Pinda ataka watafiti wa ndani watumiwe zaidi

Na Mwandishi Wetu, Dar es Salaam

Waziri Mkuu Mizengo Pinda ametoa Changamoto kwa taasisi mbalimbali hasa za serikali nchini kuwaamini na kuwatumia watafiti wa ndani badala ya kukimbilia kutumia wale wa nje ambao amesema mara nyingi huwa na gharama kubwa.

Waziri Mkuu alisema hayo wakati alipokuwa akizindua rasmi Chuo Kikuu Mzumbe, Kampasi ya Dar es Salaam na pamoja na jengo la ghorofa tano la kampasi hiyo juzi jioni jijini Dar es Salaam.

Akizungumza katika hafla hiyo baada ya uzinduzi huo, Bw. Pinda alisema kuna tabia imejengeka kwa taasisi na idara za serikali kukimbilia watafiti wa nje pale mahitaji yanapojitokeza na kuwaacha wa ndani.

“Huu mtindo haufai...watafiti wetu wa ndani wana uwezo na wanajua mazingira ya nchi yetu vizuri...tuwasadie kwa kuwapa kazi,” alisema, na kuongeza kuwa serikali inaamini kuwa watafiti hao wanaweza kufanya kazi kwa viwango vinavyokubalika kitaifa na kimataifa.

Alisema watafiti hao wakitumika vizuri watakuwana uwezo wa kutoa majibu yanayolingana na mazingira ya nchi na hivyo kupata suluhisho la changamoto mbalimbali za maendeleo.

Akitoa mfano wa Mzumbe alisema chuo hicho kilichodumu kwa takriban miaka 60 sasa kimetoa mchango mkubwa wa wataalam na kujijengea uwezo katika nyanja mbalimbali ambao unaweza kuwa faida kwa nchi kuliko ilivyo sasa kama kitatumiwa vizuri.

“Tumieni uwezo wa chuo hiki katika tafiti zenu,” Bw. Pinda aliwaambia baadhi ya maafisa waandamizi wa serikali walioandamana nae katika hafla hiyo.

Alisisitiza kuwa katika maswala ambayo vyuo kama hicho vina uwezo nayo hakuna sababu ya kutafuta wataalamu kutoka nje ya nchi.

“Tabia ya kuchua watalaamu kutoka nje ya nchi kwa maswala ambayo wataalamu wetu wana uwezo nayo haiingii akilini,” alisema Pinda.

Aidha  alitoa ushauri kwa chuo hicho kuanzisha kozi fupi amabazo zitasaidia kutoa elimu kwa viongozi wakiwemo mawaziri, wabunge, makatibu wakuu, wakuu wa mikoa, wilaya na wengine kupata weledi wa uongozi.

“Kuna matatizo mengi yanajitokeza hivi sasa na ukiyaangalia unakuta kuwa baadhi ya mambo yanahitaji tu weledi wa mbinu kidogo za uongozi,” alisema Bw. Pinda.

Alisema Chuo hicho kilipoanzishwa wakati wa ukoloni na baada ya uhuru kilikuwa kinatayarisha watu kuwa viongozi na kwamba pamoja na kuwa sasa masomo hayo yanatolewa katika programu za masomo ya chuo hicho, bado ipo haja ya kuanzisha kozi hizo fupi kwa ajili ya viongozi ambao hawakupata mafunzo hayo.

Alisifu uongozi wa chuo hicho kwa kupanua wigo wa elimu kwa watanzania kwa kuanzisha kampasi za Mbeya na Dar es Salaam na pia kwa kupanua miundombuni na udahili wa wanafunzi.

Alisema uamuzi wa chuo hicho kutaka kuanza kutoa mafunzo katika ngazi ya uzamili kuwezesha wahitimu kusimamia miradi mikubwa katika sekta za madini, gesi na mafuta ni mzuri na wenye manufaa kwa nchi.

“Kinachotakiwa sasa ni kwa chuo hiki kujenga mahusiano na nchi zenye uzoefu katika sekta hizi ili mjue zaidi undani wake na mboreshe kozi mtakazotoa,” alisema.

Alisema pamoja na kwamba uwiano wa wanawake na wanaume katika udahili wa wanafunzi si mbaya, bado juhudi zinatakiwa katika kuongeza idadi ya wanawake.

Naye Makamu Mkuu wa Chuo Kikuu Mzumbe, Profesa Joseph Kuzilwa alisema chuo chake kimejenga jingo hilo kutokana na mahitaji makubwa ya  watu wanaotaka kusoma katika kampasi ya Dar es Salaam.

“Jengo hili litasaidia kuboresha huduma zetu kwa wanafunzi na pia kurahisisha kazi ya waalimu wetu,” alisema, na kuongeza kuwa sasa chuo kitaokoa zaidi ya shilingi milioni 300 kwa mwaka zilizokuwa zikitumika katika kukodisha kumbi za mihadhara.

