RUBADA, wadau wajadili ripoti ya Stieglers Gorge

Mkurugenzi Mkuu wa Mamlaka ya Uendelezaji wa Bonde la Mto Rufiji (RUBADA) Bw. Aloyce Masanja akiwaonyesha wadau kutoka katika taasisi na Idara mbalimbali za serikali ripoti ya awali iliyotayarishwa na Kampuni ya  Odebretch International ya Brazili ikiwa ni hatua ya awali ya utekelezaji wa mradi mkubwa wa uzalishaji umeme wa maji wa Stierglers Gorge, ripoti hiyo imewasilishwa kwa wadau hao ili kuijadili na  kuangalia kama moja ya hatua za utekelezaji mradi huo mwishoni mwa wiki jijini Dar es Salaam. 

Mkurugenzi Mkuu wa Mamlaka ya Uendelezaji wa Bonde la Mto Rufiji (RUBADA) Bw. Aloyce Masanja akiwaonyesha wadau kutoka katika taasisi na Idara mbalimbali za serikali ripoti ya awali iliyotayarishwa na Kampuni ya  Odebretch International ya Brazili ikiwa ni hatua ya awali ya utekelezaji wa mradi mkubwa wa uzalishaji umeme wa maji wa Stierglers Gorge, ripoti hiyo imewasilishwa kwa wadau hao ili kuijadili na  kuangalia kama moja ya hatua za utekelezaji mradi huo mwishoni mwa wiki jijini Dar es Salaam.  Kulia ni Mwenyekiti wa Bodi ya wakurugenzi wa Mamlaka hiyo, Profesa Raphael Mwalyosi.

Na Mwandishi wetu, Dar es Salaam

Mamlaka ya Uendelezaji Bonde la Mto Rufiji (RUBADA) imekutana na wadau mbalimbali toka idara na taasisi za serikali kujadili ripoti ya awali ya ujenzi wa mradi wa Stieglers Gorge.

Hatua hiyo muhimu imefikiwa kama moja ya michakato kuelekea utekelezaji wa mradi huo ambao utatekelezwa kwa ushirikiano kati ya RUBADA na Kampuni ya Odebretch International ya Brazil.

“Tumejadili kwa mafanikio makubwa ripoti hii ya awali na mwelekeo ni mzuri,” alisema Mkurugenzi Mkuu wa RUBADA, Bw. Aloyce  Masanja mbele ya waandishi wa habari mwishoni mwa wiki jijini Dar es Salaam mara baada ya mkutano huo.

Ripoti husika ilitayarishwa na kampuni hiyo ya Brazil na kukabidhiwa kwa ungozi wa RUBADA miezi michache iliyopita.

Ripoti hiyo inatoa picha kamili ya mwelekeo wa utekelezaji wa mradi huo mkubwa unaotarajiwa kuzalisha 2100MW za umeme mara utakapokamilika.

Ripoti na mapendekezo hayo imegusa maswala kama maji, teknolojia itakayotumika, vyanzo vya fedha na utunzaji wa vyanzo vya maji ili kukabiliana na mabadiliko ya tabia nchi.

Bonde la Mto Rufiji linapita katika mikoa nane na linakaliwa na watu milioni nane hivyo kukamilika kwa mradi huo kutakuwa na msaada mkubwa katika shughuli za maendeleo.

Bw. Masanja aliwaambia waandishi wa habari kuwa hatua ya kujadili ripoti hiyo ilikua ya muhimu sana kuelekea utekelezaji wake maana utahusisha wadau mbalimbali.

“Kimsingi wajumbe hao wa mkutano walikubaliana kuhusiana na umuhimu wa kutekelezwa kwa mradi huo,” alisema.

Kwa mujibu wa Bw. Masanja, awamu ya pili ya mradi huo itaanza  April, 2013 kwa kuanza kufanya tathmini ya upembuzi yakinifu ya kimazingira ili kuchukua tahadhari kulinda mazingira, viumbe na shuhghuli za kilimo cha umwagiliaji.

Pia awamu hiyo itaangalia namna ya ujenzi wa mbiundombinu mbalimbali itakavyokuwa ikiwemo ya nguzo za umeme, na barabara kutoka katika eneo la mradi hadi Chalinze mkoa wa Pwani.

Alisema awamu hiyo itakamilika Juni 2014 baada ya kukamilisha upembuzi huo yakinifu na kupata vibali mbalimbali vya kuanzisha mradi huo vikiwemo vya matumizi ya maji kutoka Mamlaka ya Udhibiti wa Nishati na Maji (EWURA) na Shirika la Umoja wa Mataifa linaloshughulikia elimu, sayansi na utamaduni (UNESCO) kwa sababu mradi upo katika hifadhi ya Selous.

Alisema ujenzi unatarajia kugharimu dola za Kimarekani bilioni 2.3 ambapo ghrama halisi za mradi mzima ni dola za kimarekani bilioni 3.6.

