta tofauti kubwa kwa wajasiriamali hapa nchini na hivyo kuendeleza uchumi wa nchi.

Ruzuku hiyo ya FSDT inatolewa baada ya kushindanisha watu waliyoomba kuanzia dola 100,000 na dola 500,000 kulingana na aina ya mradi.  FSDT hutoa asilimia 50 ya fedha zilizoombwa kusaidia gharama za kuanzisha bidhaa au huduma zikilenga kuinua wajasiriamali.

Mwisho

Watanzania wahamasishwa kushiriki shindano la awamu ya tatu la ufadhili Kilimo cha biashara

Mkurugenzi  wa Mfuko wa Sekta Binafsi Afrika (Africa Enterprise Challange Fund) AECF, Bw. Hugh Scott kati akifafanua jambo kwa waandishi wa habari kuhusu shindano la awamu ya tatu ya dirisha la ufadhili wa Kilimo cha biashara, ambapo watazania wenye mawazo ya biashara katika sekta ya Kilimo wanahamasishwa kuomba ushiriki.Kushoto ni Mjumbe  wa Kamati ya Uwekezaji ya mfuko huo, Dkt. Salum Diwani na kulia ni Mkurugenzi wa Mfuko huo nchini Tanzania, Dkt. Alexandra Mandelbaum.

Mkurugenzi  wa Mfuko wa Sekta Binafsi Afrika (Enterprise Challange Fund) AECF, Bw. Hugh Scott akibadilishana mawazo na waandishi wa habari na wageni mbalimbali baada ya kuelezea uzinduzi wa shindano la awamu  ya tatu ya dirisha la ufadhili wa kilimo cha biashara jijini Dar es Salaam jana, Kushoto kwake ni Mjumbe wa Kamati ya Uwekezeji wa mfuko huo, Dkt.Salum Diwani na kulia ni Mwakilishi wa Mfuko huu Tanzania, Dkt. Alexandra Mandelbaum.

Na Mwandishi wetu, Dar es Salaam

Watanzania wenye mawazo ya biashara katika sekta ya Kilimo wamehamasishwa  kushiriki shindano la awamu ya tatu ya dirisha la ufadhili wa Kilimo cha biashara  kwa ajili ya kuendeleza sekta ya Kilimo ambayo inawagusa watu wengi nchini hasa waishio vijijini.

Mkurugenzi wa Africa Enterprise Challenge Fund (AECF), Bw. Hugh Scott aliwambia waandishi wa habari jana jijini Dar es Salaam kuwa mfuko huo umezindua shindano hilo ili kusadia  Kilimo cha biashara kama njia ya kusaidia kukuza sekta hiyo ya Kilimo hapa nchini.

AECF ni mfuko wa sekta binafsi wa dola za Kimarekani milioni 217 unasaidiwa na baadhi ya wafadhili wakubwa katika fedha za maendeleo chini ya Muungano wa Mapinduzi ya kijani ya Kilimo kwa nchi mbalimbali za Afrika (AGRA).

Mkurugenzi huyo alisema shindano hilo la awamu ya tatu ya dirisha la ufadhili wa Kilimo cha biashara  linalenga kupata mawazo ya biashara katika maeneo mawili yakiwemo ya Kilimo cha biashara katika mnyororo wa thamani na katika ufumbuzi unaoongeza huduma za kifedha vijijini katika kusaidia uzalishaji katika kilimo cha kibiashara na sekta zinazohusiana.

Shindano hilo la dirisha la ufadhili Kilimo cha biashara maalum kwa ajili ya Tanzania lilizinduliwa tarehe 20, January mwaka huu na litakuwa wazi hadi hadi Machi 31, 2014.

Bw. Scott alisema awamu hii pia itashirikisha kufadhili waombaji watakaofanikiwa kupitia mchanganyiko wa ruzuku na mikopo itakayorejeshwa ya kati ya dola za Kimarekani 100,000 na dola milioni 1.

Alisema waombaji wa shindano hilo wanatakiwa kuonyesha mawazo ya biashara yenye matokeo ya uhakika kwa watu masikini vijijini nchini Tanzania, kuongeza ajira na mapato, kupunguza gharama na kuongeza uzalishaji.

Akifafanua zaidi alisema kampuni zinazostahili kuomba ni zile zinazohusika na ukulima au uzindikaji, wale wanaoanzisha mipango ya kilimo cha mkataba, watengenezaji na wasambazaji wa pembejeo za Kilimo, wachukuzi na wafanyabiashara na watoa huduma wengine katika sekta binafsi, ikiwemo huduma za taarifa ya soko. 

Alisema alisema fomu za kuomba kushiriki shindano hilo zinapatikana kwenye intaneti kupitia tovuti http//aecfafrica.org/windows/Tanzania-window.

Kwa upande wake, mjumbe wa kamati ya uwekezaji ya AECF, Dkt. Salum Diwani alisema matarajio ya shindano hilo ni kuona ushiriki mpana wa jumuiya ya wafanyabiashara wa Tanzania ili kusadia sekta hiyo kupiga hatua.

Alisema wenye mawazo yenye ubunifu wachangamkie fursa hiyo   ambayo italeta manufaa kwa maisha ya watanzania na ukuaji wa uchumi vijijini nchini.

“Hii ni njia muafaka ya kusaidia mabadiliko katika mfumo wa soko nchini,” alisema na kuongeza kusema kuwa  wenye mawazo bora na bunifu ndiyo wanaolengwa katika shindano hilo.

Akifafanua zaidi alisema si rahisi kwa wakulima kupata huduma za kifedha duniani kote, hivyo mfuko huo umeamua kufanya hivyo kukiwezesha Kilimo kukuwa.

Alisistiza kuwa uchumi wa Tanzania na Afrika utakua kwa kasi kubwa kama sekta ya Kilimo itazidi kuboreshwa na kuwa hiyo ndiyo dhamira ya mfuko wao.

Awamu ya kwanza ya shindano hilo ilizinduliwa mwezi Novemba 2011 na kampuni 10 zilipata ufadhili wakati awamu ya pili ilizinduliwa mwezi Juni 2012 na kampuni 12 zilipata ufadhili.

Mwisho