Jengo hilo lina maktaba ya kisasa iliyochukua ghorofa mbili za jengo, ofisi ya Makamu Mkuu wa Chuo pamoja na ya Mkuu wa Kampasi, kumbi tatu za mihadhara zenye uwezo wa kuchukua wanafunzi 132 kila mmoja pamoja na ukumbi wa mikutano.

Alisema chuo kina mipango ya kuongeza ujenzi wa miundombinu na rasilimali watu ili kuzidi kupanua wigo wa elimu kwa watanzania katika sehemu mbalimbali nchini katika juhudi za kuunga mkono nia ya serikali ya kupanua fursa za elimu kwa wananchi.

Kampasi ya Dar es Salaam ilianzishwa mwaka 2005 ikiwa na wanachuo 146 na programu mbili za uzamili.

Katika mwaka wa masomo wa 2013/2014, kampasi hiyo ilidahili wanafunzi 1052 ambao kati yao 504 ni wanawake na 548 ni wanaume wanaosoma shahada za uzamili katika programu zaidi ya 10.

Kukua kwa kampasi hiyo kumechangia kwa kiasi kikubwa kukua kwa Chuo Kikuu Mzumbe ambayo idadi yake kwa sasa ni zaidi ya wanachuo 8,000.

Mwisho. 

Mzumbe Mbeya kampasi yadhamiria makubwa

Na Mwandishi wetu, Mbeya

Uongozi wa Chuo Kikuu Mzumbe, Kampasi ya Mbeya umesema umedhamiria kuendelea kuongeza idadi ya wanafunzi mwaka hadi mwaka ili kutekeleza sera ya serikali ya kupanua elimu ya juu na hatimae kuchangia kufikia malengo ya mileniamu.

Akiongea na waandishi wa habari hivi karibuni baada ya mahafali ya 12 ya chuo hicho jijini Mbeya, Mkuu wa Chuo hicho, Kampasi ya Mbeya, Prof. Ernest Kihange alisema kuwa kampasi hiyo kama sehemu ya Chuo Kikuu Mzumbe imedhamiria kuimarisha majukumu yake ya kufundisha, kufanya tafiti, kutoa ushauri na kutoa huduma kwa jamii ili kuchangia maendeleo katika nchi.

Alisema elimu bora ndio msingi wa maendeleo endelevu na kwamba kampasi hiyo itaendelea kutoa wahitimu bora watakaoweza kupambana na changamoto mara wamalizapo masomo.

“Ni elimu itakayowezesha nchi kufikia malengo mbalimbali ya maendeleo, na sisi tumejidhatiti kutoa iliyo bora,” alisema.

Prof. Kihange alieleza kuwa pamoja na kuongeza idadi ya wanafunzi, watajitahidi pia kutoa elimu bora kwa wanafunzi huku akisisitiza kuwa kufanikiwa kwa wahitimu hao kunategemea kwa kuwango kikubwa wanatumiaje elimu waliyopata baada ya kuhitimu.

Kwa upande wake Naibu Makamu Mkuu wa Chuo Kikuu Mzumbe, Taaluma, Prof. Josephat Itika alisema chuo hicho kitaendelea kuimarisha mitaala na programu mbalimbali ili kuwapa wanafunzi nyenzo zinazohitajika.

Kuhusiana na changamoto za ajira, Prof. Itika alisema chuo hicho kinawaandaa wanafunzi wakiwa bado chuoni ili wajue hali halisi na jinsi ya kukabiliana na mazingira mara wamalizapo masomo.

“Tunapitia mitaala yetu kila baada ya miaka mitatu kwa kushirikiana na wadau wengine ili kuhakikisha kuwa elimu tunayotoa inaendana na mazingira ya sasa,” alisema.

Awali, Makamu Mkuu wa Chuo hicho, Prof. Joseph Kuzilwa alisema kuwa vijana wahitimu hasa toka chuo hicho wanatakiwa kuonyesha kuwa wanaweza kazi kwa kuwa elimu waliyopata ni bora na iliwatayarisha kukabiliana na changamoto mbalimbali.

Alifafanuwa kuwa pamoja na changamoto za ajira zilizopo nchini, bado nafasi zipo ila kinachotakiwa kwa vijana ni kujiamini na kutumia vizuri elimu waliyopata kwa faida yao nay a nchi.

Jumla ya wahitimu 567 walitunukiwa shahada mwaka huu katika kampasi hiyo kulinganisha na 314 mwaka jana katika programu za astashahada, 235; stashahada, 121; shahada ya kwanza, 173 na shahada ya uzamili, 38.

Kampasi ya Mbeya imeendelea kukua kwa idadi ya wanachuo ambayo imeongezeka kutoka 405 mwaka 2006 hadi kufikia 2241 mwaka huu, hii ikiwa ni ongezeko la takribani asilimia 453.

