TPSF yahamasisha umoja sekta binafsi

Mkurugenzi Mtendaji wa Taasisi ya Sekta Binafsi Tanzania (TPSF), Bw. Geofey Simbeye akisisitiza jambo kwa wanachama wa taasisi hiyo wa kanda ya ziwa katika mkutano maalumu wa uelimishaji na uhamasishaji wa muundo wa uwakilishi katika kongano ( clusters).  Kulia ni Mkurugenzi wa Bodi ya TPSF Bw. Gideon Kaunda.  Mkutano huo ulifanyika mwishoni mwa wiki jijini Mwanza.

Mkurugenzi Mtendaji wa Taasisi ya Sekta Binafsi Tanzania (TPSF) Bw. Geofey Simbeye akizungumza na wanachama wa taasisi hiyo kutoka kanda ya ziwa katika mkutano maalumu wa uelimishaji na uhamasishaji wa muundo wa uwakilishi katika kongano( clusters) mwishoni mwa wiki jijini Mwanza.

Na Mwandishi Wetu, Mwanza

Mchakato wa kuwa na sauti moja, imara na yenye nguvu nchini kwa sekta binafsi unaendelea vizuri baada ya kuanza mikutano ya uhamasishaji ya kikanda huku wanachama wa taasisi hiyo wakihimizwa kuwa kitu kimoja ili kuingia katika ushindani wa soko la Afrika Mashariki.

Kwa mujibu wa Mkurugenzi Mtendaji wa taasisi ya sekta binafsi nchini (TPSF), Bw. Geofrey Simbeye, alisema mchakato huo ulioanza mwaka 2011 lengo lake ni kuweka mazingira bora na wezeshi kwa wanachama wake katika kuongeza kasi ya uanzishwaji wa makampuni na viwanda kwa ajili ya kuongeza ajira na kuinua uchumi wa nchi.

“Pia kuishawishi serikali kuondoa baadhi ya vikwazo katika ufanyaji biashara ndani na nje ya nchi,” alisema Bw. Simbeye katika mkutano wa kanda ya ziwa ulioshirikisha wanachama hao jijini Mwanza mwishoni mwa wiki.

Alisema TPSF inataka wanachama wake wafahamiane katika ufanyaji biashara hasa katika mikoa iliyopo katika kanda moja pia kujenga kongano (clusters) imara zitakazoweza kuwaunganisha katika sekta mbalimbali za kiuchumi.

Aliongeza kuwa mikutano hiyo ya kanda itahamasisha wawekezaji waliopo katika mikoa husika kuwekeza kutokana na fursa zilizopo katika mikoa hiyo.

 Akizungumzia kanda ya ziwa Mkurugenzi huyo alisema kanda ya ziwa ni moja ya kanda zenye fursa nyingi za uwekezaji hapa nchini, hivyo ni changamoto kwa wanachama wa TPSF katika mikoa hiyo kuungana ili kuisaidia serikali katika kuweka mazingira bora na wezeshi ya kufanya biashara na uwekezaji.

“Serikali inaitegemea sana sekta binafsi katika kujenga uchumi wa nchi, kwa hiyo napenda niseme ya kwamba watu wa kanda ya ziwa wana nafasi kubwa ya kuisaidia serikali katika kutekeleza jukumu hilo,”aliongeza Mkurugenzi huyo.

Alisisitiza kuwa baada ya mikutano hiyo ya kanda wanaamini watapata wawakilishi watakaoingia katika bodi ya TPSF ambao watawakilisha kanda nane zilizoanishwa katika mtindo wa kongano na hivyo kuwa na sauti moja itakayounganisha wanachama wote nchi nzima.

“Ukishakuwa na sauti moja katika jambo lolote lile lazima utafanikiwa, tunaomba serikali iweze kuangalia uwezekano wa kutupunguzia kodi kwa sisi watu wa sekta binafsi,” alisisitiza Bw. Simbeye.

Aidha Bw. Simbeye aligusia suala la uwajibikaji kwa wananchama wa taasisi hiyo katika kuchangia mawazo yao ili kuleta mabadiliko ya kiuchumi si kwa TPSF tu bali na sekta nyingine za kiuchumi.

“Mimi siku zote nimekuwa nikihimiza viongozi wa vyama vya biashara vya mikoa ambavyo ni wanachama wa TPSF kuwa kitu kimoja ili serikali iendelee kuiamini sekta yetu katika kuendelea kubadili uchumi wa nchi hii,” aliongeza.

Mkutano huo wa siku moja uliofanyika jijini Mwanza ulikuwa na lengo la kuelimisha na kuhamasisha muundo wa uwakilishi katika kongano (clusters) na kuhusisha mikoa ya  Kagera, Mara, Shinyanga, Simiyu, Geita na Mwanza, ambayo inaunganisha kanda ya ziwa.

Mwisho