Changamoto yatolewa kuongeza mazao thamani kufikia maendeleo endelevu

Na Mwandishi wetu, Dar es Salaam

Imeelezwa kwamba kuna umuhimu wa Tanzania na nchi nyingine za Afrika kufanya jitihada za kuongeza thamani mazao ya kilimo kama zinataka kufikia maendeleo endelevu ya kudumu.

Haya yamesemwa na muwakilishi wa shirika la Umoja wa Mataifa linaloshughulikia Maendeleo ya Viwanda (UNIDO) hapa nchini wakati wa uzinduzi wa kitabu kinachohusu kilimo kwa ajili ya biashara kwa maendeleo ya Afrika jijini Dar es Salaam mwanzoni mwa wiki hii.

Kuna umuhimu wa kuangalia jinsi nchi za Afrika zinavyoweza kuongeza thamani,” alisema na kuongeza kwamba nchi hizo zinatakiwa kuwa na uwezo wa kuongeza nusu ya thamani inayoongezwa na nchi zilizoendelea kama kweli zinataka kuondokana na umaskini.

Kwa mujibu wa kitabu hicho, nchi zilizoendelea huongeza thamani ya hadi dola 180 kwa tani moja ya mazao wakati nchi zinazoendelea hutumia dola za Marekani 40 tu kuongeza thamani ya tani moja ya mazao.

Pia, wakati asilimia 98 ya mazao ya kilimo huongezwa thamani katika nchi zilizoendelea, ni asilimia 30 tu ya mazao ya kilimo huongezwa thamani katika nchi zinazoendelea.

“Takwimu hizi zinawezakuwa za kukatisha tama zaidi kama tukiangalia nchi moja moja katika bara la Afrika,” alisema Kalenzi.

Kitabu hicho kilichoandikwa kwa msaada wa UNIDO na kupata mchango wa Mkurugenzi Mkuu wa shirika hilo kinaangalia jinsi ya kukifanya kilimo kuwa cha kibiashara zaidi na kuwa chachu ya kufikia maendeleo endelevu Afrika.

Bw. Kalenzi aliisifu Tanzania kwa juhudi inazochukua kuhakikisha kilimo kinakua na kuwa moja ya mkakati wa kufikia lengo la nchi kuwa taifa lenye uchumi wa kati ifikapo mwaka 2025.

Hata hivyo alisema ingawa kilimo bado ni mchangiaji mkubwa wa maendeleo ya kiuchumi na kijamii kwa Tanzania na bara zima la Afrika, bado hakitafanikiwa kuleta mapinduzi makubwa ya maendeleo kama hapatafanyika mageuzi makubwa katika sekta hiyo.

“Pamoja na kwamba kilimo kinachangia kwa kiwango kikubwa mapato katika bara la Afrika, bado kinatumia zana dhaifu,” alisema, na kuongeza kwamba bado wakulima wengi wanatumia zana zilezile zilizotumiwa na mababu miaka mingi iliyopita.

Waziri wa Viwanda na Biashara, Abdallah Kigoda alikubaliana kwamba bila viwanda na kuongeza thamani ya mazao, Afrika haitafikia maendeleo yanayotazamiwa.

Alisema bara la Afrika sasa halina budi kuachana na kilimo cha jembe la mkono na kuangalia jinsi ya kufanya kilimo cha kibiashara na kuvutia uwekezaji katika sekta hiyo.

“Ni lazima Tanzania tuweze kutofautisha kilimo cha kizamani cha kutumia jembe la mkono na kile cha kibiashara na kuongeza thamani,” alisema.

Mwisho