Maeneo huru ya uwekezaji yapewe msaada unaotakiwa -TNBC

Katibu Mtendaji wa Baraza la Taifa la Biashara (TNBC) Mhandisi Raymond Mbilinyi (kulia) akibadilishana mawazo na Mkurugenzi wa Global Industrial Park Ltd, Bw. Zainuddin  Adamjee muda mfupi mara baada ya kumaliza kwa kikao cha baraza la biashara la mkoa wa pwani hivi karibu mjini Bagamoyo.  Kikao hicho kilihudhuriwa na wadau toka sekta ya umma na binafsi.

Na Mwandishi Wetu, Bagamoyo

Baraza la Biashara la mkoa wa Pwani limetakiwa kutoa ushirikiano wa kutosha kwa wawekezaji waliowekeza katika maeneo maalumu ya ukanda wa uwekezaji mkoani humo.

Katibu Mtendaji wa Baraza la Taifa la Biashara (TNBC) Mhandisi Raymond Mbilinyi amesema hivi karibuni mkoani hapa kuwa maeneo maalum ya ukanda ya uwekezaji ni njia bora ya kufikia maendeleo ya kiuchumi na kijamii kama yataendelea kwa kiwango kinachotakiwa.

“Nchi nyingi zimefikia maendeleo kwa kutumia njia hii ya kuwekeza katika maeneo maalum, kama baraza la mkoa ni muhimu mkahakikisha yanaendelea bila tatizo,” alisema.

Akiongea katika kikao cha baraza la mkoa huo hivi karibuni mjini Bagamoyo, alisema ukanda huo maalumu katika mji huo utasaidia kuongeza kasi ya upatikanaji wa ajira pamoja na kuinua kipato cha wakazi wa mji huo.

“Sasa hivi kuna tatizo la ajira katika miji yetu, hivyo uwepo wa viwanda utasaidia vijana wengi kupata ajira,” aliongeza.

Huduma TPA kuimarika kufuatia kujiunga na mkongo wa mawasiliano

Kaimu Mkurugenzi wa TEHAMA wa Mamlaka ya Usimamizi wa Bandari Tanzania (TPA), Bw. Killiani Chale (kushoto) akipokea cheti cha Mamlaka hiyo kuunganishwa na mkongo wa mawasiliano wa Kampuni ya Simu Tanzania (TTCL) ambapo matawi 13 ya mamlaka hiyo yameunganishwa na mfumo huo wa mawasiliano.  Hafla hiyo iliambatana na mamlaka hiyo kukabidhiwa mradi huo baada ya kukamilika.  Kulia ni Ofisa Mkuu wa Ufundi wa TTCL, Bw. Senzige Kisenge.  Tukio hilo lilifanyika jijini Dar es Salaam mwishoni mwa wiki.

Na Mwandishi wetu, Dar es Salaam

Huduma za Mamlaka ya Usimamizi wa Bandari Tanzania (TPA) zinatarajiwa kuimarika kufuatia hatua ya makao makuu ya mamlaka hiyo kuunganishwa kupitia teknolojia ya kisasa na matawi yake 13 nchini.

Mradi huo uliokwishaanza kutekelezwa unafuatia kuunganishwa kwa TPA na mkongo wa mawasiliano wa Kampuni ya simu Tanzania (TTCL) kupitia mfumo unaoitwa Multiprotocal Label Switching Virtual Private Network (MPLS VPN).

Kupitia mfumo huo wa MPLS VPN, huduma za sauti, data na intaneti za TPA zinatarajiwa kuimarika kwa kiwango kikubwa.

“Mradi huu uliotekelezwa na TTCL utatusaidia kuimarisha huduma za bandari zetu pamoja na wateja wetu,” Kaimu Mkurugenzi wa TEHAMA wa TPA, Bw. Killian Chale alisema wakati wa kukabidhiwa rasmi mradi huo jijini Dar es Salaam mwishoni mwa wiki.