Kampasi hiyo ilianza mwaka 2006 na kwa kipindi cha miaka sita ya awali ilikuwa inategemea kuendeshwa kutoka makao makuu kwa bajeti ya kawaida.

Baada ya kugatua madaraka na kufuatia ongezeko la udahili la wanachuo, kampasi hiyo sasa inajiendesha yenyewe.

Mwisho.

Wahitimu Mzumbe Mbeya washauriwa kuwa wapambanaji

Makamu Mkuu wa Chuo Kikuu Mzumbe, Prof. Joseph Kuzilwa (kulia) akiwa pamoja na Mwenyekiti wa Baraza la chuo hicho, Prof. Daniel Mkude (katikati) na Prof. Gerald Monela wakati wa mahafali ya 12 ya chuo hicho, kampasi ya Mbeya mwishoni mwa wiki jijini Mbeya.

Mkuu wa Chuo Kikuu Mzumbe, kampasi ya Mbeya, Prof. Ernest Kihange akiwa pamoja mkuu wa chuo hicho kampasi ya Dar es Salaam, Prof. Andrew Mbwambo (kushoto kwake) wakati wa mahafali ya 12 ya chuo hicho, kampasi ya Mbeya mwishoni mwa wiki jijini Mbeya.

Na Mwandishi wetu, Mbeya

Vijana wahitimu wa vyuo vikuu wameshauriwa kuingia katika soko la ajira wakiwa wanajiamini na kujipambanua kiuwezo kutokana na elimu waliyopata wakiwa chuoni.

Akiongea wakati wa mahafali ya 12 ya Chuo Kikuu Mzumbe, Kampasi ya Mbeya jijini humo mwishoni mwa wiki, Makamu Mkuu wa Chuo hicho, Prof. Joseph Kuzilwa alisema kuwa vijana wahitimu hasa toka chuo hicho wanatakiwa kuonyesha kuwa wanaweza kazi kwa kuwa elimu waliyopata ni bora na iliwatayarisha kukabiliana na changamoto mbalimbali.

Alifafanuwa kuwa pamoja na changamoto za ajira zilizopo nchini, bado nafasi zipo ila kinachotakiwa kwa vijana ni kujiamini na kutumia vizuri elimu waliyopata kwa faida yao nay a nchi.

“Vijana waingie katika soko wakiwa wapambanaji na sio watu walioshindwa,” alisema.

Akitoa ushauri zaidi alisema vijana hao watumie pia fursa za kujiajiri na biashara kwa kutumia vizuri elimu na maarifa ya ujasiriamali waliyopata chuoni.

Alisema katika azma ya kutoa elimu bora zaidi na kutoa wahitimu wenye uwezo mzuri kiutendaji na kifikra, chuo hicho kimeanzisha mikakati ya kuboresha njia za kielektroniki na kampasi ya Mbeya ikihusishwa.

Alisema tayari wahadhiri wa kampasi hiyo wamepewa mafunzo kuhusu njia hizo na bado mafunzo yanaendelea kwa wanafunzi pia.

“Njia hizi mpya zinafaa hasa kwa kipindi hiki ambacho vyuo vingi sasa vinapanuka kwa idadi ya wanafunzi,” alisema.

Pamoja na kuishukuru serikali kwa mafanikio ya kampasi hiyo, pia aliiomba pamoja na wadau wengine wa elimu ya juu, kuongeza juhudi katika kushirikiana na chuo kukabiliana na changamoto zinazokabili chuo.

Kwa upande wake, Kaimu Mwenyekiti wa Baraza la Chuo, Prof. Gerald Monela, alisema uongozi utaendelea kuipanua kampasi hiyo ili kuongeza nafasi zaidi kwa wadau wengi wanaopenda kupata elimu katika chuo hicho.

Alisema mpango wa kukamilisha taratibu za umiliki wa eneo la Iwambi kwa ajili ya upanuzi wa kampasi hiyo unaendelea vizuri na kuwa mara baada ya kukamilisha taratibu za umiliki, mikakati ya upanuzi itaanza.

“Tunahitaji sana ushirikiano mkubwa na wananchi wa mkoa wa Mbeya na wadau wengine katika kutimiza azma hii,” alisema, huku akiushukuru uongozi mzima wa jiji la Mbeya na wananchi wake kwa kuwapatia eneo hilo.

Aliwaasa wahitimu wote kujihadhari na janga la ukimwi na madawa ya kulevya ili taifa lisipoteze nguvu kazi adimu iliyowekezwa ndani yao.

Jumla ya wahitimu 567 walitunukiwa shahada mwaka huu kulinganisha na 314 mwaka jana katika programu za astashahada, 235; stashahada, 121; shahada ya kwanza, 173 na shahada ya uzamili, 38.

Kampasi ya Mbeya imeendelea kukua kwa idadi ya wanachuo ambayo imeongezeka kutoka 405 mwaka 2006 hadi kufikia 2241 mwaka huu, hii ikiwa ni ongezeko la takribani asilimia 453.

Mwisho