The Chairman of Miss Tanzania Committee, Mr. Prashant Patel (centre) talks during the inauguration of the website, www.misstanzaniatreasures.com, over the weekend in Dar es Salaam.  Others in the picture are the Managing Director of the website, Mr. Ali Zoeb (left) and the project’s Media Consultant, Mr. Peter Keasi.

Mwenyekiti wa Kamati ya Miss Tanzania, Bw. Prashant Patel (katikati) akizungumza wakati wa uzinduzi wa tovuti itakayokuwa inajulikana kama www.misstanzaniatreasures.com mwishoni mwa wiki jijini Dar es Salaam.  Wengine katika picha ni Mkurugenzi Mtendaji wa tovuti hiyo, Bw. Ali Zoeb (kushoto) na mshauri wa habari wa tovuti hiyo, Bw. Peter Keasi.

Miss Tanzania yazindua tovuti, yasisitiza umuhimu wa urembo

Na Mwandishi wetu, Dar es Salaam

Jamii imesisitizwa kuona shughuli za urembo kama fani nyingine ambayo ikifanywa vizuri inaweza kumkomboa mshiriki kiuchumi na kumuibua kama mtu wa muhimu katika jamii.

Wito huu umetolewa na Mwenyekiti wa Kamati ya Miss Tanzania, Bw. Prashant Patel aliyekua mgeni rasmi katika uzinduzi wa tovuti ya mashindano hayo, www.misstanzaniatreasures.com, mwishoni mwa wiki jijini Dar es Salaam.

“Lengo la tovuti hii ni kutaka kueneza elimu hiyo na kuonyesha kwamba urembo ni kazi au fani kama nyingine na wala haina uhusiano wowote na uhuni kama baadhi ya watu wanavyoendelea kuamini,” alisema Bw. Prashant.

Alisema wengi wa warembo waliowahi kufanikiwa kutwaa taji la Miss Tanzania leo hii ni watu wenye mafanikio makubwa, kila mtu akifanya kile anachokipenda na kukiweza. 

Alisema tovuti hiyo inataka kuwaibua siyo tu washindi wa Miss Tanzania waliopita, bali washiriki mbalimbali waliwahi kushiriki katika mashindano hayo na kuonyesha wako wapi, wanafanya nini, ndoto na matarajio waliyonayo na hata changamoto wanazokumbana nazo.

Hadi sasa kuna jumla ya washiriki zaidi ya elfu tano tangu Miss Tanzania ianzishwe mwaka 1994. 

Alisema kamati ya MissTanzania inaamini warembo hawa ni hazina na hivyo wanataka kuonyesha hazina iliyopo katika taifa.

Alisema juhudi hizi za kuanzishwa kwa tovuti hii zitafuatiwa na uanzishwaji wa jarida litakalojulikana pia kama Miss Tanzania Treasures.

Akielezea zaidi alisema sehemu ya faida itakayotokana na tovuti hii na jarida hilo itatumika katika kuchangia maendeleo ya warembo hawa kama elimu na shughuli mbalimbali wanazofanya kwa utaratibu utakaopangwa.  Pia, faida itakayopatikana itatumika katika kusaidia watoto yatima hapa nchini.

“Tovuti hii itasaidia dunia nzima kushuhudia na kujua kwa undani kuhusu Miss Tanzania.  Hii ni fursa nyingine katika kukuza sekta ya utalii hapa nchini maana hakuna ubishi kwamba Miss Tanzania imekua moja ya njia za kukuza utalii wetu nje ya nchi,” alisisitiza.

Akielezea zaidi alisema tovuti ni njia muafaka katika kipindi hiki cha Teknolojia ya Habari na Mawasiliano (TEHAMA) ambapo maendeleo yanategemea zaidi ufanisi katika mawasiliano.

“Tovuti hii itasaidia kujenga mtandao baina ya warembo wenyewe na wakajua jinsi ya kushirikiana katika maswala mbalimbali ya kijamii na kiuchumi na hivyo kuchochea maendeleo,” alisema.

Alisisitiza kuwa tovuti hii pia itasaidia kujenga mahusiano na mawasiliano kati ya warembo wa Miss Tanzania kwa upande mmoja  na wadau wa maendeleo ndani na nje ya nchi.

“Tutawashirikisha wadau mbalimbali katika swala hili muhimu na ni wito wetu kwamba wasituangushe kwa faida ya nchi yetu,” alisema Bw. Prashant.