Matawi ya TPA yaliyounganishwa na mfumo huo wa mawasiliano ni pamoja na ofisi ya makao makuu TPA, bandari za Mwanza, Kigoma, Mtwara, Tanga, Dar es Salaam, Mafia, Lindi, Kilwa, Pemba, Bukoba, Nansio na Musoma.

Kwa mujibu wa Bw. Chale, sasa mawasiliano kati ya bandari moja na nyingine yatatumia mfumo wa CISCO ambao ni wa gharama nafuu na usikivu wake ni bora zaidi.

Wahudumu wa bar 700 watunukiwa vyeti vya kimataifa vya Master Academy (MBA)

Mkuu wa Masoko na Vinywaji Vikali wa Kampuni ya Bia ya Serengeti (SBL), Bw. Stanley Samtu akizungumza wakati wa hafla ya kukabidhi vyeti wahitimu wa mafunzo ya kimataifa ya Diageo Master Academy   (MBA) yaliyoandaliwa kwa ajili ya kuwapa wahudumu hao ujuzi wa kufanya kazi kwa weledi, katikati ni Meneja Chapa wa Vinywaji Vikali wa kampuni hiyo, Bw.Shomari Shomari na wakwanza kulia ni Mkufunzi wa mafunzo hayo kutoka Afrika Kusini,Bw. Mthokizisi Elvis.

Meneja  Biashara Mipango (Commercial Planning and Activation), wa  Kampuni ya Bia ya Serengeti (SBL) ,Bw. Denis Tairo akimkabidhi cheti cha mafunzo ya uhudumu wa  baa, Bi. Betilda Miruko baada ya kuhitimu mafunzo ya kimataifa ya ‘ Diageo Master Academy’   (MBA) yaliyoandaliwa na kampuni hiyo kwa ajili ya kuwapa wahudumu hao ilikuongeza  ujuzi wa kufanya kazi kwa weledi,Kulia ni Meneja Chapa wa Vinywaji Vikali wa kampuni hiyo,Bw.Shomari Shomari,wa pili kutoka kushoto ni Mkuu wa Masoko na Vinywaji Vikali,Bw. Stanley Samtu na kulia ni Maneja wa Mahesabu wa kampuni hiyo,Bw. Francis Tibaikana.

Na Mwandishi wetu,Dar es Salaam

Kampuni ya Bia ya Serengeti imewatunuku vyeti wahudumu wa bar 700 walioshiriki mafunzo ya kimataifa ya Diageo Master Academy   (MBA) yaliyoandaliwa kwa ajili ya kuwapa wahudumu hao ujuzi wa kufanya kazi kwa weledi.

Akitunuku vyeti hivyo kwa wahitimu hao jijini DSar es salaam jana,Mkuu wa Masoko wa Vinywaji Vikali (Head of Marketing Sprit), Bw. Stanley Samtu,mafunzo hayo yatawawezesha wahitimu hao kushiriki shindano la kitaifa na la kimataifa la Diaego Master Bar Academy .

“Tumewatunuku vyeti vya kimataifa vya MBA wahudumu wa bar kutoka mikoa kumi nchini baada ya kuhitimu mafunzo ya mwezi mmoja,”alisema.

Alisema mafunzo hayo yamewapatia ujuzi wa kuhudumia wateja, kuchangana bia, kujua wajibu wao na aina ya viunywaji vikiwemo vya Barleys,Gordons,Grants,  John Walker, Guiness, Smirnoff na na jamii zote za bia za Serengeti.

Alisema mafunzo hayo ya kimataifa kwa Afrika yalianza kutolewa  Februari 7, 2015 na kukamilika tarehe 7 Machi 2015 na wakufunzi  kutoka Afrika Kusini.

“Mafunzo hayo yalifanyika katika mikoa  ya Dodoma, Dar es Salaam, Mwanza, Arusha, Morogoro, na Mbeya,”alisema.