Serikali kuimarisha ushirikiano na China kupitia uwekezaji, biashara

Kaimu Mtendaji Mkuu wa Kituo cha Uwekezaji Tanzania (TIC), Bw. Raymond Mbilinyi (kulia) akimsikiliza Kaimu Kamishna wa Polisi, Kanda Maalum ya Dar es Salaam, Bw. Suleiman Kova (kushoto) wakati wa mkutano wa maswala ya usalama na uwekezaji mwishoni mwa wiki jijini Dar es Salaam.   

Kaimu Mtendaji Mkuu wa Kituo cha Uwekezaji Tanzania (TIC), Bw. Raymond Mbilinyi (kulia) akimsikiliza Kaimu Kamishna wa Polisi, Kanda Maalum ya Dar es Salaam, Bw. Suleiman Kova (katikati) wakati wa mkutano wa maswala ya usalama na uwekezaji mwishoni mwa wiki jijini Dar es Salaam.  Kushoto ni Mwakilishi Mkuu wa maswala ya uchumi na biashara wa China nchini Tanzania, Bw. Lin Zhiyong.

Na Mwandishi wetu, Dar es Salaam

Serikali imesema itahakikisha inaimarisha uhusiano wake na wawekezaji toka China kwa manufaa ya nchi zote mbili.

Kaimu Mtendaji Mkuu wa Kituo cha Uwekezaji Tanzania (TIC), Bw. Raymond Mbilinyi amesema katika mkutano wa maswala ya usalama na uwekezaji mwishoni mwa wiki jijini Dar es Salaam kuwa serikali itatumia uwekezaji na biashara baina ya nchi hizo kama moja ya njia za kuimarisha uhusiano wa muda mrefu kati ya mataifa hayo.

Mkutano huo uliolenga wawekezaji wa Kichina wanaoishi Dar es Salaam ulihudhuriwa na maafisa mbalimbali wa serikali kutoka polisi, TIC, uhamiaji na idara ya kazi.

“Maeneo haya ya uwekezaji na biashara yana uwezo wa kuimarisha uhusiano wetu kwa kiwango kikubwa,” alisema.

Mkutano huo uliandaliwa kwa ushirikiano kati ya Kituo cha Biashara cha China nchini Tanzania (CBCT) na TIC kwa lengo la kuimarisha ushirikiano kati ya CBCT na idara mbalimbali za serikali ya Tanzania.

Bw. Mbilinyi alimshukuru Rais Jakaya Kikwete kwa juhudi zake katika kuimarisha uhusiano na nchi hiyo ambayo ni miongoni mwa zenye uchumi mkubwa kabisa duniani na kuwataka wawekezaji hao kulenga sekta zinazozalisha ajira kwa wingi kama vile uzalishaji na ujenzi.

“Tunapenda kusisitiza ushirikiano na wawekezaji wa ndani ili kuleta mafanikio makubwa zaidi,” alisema Bw. Mbilinyi na kuongeza kuwa kama wawekezaji hao watafuata sheria na taratibu za nchi watafanikiwa katika malengo yao.

Mwenyekiti wa CBCT, Bw. Janson Huang alisema siku zote nchi ya China itaheshimu uhusiano wa siku nyingi kati ya pande hizo na kwamba wataonyesha kwa vitendo heshima hiyo kwa kuajiri wafanyakazi wazalendo katika kampuni zao hapa nchini na kujihusisha katika kutoa misaada mbalimbali ya kiutu hapa nchini.

Bw. Huang alisema kuwa usalama ni swala muhimu sana katika kuendesha biashara na akapendekeza kuanzishwa kwa kituo cha ushirikiano kati ya polisi na jumuia ya wachina hapa nchini kushughulikia maswala ya kiusalama ya kila siku yanayowahusu.

Pia alitoa ombi kwa serikali ya Tanzania kuangalia jinsi ya kurahisisha taratibu nzima za kutoa vibali mbalimbali kwa wawekezaji hao ili kuimarisha zaidi ushirikiano.

Kwa upande wake, Kaimu Kamishna wa Polisi, Kanda Maalum ya Dar es Salaam, Bw. Suleiman Kova alisema kwamba kikosi chake kiko tayari kulinda wawekezaji na mali zao ili kuhakikisha mazingira ya uwekezaji yanaboreka zaidi na hivyo kukuza uchumi wa nchi.

Hata hivyo, alitoa angalizo kuwa ni lazima wawekezaji hao kufuata sheria na taratibu za nchi na kwamba kamwe wasiwe chanzo cha matatizo.

“Tutazidi kushirikiana na idara nyingine za serikali kuhakikisha kuwa wawekezaji wanakua salama,” alisema.

Uhusiano kati ya Tanzania na China ni wa kihistoria na uliasisiwa na viongozi, Mwenyekiti Mao Zedong wa China na Rais Julius Nyerere na kudumu zaidi ya miaka hamsini hadi sasa.

China imekua ikijihusisha na miradi mbalimbali hapa nchini.

Takwimu zinaonyesha kuwa uwekezaji wa China hapa nchini umekua thabiti katika miaka ya hivi karibuni, nchi hiyo ikiwekeza miradi yenye thamani ya zaidi USD bilioni moja kupitia kampuni zaidi ya 300 na kutengeneza ajira zaidi ya 80,000 kwa watanzania.

Hivi karibuni, nchi hiyo iliipatia Tanzania mkopo wa dola za kimarekani 1.01 bilioni kugharamia ujenzi wa bomba la gesi lenye urefu wa kilometa 522 kutoka Mtwara hadi Dar es Salaam kwa riba ya asilimia 3 tu.

Mradi huo unatarajiwa kumaliza tatizo sugu la umeme hapa nchini na hivyo kuimarisha uchumi.

Mwisho