Kwa upande wake, Mkurugenzi Mtendaji wa tovuti hiyo, Bw. Ali Zoeb aliwaahidi warembo walioshiriki uzinduzi huo kuwa tovuti hiyo itasaidia sana katika kuwaunganisha na wadau mbalimbali ndani na nje ya nchi na kuwasisitiza warembo popote walipo kuanza kujenga mazoea ya kutembelea tovuti hiyo na kujua kinachojiri.

Naye, mshauri wa habari wa tovuti hiyo, Bw. Peter Keasi alisema tovuti na jarida litakaloanzishwa hivi karibuni vitasaidia kurahisisha mawasiliano kufanya kazi kama daraja baina ya warembo hapa nchini, jambo alilosema ni muhimu kwa maendeleo.

Uzinduzi huo ulishuhudiwa na warembo walioko kwenye kambi ya Miss Tanzania kwa sasa pamoja na wadau wengine wa urembo hapa nchini.

Mwisho 

The Manager, Public Private Partnership (PPP) Coordination Unit, Mr. Saidi Amiri stressing a point when talking to journalists over the weekend in Dar es Salaam.

Meneja wa kitengo cha uratibu wa mpango wa ubia kati ya serikali na sekta binafsi (PPP), Bw. Saidi Amiri akisisitiza jambo alipokuwa akiongea na waandishi wa habari jijini Dar es Salaam mwishoni mwa wiki.

Watanzania wahamasishwa kuwekeza miradi ya PPP

Na Mwandishi wetu, Dar es Salaam

Watanzania wamepewa changamoto kuchangamkia miradi itakayotayarishwa chini ya utaratibu wa ubia kati ya serikali na sekta binafsi (PPP) mara utekelezaji wake utakapokuwa tayari.

Wito huu umetolewa Meneja wa kitengo cha uratibu wa mpango huo wa PPP, Bw. Saidi Amiri alipokuwa akiongea na waandishi wa habari jijini Dar es Salaam mwishoni mwa wiki.

“Sheria iliyounda mpango huu inasisitiza sana uwezeshaji wa wananchi kwa njia ya kushirikishwa katika miradi mbalimbali ya maendeleo,” alisema, akiongeza kwamba kwa sasa kitengo hicho kiko katika hatua za kupitia miradi hiyo itakayogusa sekta mbalimbali.

Utaratibu huu utatekelezwa kwa sheria namba 18 ya mwaka 2010.

Alisema miradi hiyo ya ubia ikifanikiwa itasaidia kwa kiasi kikubwa kuunga mkono malengo ya taifa ya maendeleo ya miaka mitano na dira ya taifa ya mwaka 2025.

Alisema kwa sasa wanafanya upembuzi yakinifu wa miradi hiyo itakayohusisha sekta mbalimbali katika maeneo ya miundombinu, kilimo na nyinginezo na kwamba kipaumbele kitakuwa kwa wafanyabiashara wazawa watakaokuwa na uwezo.

Kitengo cha PPP kimeunda na vitengo viwili; kile cha uratibu kilicho katika kituo cha Uwekezaji Tanzania na kile cha fedha kilicho katika wizara ya Fedha.

 Alisema Serikali kupitia wizara na taasisi zake itaibua miradi ya ubia na kuifikisha kitengo cha uratibu TIC ambapo  itachambuliwa kitaalamu na kuifikisha Wizara ya fedha kwa ajili ya uhakiki wa mwisho.

Alisema baada ya hapo miradi itatangazwa kwenye vyombo vya habari kwa ajili ya kupata wawekezaji kwa kushirikiana na serikali.

Akielezea zaidi Bw. Amiri alisema katika miradi ya namna hiyo mwekezaji anaweza kujenga barabara,bandari, na viwanja vya ndege vizuri na vyenye viwango vya kimataifa na kuwatoza fedha wanaotumia vitega uchumi hivyo.

Akitoa mfano alisema mpango kama huu umesaidia sana kufikiwa kwa maendeleo makubwa katika nchi ya Afrika Kusini hasa katika sekta ya miundombinu ya barabara.

Alisema kitengo hicho kilichoanzishwa mwezi Machi mwaka huu kinazidi kutoa elimu kwa watumishi wa ummma na jamii kwa ujumla ili kuwa na ufahamu zaidi juu ya swala hilo ili kufikia malengo yake.

Alisema kwa kuanzia katika kila Wizara patakuwa na maafisa wa PPP na ili kusaidia kubuni miradi na kuifikisha TIC iweze kufanyiwa upembuzi wa kitaalamu na kufikishwa Wizara ya fedha. 

Bw. Amiri alihamasisha wawekezaji hasa taasisi za ndani za fedha kutumia fursa hiyo kuwekeza katika miradi mbalimbali itakapokuwa tayari.

Mwisho