Serikali yashauriwa kutoongeza ushuru wa vinywaji

 Mkurugenzi wa Mawasiliano wa Kampuni ya Bia ya Serengeti (SBL), Bw. Evans Mlelwa akisisitiza jambo jana kwa maafisa wa polisi (hawako pichani) waliofanya ziara kwenye kiwanda hicho jana jijini Dar es Salaam.  Kushoto ni Naibu Kamishna wa Polisi, Bohari Kuu (DCP) Adrian Magayane aliyeongoza ujumbe huo.

Naibu Kamishna wa Polisi, Bohari Kuu (DCP) Adrian Magayane (wa tatu kushoto) akisikiliza maelezo ya Meneja Mkuu wa Upikaji Pombe wa Kampuni ya Bia ya Serengeti (SBL),Bw. Donan Ritte (kushoto) wakati wa ziara ya maafisa wa polisi katika kiwanda hicho jana jijini Dar es Salaam kujionea shughuli za kiwanda hicho.  Wa kwanza kulia ni Inspeta Msaidizi wa polisi, Simpohanus Chacha na wa pili kutoka kulia ni Inspeta, Milliton Masanja.

Na Mwandishi wetu, Dar es Salaam

Serikali imeshauriwa kutoongeza tena ushuru wa bidhaa za pombe aina ya bia na vinywaji vikali tena ili kuwezesha viwanda kukua na kuweza kutumia zaidi malighafi za ndani katika uzalishaji.

Akiongea na waandishi wa habari jana jijini Dar es Salaam, Mkurugenzi wa Mawasiliano wa Kampuni ya Bia ya Serengeti (SBL), Bw. Evans Mlelwa amesema ongezeko la kila mara la ushuru wa bidhaa hizo unazuia ukuaji wa viwanda na hivyo kurudisha nyuma maendeleo ya uchumi.

Bw. Mlelwa alikua akiongea katika kiwanda cha kampuni hiyo baada ya ziara ya ujirani mwema ya kikundi cha maafisa wa polisi kutoka katika bwalo la polisi barabara ya Kilwa.

Ugeni huo wa polisi uliongozwa na Naibu Kamishna wa Polisi wa Bohari Kuu (DCP) Adrian Magayane.

Akielezea zaidi, Bw. Mlelwa alisema ongezeko la kila mara la kodi hiyo kila inaposomwa bajeti ya nchi husababisha ongezeko la bei kwa walaji.

“Mara baada ya ongezeko la kodi tu, wazalishaji nao huongeza bei ya bidhaa zao na hali hii huleta athari kwa upande wa mauzo,” alisema.

Alifafanua kuwa kutokana na kushuka kwa mauzo kunakosababishwa na kuongezeka kwa gharama, viwanda kama SBL vinapata changamoto kufikia malengo yake ya kutumia malighafi za ndani na hivyo kuleta athari kwa wakulima ambao wangefaidika kwa kuuza mazao yao.

Maghembe awaasa wananchi Mwanga wasiharibu uoto wa asili

Waziri wa maji ambae pia ni mbunge wa jimbo la mwanga Profesa Jumanne Maghembe akisalimiana na wananchi wa kijiji cha mriti kata ya mwaniko, wilayani mwanga mkoani Kilimanjaro wakati alipofanya ziara katika kata za mwaniko na  kilomeni kukagua na kuangalia maendeleo ya  miradi mbalimbali inayotekelezwa na serikali ambayo tayari imekamilika na ile inayotarajiwa kuanza kutekelezwa.

Waziri wa maji ambae pia ni mbunge wa jimbo la mwanga Profesa Jumanne Maghembe (kushoto) akisisiiza jambo wakati akizungumza na wananchi wa kijiji cha mriti kata ya mwaniko, wilayani mwanga mkoani Kilimanjaro wakati alipofanya ziara katika kata za mwaniko na  kilomeni kukagua na kuangalia maendeleo ya miradi mbalimbali inayotekelezwa na serikali, wengine katika picha ni Diwani wa kata ya mwaniko Baraka Maradona (kulia) na (katikati) ni mwenyekiti wa kijiji cha mriti Shabaini Hamis

Na Mwandishi Wetu, Mwanga

Serikali imewataka wananchi wa Kilomeni Wilaya ya Mwanga Mkoani Kilimanjaro, kuacha tabia ya kuharibu uoto wa asili ikiwa ni pamoja na kukata miti hovyo jambo linalochangia kuharibu vyanzo vya maji.

Waziri wa maji ambaye, pia ni mbunge wa jimbo la mwanga, Profesa Jumanne Maghembe, alitoa katazo hilo wakati alipofanya ziara katika kata za mwaniko na  kilomeni kukagua na kuangalia maendeleo ya  miradi mbalimbali inayotekelezwa na serikali ambayo tayari imekamilika na ile inayotarajiwa kuanza kutekelezwa.

“Naomba sana, tuache kuharibu mazingira, watu wanakata miti hovyo, hii ni hatari kwenu ninyi wenyewe,”  alisema Waziri Maghembe.

Alisema miradi inayotekelezwa na serikali imetumia fedha nyingi sana, ni jkumu la wananchi wa maeneeo husika kuitunza kwa kuacha kuharibu vyanzo vya maji katika maeneo yao.

“Tukianza kufanya uharibifu huu tutakuwa hatuwatendei haki watoto wetu kumbukeni misitu hii imekuwepo tka zamani sio jambo zuri kuanza kuikata,”aliongeza Profesa

Alisisitiza kuwa serikali kwa kushirikiana na wahisani imetumia fedha nyingi katika kutekeleza miradi hiyo, hivyo ni jukumu la wananchi kuitunza na kuiona kama ya kwao na si mali ya serikali tu.