“Umeme huu ni muhimu katika uzalishaji viwandani na migodini  sababu ni rahisi ambapo uniti moja itauzwa dola ya kimarekani senti nne ,” na kuongeza kusema tayari masoko yako wazi na ni mengi.

Kwa upande wake, Mwenyekiti wa Bodi ya Wakurugenzi RUBADA, Profesa Raphael Mwalyosi alisema mradi huo ni wa mseto na unatarajia kuzalisha nishati ya umeme na pia utachochea kilimo cha umwagiliaji Rufiji chini, maji ya kunywa na utalii katika hifadhi ya Selous.

“Mafanikio ya mradi huo unahitaji ushirikiano mkubwa wa kutunza vyanzo vya maji kutoka TANESCO, DAWASA, Wizara ya maji, Wizara ya Kilimo na Chakula na RUBADA,”alisema Profesa Mwalyosi.

Alisema umeme wa maji ni muhimu na ni uwekezaji endelevu ukilinganisha na umeme wa vyanzo vingine pamoja na kwamba kuna changamoto ya mabadiliko ya tabia nchi,hivyo kuna kila sababu ya mradi huo kukamilishwa.

Alisema viongozi na wadau mbalimbali wanahitajika kuunga mkono ujenzi wa mardi sababu utasaidia kukua kwa uchumi wa nchi na ustawi wa jamii.

Wadau walioshiriki kujadili ripoti hiyo walitoka Wizara ya Nishati na Madini, Maliasili na Utalii, Wizara ya Maji, Wizara ya Kilimo, Chakula na Ushirika, EWURA, Chuo Kikuu cha Dar es Salaam, RUBADA na taasisi mbalimbali.

Mwisho 

Benki ya Afrika Tanzania yaahidi misaada zaidi CCBRT

Mkuu wa Shughuli za Biashara za Kibenki wa Benki ya Afrika Tanzania, Bw.Wasia Mushi (kushoto) akiongea na wagonjwa wa hospitali ya Walemavu ya CCBRT ya jijini Dar es Salaam Jumatatu ya Pasaka.  Wafanyakazi wa benki hiyo waliungana na wagonjwa katika hospitali hiyo na kula chakula cha mchana pamoja katika sikukuu hiyo.

Mkuu wa Shughuli za Biashara za Kibenki wa Benki ya Afrika Tanzania, Bw.Wasia Mushi (kushoto) akigawa chakula kwa wagonjwa wa hospitali ya Walemavu ya CCBRT ya jijini Dar es Salaam Jumatatu ya Pasaka.  Wafanyakazi wa benki hiyo waliungana na wagonjwa katika hospitali hiyo na kula chakula cha mchana pamoja katika sikukuu hiyo.

Mkuu wa Shughuli za Biashara za Kibenki wa Benki ya Afrika Tanzania, Bw.Wasia Mushi (kulia) akigawa zawadi kwa wagonjwa wa hospitali ya Walemavu ya CCBRT ya jijini Dar es Salaam Jumatatu ya Pasaka.  Wafanyakazi wa benki hiyo waliungana na wagonjwa katika hospitali hiyo na kula chakula cha mchana pamoja katika sikukuu hiyo.

Na Mwandishi wetu, Dar es Salaam

Kama moja ya sehemu ya huduma zake kwa jamii, Benki ya Afrika Tanzania imeshiriki chakula cha mchana pamoja na wagonjwa wa matatizo mbalimbali wa hospitali ya CCBRT.

Chakula hicho kiliandaliwa kwa ajili ya maadhimisho ya sikuku ya Pasaka ambayo wakrito wote duniani  husherehekea kufufuka kwa Yesu Kristo siku ya Jumatatu ya Pasaka jijini Dar es Salaam.

Mkuu wa Shughuli za Kibenki, Bw. Wasia Mushi alisema kila mwaka wafanyakazi wa benki yao hujumuika na wagonjwa wa hospitali hiyo kwa ajili ya kuwafariji katika kipindi ambacho wanapata matibabu.

“Tumejumuika na wenzetu ambao wana matatizo mbalimbali kwa kuwaandalia chakula ili nao wajisikie vizuri katika sikukuu hii ya Pasaka…ni moja sehemu ya huduma zetu kwa jamii,” alisema Bw. Mushi.

Alisema pia wao kama benki wametoa zawadi mbalimbali kwa wagonjwa hao kwa ajili ya kufurahia sikuku hiyo ya Pasaka ambayo inapewa umuhimu mkubwa na wakristo wote duniani.

“Benki yetu itaendelea kusaidia hospitali hii kama njia ya kutoa mchango kwa jamii,” alisema.

kwasasa hospitali hiyo inajenga kituo kikubwa cha mama na mtoto.

Naye Meneja Mawasiliano ya Ndani wa hospitali hiyo ya CCBRT, Bw. Abdul Kajumulo aliishukuru kwa kuwa mstari wa mbele katika kutoa misaada mbalimbali.

“Tunaishukuru benki kwa kuja leo hii kula chakula cha pasaka na wagonjwa wetu,” alisema na  kuongeza kusema kuwa wadau wengine wanahitajika kuiga mfano huo.

Alisema hospitali hiyo inatoa huduma ya afya katika magonjwa ya macho,fistula na mifupa.

Alisema hospitali inafanya kazi kwa kushirikiana na Serikali na mashirika ya kimataifa katika kuhudumia jamii ya watanzania.

Mmoja wa wagonjwa aliyeshiriki chakula hicho, Bi. Shida Khamis kutoka Mkoa wa Dodoma alisema anaishukuru benki hiyo kwa kuwakubuka kula chakula cha pasaka pamoja nao.

Alisema watanzania na mashirika mbalimbali yanahitajika kuiga mfano wa benki hiyo katika kusaidia hospitali hiyo na watu wenye matatizo.

Huu ni mwaka wa nne tangu Benki ya Afrika Tanzania ilipoanza kushiriki na wagonjwa sikukuu ya pasaka.

Mwisho

TPSF yapania kujenga uwezo kwa wanachama wake

Na Mwandishi Wetu, Arusha

Taasisi ya Sekta Binafsi nchini imesema itaendelea kuimarisha wanachama wake katika ngazi za kanda kwa kuwapa elimu ya biashara ili kukabiliana na soko la Afrika Mashariki linaloendelea kukua kwa kasi kwa sasa.

Mkurugenzi Mtendaji wa Taasisi hiyo Bw. Godfrey Simbeye aliyasema hayo jijini Arusha muda mfupi mara baada ya kukutana na wanachama wa kanda ya kaskazini ambapo pamoja na mambo mengine wametakiwa kuimarisha vyama vyao vya biashara katika ngazi ya mikoa na wilaya.

“Napenda tuelewe kuwa wanachama walioko katika kanda ya kaskazini wako mipakani hivyo ni jukumu letu kutoa elimu ya kibiashara ya jinsi ya wao kuingia katika ushindani wa soko la Afrika Mashariki,” alisema Simbeye.

Alisisitiza kuwa kwa sasa kuna programu maalumu ya kutoa elimu ya kuendeleza wafanyabiashara ijulikanayo kama (Trade Mark East Afrika) inayoangalia fursa zilizopo katika mikoa ya kanda ya kaskazini ili wafanya biashara wa ukanda huo waweze kuchangamkia na kunufaika na fursa zilizopo.

Aliongeza kuwa TPSF kwa kushirikiana na TCCIA katika ngazi ya kanda wameanzisha program nyingine ya kuendeleza wajasiriamali wadogo waweze kuzalisha na kuuza zaidi.

“Katika kuhakikisha kuwa wanachama wa TPSF wanakuwa kitu kimoja na kujenga sauti moja yenye nguvu, wajasiriamali wadogo wanaangaliwa kwa ukaribu hasa kwa kuanzisha  program mbalimbali za kuwainua kiuchumi katika maeneo yao ya biashara waweze kuingia katika kundi la wafanyabiashara wa kati,” alisisitiza.

Alisema programu kama hizo ni njia tu ya kuelekea katika kuimarisha uchumi wa nchi kupitia wafanya biashara wadogo ambao wakiwezeshwa kielimu na kimtaji wataweza kuwa wafanyabiashara wakubwa hapo baadae.

Akizungumzia mabaraza ya wilaya na mikoa, Bw. Simbeye aliyataka kufanya kazi kwa ukaribu zaidi na taasisi hiyo ikiwa ni katika kujenga umoja na nguvu zaidi katika mikoa na wilaya.

Alisema kwa sasa mabaraza hayo yamekuwa kimya kutokana na kutokutana mara kwa mara na kujadili mustakabali wa masuala mbalimbali ya kibiashara katika mikoa na wilaya zao.

“Kikubwa ninachotaka kuwaambia viongozi katika mabaraza ya biashara ya mikoa na wilaya wafanye mikutano kama katiba inavyoelekeza, mabaraza haya hajakaa kwa muda mrefu hivyo ni wakati wao wa kukutana na kujadili matatizo yaliyopo katika maeneo yao,” alisema Mkurugenzi huyo.

Akizungumzia umuhimu wa mabaraza hayo kwa uchumi wa taifa Bw. Simbeye alisema mabaraza ya wilaya na mikoa ni muhimu sana si kwa uchumi wa mkoa bali kwa taifa na hii ni kutokana na kuhusisha pande zote mbili za sekta ya umma na binafs katika kukaa na kujadili maendeleo ya wilaya na mkoa kwa ujumla.

Mkutano huo wa kuimarisha sauti moja ya taasisi ya sekta binafsi nchini kwa kanda ya kaskazini umejumuisha mikoa ya Arusha, Manyara na Kilimanjaro.

Wanachama wa taasisi hiyo walijadili mambo mbalimbali ikiwa ni pamoja na fursa mbalimbali za kiuchumi katika mikoa ya kanda hiyo pamoja na changamoto mbalimbali zinazowakabili.

Mwisho